1 Corinto 3

U Tagapagserbi hide nu Diyos

1Nadid, kákkapatkákka, awan takam makauhon konna tu gággimitán ko tu tolay hide a katoy nide u Banal a Ispirito. Kailangan a kauhunán takam bilang tolay a mabiyag palla ayun tu kagustuwan nu bággi, sakay anak palla ti pánnampalataya ni Cristo.#3:1 Basaán tu Roma 7:14, Hebreo 5:13. 2U itoldu ko nikam ay nebagay tu bigu hide a mánnampalataya dipo awan moy palla kaya a maintendiyan u toldu hide a mangpabegsák tu pánnampalataya moy. Pero maski nadid ay awan moy palla kaya. Kumán a gatas u inyatád ko nikam, bakán a maigát a makan, dipo awan moy palla iye kaya. #3:2 Basaán tu Hebreo 5:12-13, 1 Pedro 2:2. 3Dipo maghare palla nikam u kagustuwan nu bággi. Tehhod palla a iyamutan sakay dimaan. Ina u mangpatunay a makamundu kam palla sakay mabiyag ayun tu kagustuwan nu bággi. 4Ni kagiyán nu essa, “Sakupák ni Pablo,” sakay kagiyán be nu agum, “Sakupák ni Apolos,” awan beman ina u patunay a mabiyag kam palla ayun tu kagustuwan nu bággi?#3:4 Basaán tu 1 Corinto 1:12.

5Deya beman ti Apolos? Deyaák beman? Tagapagserbi kami la nu Diyos, ginamit nala tánni maakit kam a manalig ni Cristo. Gággimitán la nu balang essa u tarabaho a tinanggap na tu Panginoon.#3:5 Basaán tu 2 Corinto 6:4, Efeso 3:7, Colosas 1:25. 6Konna he u halimbawa nu tarabahu me, kumán a hikán u nagmula, ti Apolos u nagdilig, pero u Diyos u nagpatubu sakay nagpalagu.#3:6 Basaán tu Gimet 18:4-11, 24-27, 1 Corinto 1:12. 7Bakán a u nagmula oni u nagdilig u mahalaga, nan u Diyos a nangpatubu sakay nágpalagu. 8U mágmula sakay u mágdilig ay pareho la a mágtarabaho sakay balang essa ay tumanggap ti gantimpala ayun tu pagud na. 9Dipo pareho kami la ay ti Apolos a mágtarabaho para tu Diyos, sakay hikam u kumán a araduwan sakay hikam u kumán a bilay a ipataknág nu Diyos.#3:9 Basaán tu Isaias 61:3, Efeso 2:20-22, 1 Pedro 2:5. 10Ayun tu kabaitan nu Diyos nikán, hikán u nagdátton tu pundasyon, konna tu essa a malalake a mágpataknág. Sakay u agum be u mángtapos tu bilay. Pero magin maingat u balang essa a mángtapos tu bilay, 11dipo awan dán ti agum a pundasyon a maare a idátton maliban tu nedátton dán, awan ti agum nan ti Jesu-Cristo.#3:11 Basaán tu Efeso 2:20. 12-13Balang essa a mánnampalataya ay kailangan de a magin maingat dipo dumemát u aldew nu pághatul a atanan nu gimet de ay mapurbaan tu apoy. Ti aldiwan itod ay masubukan u ginimet nu balang essa ni te pinagserbiyan oni awan: U tolay a naggimet ti tama, kumán a intulos na u pággimet ti bilay a gimet ti ginto, pilak, sakay mágkahalaga a bito, dipo awan iye hide matutod. Pero u tolay a maggimet ti madukás ay kumán a intulos na u págtolnák ti bilay a gimet ti kayo, lamon, oni yaut a matutod.#3:12-13 Basaán tu 2 Tesalonica 1:7-10. 14Ni awan natutod u netaknág tu dibbew nu pundasyon ay makatanggap ti gantimpala u nángpataknág hod. 15Pero ni matutod iye ay awan siya ti matanggap a gantimpala; pero maligtas padi siya. Kaya la ay kumán la siya a nakaligtas tu apoy.#3:15 Basaán tu Job 23:10.

16Awan moy beman tukoy a templo kam nu Diyos dipo mágyan nikam u Ispirito na? 17Ni ti deya man u mangsida tu templo nu Diyos ay parusaan na. Dipo banal u templo nu Diyos, hikam i templo wan ina.

18Dyan moy dayaán u sadile moy. Ni tehhod a magakala nikam a malalake siya ayun tu karunungan ni munduwáy ay dapat ibilang na dán u sadile na a awan ti tukoy tánni matukuyan na u karunungan a gábwat tu Diyos.#3:18 Basaán tu Isaias 5:21, 1 Corinto 8:2, Galacia 6:3. 19Dipo u karunungan ti munduwan iye ay awan ti kabuluhan tu pangileng nu Diyos. Konna he u nakasulat tu Kasulatan, “Ekhutan nu Diyos u mágkalalake hide tu kalalakiyan di labe.” 20Sakay kinagi na pa tu Kasulatan, “Tukoy nu Panginoon a awan ti kabuluhan u áisipán nu tolay hide a magakala a mágkalalake hide.”#3:20 Basaán tu Awit 94:11. 21Kaya dyan moy ipagmadakál u deya man. Dipo mebilang a hod nikam u atanan: 22hikán a ti Pablo, Apolos, sakay ti Pedro ay inyatád na para nikam. I munduway, u biyag, u kákkatay, sakay u panahun nadid sakay tu dumemát a panahun, iye a atanan ay neatád nikam para tu kapiyaan moy.#3:22 Basaán tu 1 Corinto 4:6, Roma 8:32. 23Sakay hikam ay para ni Cristo, sakay ti Cristo ay para tu Diyos.

Currently Selected:

1 Corinto 3: MBJC

Highlight

Copy