2 Corinto 1

1Gábwat iye a sulat nikán a ti Pablo a apostol ni Jesu-Cristo, ayun tu kaluuban nu Diyos sakay gábwat tu kapatkákka tam a ti Timoteo. I sulatan iye ay para tu mánnampalataya hide ti Corinto sakay tu mánnampalataya hide a mágyan ti buo a Acaya:#1:1 Basaán tu Efeso 1:1, Colosas 1:1, 2 Corinto 1:19, Gimet 16:1, Gimet 18:1.

2Pagpalaán kam nakwa sakay magkahod ti kapayapaan a gábwat tu Diyos a Ama tam sakay tu Panginoon a ti Jesu-Cristo.#1:2 Basaán tu Mateo 1:20-21.

Nagpasalamat ti Pablo

3Puriyán tam u Diyos sakay Ama nu Panginoon tam a ti Jesu-Cristo, siya u maháhhabagán a Ama. Siya u Diyos a pinaggábwatan nu atanan tulung.#1:3-6 Basaán tu Deuteronomio 8:2-3, Juan 9:1-3. 4Pinabegsák na kitam tu kalungkutan tam hide para makatulung kitam be tu maglungkut hide, tu pamamag-itan nu kasayaan a natanggap tam tu Diyos.#1:4 Basaán tu 2 Corinto 7:6-7, Roma 15:5. 5Dipo ni sa kodya ti kadágge u táttiisán me a hirap tu pákpágkaessa ni Cristo, ay konna bi hod u kasayaan a natanggap me a gábwat nikuna. 6Ni maghirap man kame, ay para iye tu kasayaan sakay tu kaligtasan moy. Ni paha-pahaán kame, ay mapaha-paha kam be sakay bumegsák kam be tánni matággád moy u kahirapan a dáddanasán moy a konna nikame. 7Kaya matibay u pag-asa me para nikam dipo tukoy me a ni kodya a nagin kaguman mi kam tu pághirap ay konna labi hod kaguman mikam tu kasayaan me.#1:7 Basaán tu Awit 23:4, Juan 16:5-7.

8Kákkapatkákka hide, ibaheta mi nikam u kahirapan a nadanas me ti Asia. Tunay ti kadágge iye a nadanas me, akala me ni matay kami dán.#1:8-9 Basaán tu Genesis 37:34-35, Jonas 4:8. 9U akala me ay dummemát dán u odas me. Pero nangyare itod tánni awan kame magtiwala tu sadile me nan tu Diyos a mangbiyag a huway tu patay hide. 10Inligtas na kame tu kákkatay sakay tulos-tulos a ilálligtas, sakay umasa kame a tulos-tulos padi u pangligtas na nikame, 11tu tulung nu dasal moy hide. Ni konna hod, ay makpal u magpasalamat nikuna dipo tu págpapala na nikame bilang tábbeg tu dasal nu kakpalan.

Nagbagu ti Plano ti Pablo

12Essa a bagay u mepagmadakál me: nabiyag kame ti matuwid sakay tapat tu atubang nu atanan a tolay, lalu dán nikam. Nagimet mi iye dipo tu kagbi nu Diyos bakán a tu pamamag-itan nu karunungan nu mundu. Sakay mapatunayan nu isip me a tatahoden u ipagmadakál me. 13U insulat mila nikam ay u kaya moy a basaán sakay intendiyán kaya umasaák, kaya umasaák a tu dimodyan a aldew ay maintendiyan moy kame ti husto. 14Para káddemát nu aldew a kássole nu Panginoon Jesus, ay mepagmadakál moy kame, a konna tu pángmadakál me nikam.#1:14 Basaán tu Mateo 24:30-42, 1 Corinto 1:7-8.

15Dipo ti pánniwala kuwan iye, ay binalak ko a penduwaák hina a umangay tánni maduble u págpapala moy. 16Nagplanuwák a humoyot pa hina káangay ko ti Macedonia. Sakay tu kássole ko, ay humoyuták dámman hina tánni matulunganák moy tu págbiyahe ko ti Judea.#1:16 Basaán tu Gimet 19:21. 17Dipo beman a konna he u plano ko ay makagi moy dán a pabagu-baguwák ti isip? Akala moy beman a pabagu-bagu u plano ko konna tu gággimitán nu tolay a makamundu, a kagiyán na nadid a, “On” sakay mamaya-maya ay “Awan?” 18Ni kodya a tapat u Diyos, ay konna bi hod u upos ko nikam: u “On” ko nadid ay manatile a “On.”#1:18-20 Basaán tu Deuteronomio 7:9, 1 Corinto 10:13. 19Hikame ay di Silvano sakay Timoteo ay nangaral nikam tungkul ni Jesu-Cristo a anak nu Diyos. Sakay tukoy moy a ti Cristo ay tapat tu upos na. Talaga a tupadán na u panantu na. 20Dipo atanan a pananto nu Diyos ay natupad ni Jesu-Cristo. Kaya ngane makagi tam a tapat u Diyos sakay iye ay makapangatád ti kapuriyan nikuna.#1:20 Basaán tu 1 Corinto 14:16, Pahayag 3:14. 21U Diyos u nangpatibay nikame sakay nikam tu pákpágkaessa tam ni Cristo, sakay siya be u nangpile nikitam. 22Tinatakan na kitam bilang kao na tu pamamag-itan nu pángkaluub na nikitam tu Ispirito na. Iye u patunay a matanggap tam u atanan a impanantu na.

23Tistigu ko u Diyos, tukoy na u katoy tu puso ko a kayaák a awan immangay hina ti Corinto ay dipo gusto takam a atádden ti pagkakataun a magsise tu mágkadukás moy hide a gimet. Sakay para awan takam makagiyan. 24Bakán a gusto mi kam a págdipalonguwan tu pánnampalataya moy nan gusto mi la a tumulung tánni magin masaya kam tu pánnampalataya moy. Dipo matatag kamon tu pánnampalataya moy hina.

Currently Selected:

2 Corinto 1: MBJC

Highlight

Copy