1 Tesalonica 3
3
1Nikuna awan mi dán matággád u ammaw me nikam ay nagdisisyon kame a magwahak dálla ti Atenas.#3:1Basaán tu Filipos 2:19; Gimet 17:15. 2Sakay pinaangay mi hina nikam ti Timoteo a kapatkákka tam sakay kaguman me a tagapagserbi tu Diyos tu pángpakapospos tu Maganda a Baheta patungkul tu Panginoon tam a ti Cristo. Pinaangay me siya hina nikam tán pabegsákkán u isip moy sakay tán patibayán u pánnampalataya moy.#3:2 Basaán tu 2 Corinto 1:1; Colosas 1:1. 3Tánni awan manghina u deyaman nikam dipo tu págpahirap di nikam. Tukoy tam labe a u hirap hide ay kaguman tu plano nu Diyos para nikitam. #3:3 Basaán tu Gimet 14:22. 4Kinákkagi ku dán nikam, nikuna a katoy kami palla hina a talaga a magdanas kitam ti hirap. Kaya konna ngani hod nadid u nangyare konna tu tukoy moy dán.#3:4 Basaán tu 1 Tesalonica 2:14. 5Kaya ngane, nikuna a awanák dán makatiis ay nangutusák ti umangay hina tánni ilingán ni kumusta dán u pánnampalataya moy tu Panginoon. Mabalisaák bakay ni nalinlang kamon ni Satanas, ay ni mara konna hod i mangyariyay ay mawanan ti serbi u pángngaral me.#3:5Basaán tu Mateo 4:3; Filipos 2:16.
6Nadid ay nagsole dán he ti Timoteo, maganda u inbaheta na tungkul tu pánnampalataya sakay págmahal moy. Sakay inbaheta na be nikame a pirme moy kame a maalaala sakay tunay u pagkasoh moy a metan kame. Konna tu pagkasoh me a metan mikam. #3:6 Basaán tu Gimet 18:5. 7Dipo tu nabaheta me a matibay u pánnampalataya moy ni Cristo, kákkapatkákka, ay nasaya kame maski makpal kame a kabalisaan sakay kahirapan. 8Gimmaganda u bábbatiyán me dipo tu págtulos-tulos moy a pagin matatag ti pánnampalataya. 9Kodya mi wád a mapasalamatan ti husto u Diyos dipo tu kasayaan a natanggap me dipo nikam? 10Idáddasal me ti husto aldew ay ti gibi a nakwa ay magketa kitam a huway tánni madagdagen ni anyaman u kulang pa tu pánnampalataya moy.
11Nakwa ipakultad nu Diyos a Ama sakay nu Panginoon tam a ti Jesu-Cristo a makaangay kami hina. 12Palaguwan pa nakwa nu Panginoon u págmahalan moy tu balang essa sakay tu atanan a tolay, konna tu págmahal mi nikam. 13Pabegsákkán na u isip moy tánni manatili kam a banal sakay awan ti kapintasan tu atubang nu Diyos tam a Ama hanggan tu káddemát a huway nu Panginoon tam a ti Jesus, kaguman u pinili na hide. #3:13 Basaán tu 1 Corinto 1:8; 1 Tesalonica 2:19; 4:17.
Currently Selected:
1 Tesalonica 3: MBJC
Highlight
Share
Compare
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
