1 Corinto 8

Tungkul tu Makan a Inyalay diyos-diyosan

1Nadid, iye u metábbeg ko tu tanung moy tungkul tu makan a nealay tu diyos-diyosan hide.

Tukoy tam, “a tehhod kitam a karunungan a atanan.” Iye a “karunungan” u rason tánni magin palalo u tolay, pero u págmahal u makapangpatibay nikitam.#8:1 Basaán tu Roma 15:14. 2U tolay a magkagi a makpal dán siya a tukoy, ay kulang palla a talaga u tukoy na. 3Pero u mangmahal tu Diyos u kilalaán na a kao na.#8:3 Basaán tu Galacia 4:9, Roma 8:29.

4Kaya tungkul tu makan a nealay tu diyos-diyosan hide, tukoy tam a awan tatahoden iye hide a diyos. Sakay tukoy tam be a eessa u Diyos.#8:4 Basaán tu 1 Corinto 10:19, Deuteronomio 6:4. 5Maske ni te kákkagiyán a makpal a diyos ti langet oni ti lutaáy, sakay mákpal pa a ngángngahanan a “diyos hide” sakay “panginoon hide,” 6para nikitam ay eessa la u Diyos, u Ama a nanglalang tu atanan a bagay, sakay biyag kitam para nikuna. Eessa u Panginoon, ti Jesu-Cristo: tu pamamag-itan na ay nilalang u atanan a bagay sakay tu pamamag-itan na ay biyag kitam.#8:6 Basaán tu Malakias 2:10, Efeso 4:6, 1 Corinto 1:2, Juan 1:3, Colosas 1:16.

7Pero awan atanan ay makatukoy ti iye. U agum ay nasanay ti itod a magsamba tu diyos-diyosan, kaya hanggan nadid, kapag ni kuman hide ti konna he ay u akala de ay alay padi tu diyos-diyosan u kákkanán de. Dipo wad a kulang u karunungan de, kaya mabalisa hide tu buung akala de a nagkasala hide.#8:7 Basaán tu 1 Corinto 8:4-5. 8Bakán a dipo tu makan kaya kitam a karapat-dapat tu Diyos. Awan ti mawan nikitam ni awan kitam kuman ti konna hod a makan, sakay awan labe ti meatád a maganda ni kuman kitam man he.#8:8 Basaán tu Roma 14:17.

9Pero mag-ingat kam, bakay tu kalayaan moy a kuman ti ánya man a makan ay magin rason a pagkasalaan nu mágkahina hide ti pánnampalataya.#8:9 Basaán tu 1 Corinto 8:10-11, Roma 14:1. 10Pero hikam a mas nakatukoy ti iye, ay kuman tu disalad nu templo nu diyos-diyosan hide, sakay netan kam nu mágkahina palla hide ti pánnampalataya, awan wád hide meaheg a kuman ti itod a nealay tu diyos-diyosan hide maski para nikuna ay kasalanan iye? 11U ginimet mo a itod u nagin dahilan nu págkasala nu kapatkákka moy a mahina palla ti pánnampalataya. A natubos be tu kákkatay ni Cristo.#8:11 Basaán tu Roma 14:15, 20. 12Dipo hod ay nagkasala kam ni Cristo dipo hikam u dahilan nu págkakasala nu kapatkákka moy dipo u ginimet mo u nángtoglad nikuna para maggimet ti bagay a labag tu kaluuban na. 13Kaya ni tu makan la u dahilan a pagkasalaan nu kapatkákka ko ay dyanák dán kuman ti karne tánni awan siya magkasala.#8:13 Basaán tu Roma 14:21.

Currently Selected:

1 Corinto 8: MBJC

Highlight

Copy