1 Corinto 4

U Apostol hide ni Cristo

1Nadid, dapat u pangileng moy nikame ay tagapagserbi ni Cristo sakay katiwala a mángpahayag tu upos nu Diyos a date a awan ti makatukoy.#4:1 Basaán tu 1 Corinto 9:17, Roma 11:25. 2U katiwala ay kailangan a magin tapat tu amo na.#4:2 Basaán tu 2 Corinto 1:12. 3Pero awan ti ánya man nikán ni hatulanák moy oni maski hádya a pághukuman nu tolay; maski ni hikán a mismo ay awan ko maare a kagiyán a tapaták oni awan. 4Awan ti mangbalisa ti isip kuwáy, pero bakán a u gusto na kagiyán ay awanák dán ti kasalanan. U Panginoon la u makahatul nikán ni tama oni male u gággimitán ko. 5Kaya bakán a hikitam u magkagi ni tama oni madukás u essa a tolay. Maguhay kam tu tama a panahun, dipo u Panginoon u maghatul káddemát na. Iluwas na u bagay hide a netagu tu kadiklamman sakay ikagi na u lihim hide a plano nu balang essa. Ti panahunan iye, balang essa ay tumanggap ti papure a karapat-dapat nikuna a gábwat tu Diyos.#4:5 Basaán tu Roma 2:16, 1 Corinto 3:13, 2 Corinto 10:18, Roma 2:29.

6Kákkapatkákka hide, ginamit ko a halimbawa u sadile ko sakay ti Apolos para maintendiyan moy u gusto a kagiyán ni kakagiyanan iye, “Diyan moy dagdagen u nakasulat.” Kaya dyan moy ipagmadakál u essa a tolay sakay hamakán moy labe u essa. 7Ánya i nanglamangan moyay tu agum? Awan beman atanan a katoy nikam ay gábwat tu Diyos? Ni konna hod, bakin a ipagmadakál moy ina a kumán a awan kaluub nikam nu Diyos?

8U akala moy beman ay awan kamon ti pagkukulang sakay mágkayaman kamon! Hare kamon bál maske awan mikam tinulungan! Nakwa ay nagin hare kamon ngane tánni magin hari kame be a kaguman moy. 9Dipo tu pangisip ko, hikame a apostol hide u ginimet nu Diyos a pinakamababa tu atanan a tolay. U kapareho me ay u tolay hide a nahatulan dán ti kákkatay, a áelingán nu anghel hide sakay nu tolay hide. 10Kagi nu tolay hide, Awan kame kan ti tukoy dipo u itáttoldu me ay tungkul ni Cristo; pero mágkarunung kam kan dipo ni Cristo! Mágkahina kame kan; pero mágkabegsák kam kan! Sássestiyán kame pero igággalang kam! 11Hanggan ti iye a odas ay magaláp kame, mauwaw, sakay ngahe-ngahe a awan dán ti mesulot; páppasakitan sakay awan kame dálla ti matulu-tulusan.#4:11 Basaán tu Roma 8:35, 2 Corinto 11:23-27. 12Magtarabaho kame para tehhod a makan. Idáddasal me a pagpalaán u magupos nikame ti madukás; táttiisán me ni sássestiyán di kame.#4:12 Basaán tu Gimet 18:3, 1 Pedro 3:9. 13Ni mámmetmetán di kame ay tábbegán me hide tu makasaya hide a pággupos. Hanggan nadid ay kumán kame padi a madangát a sagad, a pinakamababa tu atanan a tolay ti munduwáy.

14Awan ko iye insulat para ipasanike kam, nan para payuwan takam bilang anak ko hide a pinakamamahal. 15Maskin magkahod kam ti sapulo a libo a tagapagtoldu tu kákkabiyag moy bilang Kristiyano, ay eessa padi u meturing a ama moy tu pánnampalataya. Hikán itod dipo hikán u nakasanigan moy tu Maganda a Baheta tungkul ni Cristo Jesus. 16Kaya mákkekakagbiyák nikam a umaheg kam nikán. 17Dipo he, kaya ko a pinaangay hina ti Timoteo, u pinakamamahal ko sakay tapat a anak tu Panginoon. Siya u mángpaala-ala nikam tu tama a kákkabiyag a sássunudán ko nadid a nákpagkaessaák dán ni Cristo Jesus. Ina hide u itáttoldu ko tu bawat mánnampalataya tu atanan a lugar. #4:17 Basaán tu 1 Corinto 16:10, Gimet 16:1, 1 Corinto 7:17.

18U sangan nikam ay magmadakál dán dipo u akala de ay awanák dán hina angay. 19Pero ni kaluuban nu Panginoon, ay angayák hina ti mas maaga, sakay ilingán ku pay ni ánya ipagmadakál diye, ni iye ay upos dila oni tatahoden a hod nide u kapangyariyan nu Diyos. 20Dipo u tolay a paghariyan nu Diyos ay ketan u kapangyariyan nu Diyos tu gimet na sakay bakán la a tu pággupos na. 21Ánya u gusto moy: angayák hina a págngállan takam, oni angayák hina a ipeta u págmahal sakay kabaitan ko nikam?#4:21 Basaán tu 2 Corinto 1:23.

Currently Selected:

1 Corinto 4: MBJC

Highlight

Copy