1 Corinto 9

U Karapatan sakay Tungkulin nu Essa a Apostol

1Awan beman malayaák? Awan beman apostolák? Awan beman netan ko ti Jesus a Panginoon tam? Awan beman hikam u bunga nu págserbi ko tu Panginoon? 2Tu agum ay awanák de tenggiyán a apostol pero tukoy ko a kilalaánnák moy a apostol! Dipo hikam a mismo u patunay a apostolák nu Panginoon, dipo simmampalataya kam tu Diyos tu pamamag-itan nu intoldu ko.

3Sa iye u tábbeg ko tu awan hide mangkilala tu pagkaapostol ko. 4Awan kame beman ti karapatan a umasa tu mannampalataya hide tu kailangan me hide? 5Ni te kabanga kame, awan kame beman ti karapatan a mangkuyog tu kabanga me a mánnampalataya a konna tu gággimitán ni Pedro, a konna tu agum hide a apostol sakay kákkapatkákka nu Panginoon tam? 6Hikame beman la ay ti Bernabe u kailangan a magtrabaho para tu kákkabiyag me? 7Tehhod beman a sundalo a siya pa u manggastus tu págserbi na? Tehhod beman a magmula a awan makinabang tu bunga nu immula na? Tehhod beman a magalaga ti tupa a awan makinabang tu gatas nu tupa na?

8U kákkagiyán ko ay awan la neayun tu isip nu tolay; nan konna be hod u nesulat tu Kautusan. 9Dipo nakasulat tu Kautusan ni Moises: “Dyan mo busalan u baka mentras a pagággik nan pabayan mo a kuman.” Bakin u baka beman hide u pospusan nu Diyos?#9:9 Basaán tu Deuteronomio 25:4, 1 Timoteo 5:18. 10Awan! Hikitam u gusto a kagiyan nu Diyos. Nesulat iye para nikitam, dipo u mággaradu sakay u mággággik ay pareho a umasa tu kabunong de. 11Minulaan mikam ti ispiritwal a págpapala; kanya awan beman dapat la a magane kame nikam tu kailangan me hide?#9:11 Basaán tu Roma 15:27. 12Ni u agum hide a mángngaral ay tehhod a karapatan, di mas lalu kame dán!

Pero maski ni konna pa man hod ay awan me ginamit iye a karapatan. Nan tiniis me u atanan tanni awan kame magin hadlang tu Maganda a Baheta tungkul ni Cristo.#9:12 Basaán tu 2 Corinto 6:3. 13Awan moy beman tukoy a u magserbi hide tu templo ay tumanggap tu makan a gábwat tu templo, sakay u mágserbi hide tu altar ay tehhod be hide a kabahagi tu alay a katoy tu altar?#9:13 Basaán tu Deuteronomio 18:1. 14Konna labe hina, inyutus nu Panginoon a u timmanggap tu Maganda a Baheta ay dapat tumulong tu kailangan hide nu mángngaral hide tu Maganda a Baheta.#9:14 Basaán tu Lukas 10:7-8.

15Pero awan ko ginamit iye hide a karapatan, sakay awanák nadid nagsulat nikam tán atáddinák moy ti tulung. Mas gustuwán ku pa a matayák ti aláp nan mák-agidák sakay itod u magin dahilan para awan ku dán mepagmadakál a itáttoldu ko u Maganda a Baheta ti libre. 16Bakán a dipo a mángngaralák tu Maganda a Baheta ay maariyák dán a magmadakál. Ina u tungkulin a netalaga nikán. Kakagbiyák ni awan ko ibaheta u Maganda a Baheta! 17Ni gimitán ko iye tu sadile ko a kagustuwan ay tehhodák a mauhay a upa; pero u tatahoden gimitán kula u tungkulin ko dipo iye u nepagkatiwala nikán nu Diyos. 18Anya nadid i mauhay kuway a gantimpala? Awan ti agum nan u págtoldu ko tu Maganda a Baheta ti libre sakay tu awan ko káasa tu karapatan ko a mangaged bilang mángngaral.#9:18 Basaán tu 2 Corinto 11:7.

19Malayaák sakay awanák alipin nu deyaman; pero nagpaalipinák tu atanan tánni makaakiták la ti makpal para sumampalataya tu Panginoon Jesu-Cristo. 20Kapag ni hedák tu Judio hide ay mabiyagák a konna tu essa a Judio tánni maakit ko hide a sumampalataya ni Jesu-Cristo. Maski ni awanák sakup nu Kautusan nu Judio hide ay sinunud ko iye tánni sumampalataya la hide.#9:20 Basaán tu Roma 11:14. 21Kapag ni hedák tu Hentil hide, a awan makatukoy tu Kautusan ni Moises ay mabiyagák a konna tu essa a tolay a awan sakup nu Kautusan tánni maakit ko be hide. (Pero awan ko kákkagiyán a awanák dán sumássunud tu Kautusan nu Diyos dipo u sássunudán ko ay u utus hide ni Cristo.)#9:21 Basaán tu Roma 2:12, 14. 22Ni hikán ay hod tu mágkahina hide ti pánnampalataya ay mákbagayák para mapabegsák ko hide ni Cristo. Nákbagayák tu atanan a tolay, tánni maskin tu ánya a paraan ay maakit ko u agum nide a sumampalataya ni Jesu-Cristo para maligtas hide.#9:22 Basaán tu 2 Corinto 11:29, Roma 15:1, 1 Corinto 10:33, Roma 11:14.

23Gággimitán ko iye a atanan dipo tu Maganda a Baheta, tánni mákbahagiyák tu págpapala ni iye. 24Tukoy moy a u kasale tu ginanan ay sabay-sabay a magginan, pero eessa la u makatanggap ti gantimpala! Kaya husayán moy a magginan tánni makatanggap kam ti gantimpala.#9:24 Basaán tu Hebreo 12:1. 25Atanan nu máksale tu ayam ay kailangan a magpugád tu sadile na tu atanan a bagay. Tánni matanggap na u gantimpala na a pang-alistuwan. Pero u gantimpala a gusto tam ay u gantimpala a panghanggan-hanggan.#9:25 Basaán tu 2 Timoteo 2:5, 2 Timoteo 4:8, Santiagu 1:12, 1 Pedro 5:4. 26Kaya ngani a tehhod a tamuwán u págginan ko. Sakay awanák sumuntuk tu pahás. 27Disiplinaán ko u sadile ko sakay magpugáddák, dipo ni awan, bakay káttapos ko a magbaheta tu Maganda a Baheta tu agum ay hikán pa u awan makatanggap ti gantimpala.

Currently Selected:

1 Corinto 9: MBJC

Highlight

Copy