2 Corinto 3

U Tagapagserbi hide tu Bigu a Tipan

1Nadid, tu palagay moy beman ay páppuriyán me dámman i sadile miyáy? Awan kame konna tu agum a kailangan pa ti sulat para tanggapán moy oni sulat a gábwat nikam para tanggapán be tu agum a lugar.#3:1 Basaán tu Gimet 18:27, Roma 16:1, 1 Corinto 16:3. 2Hikamon u patunay me, a kumán a nakasulat dán tu puso me. Dipo u kákkabiyag moy ay kumán a sulat a matenggi sakay mabasa nu atanan a tolay. 3Maliwanag a u biyag moy ay kumán a essa a sulat a gábwat ni Cristo a nesulat tu pamama-itan me. Nesulat iye, bakán a tu tinta nan tu Ispirito nu Diyos a biyag. Sakay bakán bi iye a nesulat tu natáppeng a bito nan tu puso nu tolay hide.#3:3 Basaán tu Exodo 20:1-17, Deuteronomio 6:5-6, Roma 10:9-10.

4Makagi me u konna hod dipo tu págtiwala me tu Diyos tu pamamag-itan ni Cristo. 5Ni tu sadile mi la, ay awan sapat u kakayanan me a gimitán iye; nan u Diyos u nángkaluub nikame ti kakayananan iye. 6Inatádden na kame ti kakayanan para ipangaral u tungkul tu bigu na a tipan. Sakay i ipáppangaral miyan iye ay awan neayun tu nakasulat tu Kautusan nan tu Ispirito. Dipo u iyatád nu nakasulat a Kautusan ay kamatayan, pero u Ispirito ay mangatád ti biyag.#3:6 Basaán tu Jeremias 31:31-34, 1 Corinto 4:4-6.

7Nikuna iyatád u patakaran a nakasulat tu natáppeng a bito, kaguman a nehayag u demlag nu Diyos. Awan maileng nu Israelita hide u hupa ni Moises, kaya la iye a demlag ay limmipas. Nadid ni nángpeta u Diyos tu kapangyariyan na nikuna a iyatád na u Kautusan a nakapangatád ti kamatayan,#3:7 Basaán tu Exodo 34:29-35. 8maspa u ipeta na a kapangyariyan ni magahikad dán u Banal a Ispirito. 9Ni nángpeta u Diyos tu kapangyariyan na nikuna a iyatád na u Kautusan a nakapangatád ti kamatayan, maspa u ipeta na a kapangyariyan ni ibutan na dán u kasalanan nu tolay. 10Dipo hina, makagi tam a u date a demlag ay awan dán dipo napalitan dán ti mas mademlag. 11Ni tehhod a kapangyariyan a impeta u Diyos tu páng-atád na tu Kautusan a limmipas maspa u kapangyariyan a ipeta na tu bigu a tipan a manatile hanggan-hanggan.

12Dipo ti pag-asa miyan iye, ay mabegsák u pággisipan me a ibaheta u upos nu Diyos. 13Bakán kame a konna ni Moises a tinakáppan na u hupa na tánni awan ketan nu Israelita hide u kállipas ni demlagan itod.#3:13 Basaán tu Exodo 34:33. 14U tatahoden, awan naintendiyan nu Israelita hide u kahulugan ni iye tu itod dipo mágkaigát u ulu de a kumán a te tumáttakáp tu isip de. Sakay hanggan nadid ay awan di palla naintediyan iye kada basaán de u date a kasunduwan dipo te tumáttakáp palla tu isip de. Sakay mawan la i takáppan ina, ni nákpágkaessa u essa a tolay ni Cristo.#3:14-15 Basaán tu Nehemias 8:2-8, Gimet. 15:21. 15Hanggan nadid, ay tehhod palla a tapoh u isip de kada basaán de u libro ni Moises dipo awan di iye naintendiyan. 16Pero ni sumole u tolay sakay maniwala tu Panginoon, ay mawan u nakatapoh tu pággisipan na.#3:16 Basaán tu Exodo 34:34. 17U Panginoon a nabanggit he ay u Banal a Ispirito, sakay ni hádya u Banal a Ispirito nu Panginoon, ay tehhod bi hod a kalayaan a gimitán u kagustuwan nu Diyos.#3:17 Basaán tu Juan 8:32, 1 Corinto 10:23-32. 18Sakay nadid ay nawan dán u tapoh tu isip tam, sakay netan dán nikitam u kapangyariyan nu Panginoon. I kapangyariyanan iye ay gábwat tu Panginoon a Banal a Ispirito. Siya u utay-utay a mangbagu nikitam, hanggan magin kapareho na kitam.#3:18 Basaán tu Mateo 10:25, 1 Corinto 11:1.

Currently Selected:

2 Corinto 3: MBJC

Highlight

Copy