1 Tesalonica 4

U Biyag a Makasaya tu Diyos

1Kaya ngani kákkapatkákka, essa pa a bagay u pákkekakagbi me nikam sakay ipayo tu ngahan nu Panginoon Jesus. Ipakpagguhon me nikam a mabiyag kam a ayun tu natukuyan moy nikame dipo ina u makasaya tu Diyos. Konna ngani hod u kakkabiyag moy nadid pero maspagandaan moy pa. 2Tukoy moy dán be au toldu hide a inpáppakapospos me nikam ay gábwat tu Panginoon a ti Jesu-Cristo. 3U gusto la nu Diyos ay magin banal kam sakay umadeyo tu atanan a klase a kadukássan.#4:3 Basaán tu 1 Corinto 6:18. 4Hikam a lállake hide dapat a magin banal sakay marangal u pákpággagum moy tu balang essa tu kakkabanga moy. 5Diyan kam paalipin tu kagustuwan nu pilas konna tu gággimitán nu awan hide nakatukoy tu Diyos.#4:5 oni kaya: Dapat a matuto a magpugád u kada essa tu sadile na a bággi sakay dyan maakit tu kagustuwan nu pilas. 6Ni sunudán moy iye a adal ay awan dán ti mangagew nikam tu kákkabanga nu deyaman a kapareho na a tolay, lalu dán tu kabanga nu essa a tolay a kapareho na a mánnampalataya tu Diyos. Inpangaral mi dán nikam tu itod, a parusaan nu Diyos u deyaman a manggimet ti iye a kadukássan. 7Dinulaw kitam nu Diyos para mabiyag a tehhod a kabanalan bakán a tu kadukássan. 8Kaya ni ti deya man u mangadi ti iye a adal ay bakán a tolay u inadiyan na nan u Diyos a náng-atád nikam tu Banal na a Ispirito.

9Nadid, tungkul dámman tu págmahal para tu kákkapátkákka, awan kamon dapat a paalaalaan dipo intoldu dán nikam nu Diyos ni kodya kam a magmahalan. 10Tukoy me a mahal moy dán u kákkapatkákka tam hide a taga-Macedonia. Pero konna paman hod ay mákkekakagbiyák padi nikam a dagdagan moy pa u págmahal moy nide. 11Pilitán moy a mabiyag ti tahimik sakay pospusán moy u sadili moy a gimet. Sakay magtarabaho kam tánni mabiyag kam, konna tu intoldu mi nikam. #4:11Basaán tu Efeso 4:28; 2 Tesalonica 3:10-12. 12Ni ina i gimitán moyay ay irespeto kam nu awan hide mánnampalataya sakay awan kam umasa tu agum tu kákkabiyag moy.

U Kássole nu Panginoon

13Kákkapátkákka mi hide, gusto me a matukuyan moy ni ánya u mangyare tu mánnámpalataya hide a nágkatay dán, tánni awan kam maglungkut a konna tu tolay hide a awan ti pag-asa.#4:13 Basaán tu Efeso 2:12. 14Maniwala kitam a natay ti Jesu-Cristo pero nabiyag siya a huway. Kaya maniwala kitam be a biyagan a huway nu Diyos u atanan a mánnampalataya a nágkatay dán, sakay ipisan na hide ni Jesu-Cristo kássole na.#4:14 Basaán tu 2 Corinto 4:14.

15Sa iye i adalay nu Panginoon a kákkagiyán mi nikam: hikitam a biyag palla ay awan mágdipalongo tu mánnampalataya hide a nágkatay dán a tumagbu tu Panginoon. 16Ti aldiwan itod a kassidung nu Panginoon a gábwat ti langet, ay tehhod a masaneg u tolay hide a mabegsák a utus, a ipakhaw nu arkanghel, sakay u tánnog nu trumpeta nu Diyos. U nágkatay dán hide a mánnampalataya ni Cristo ay biyagán pa.#4:16 Basaán tu Mateo 24:31; 1 Corinto 15:23; 2 Tesalonica 2:1. 17Sakay hikitam a biyag palla ay maipun tu panganurin kaguman u biniyag hide tánni tagbuwán u Panginoon tu panganurin. Tánni makaguman tam siya hanggan-hanggan. 18Kaya ngani, pabegsákkán moy u isip nu bawat essa tu pamamag-itan ni adalan iye.

Currently Selected:

1 Tesalonica 4: MBJC

Highlight

Compare

Copy