1 Corinto 5

U Parusa tu Makán Gimitán ti Madukás

1Nakademát nikán u baheta a essa kan nikam u naggimet ti madangát dipo inagum na u kabanga nu ama na. Maski u awan hide makidiyos ay awan di ina magimet.#5:1 Basaán tu Deuteronomio 22:30. 2Sakay hambug kam palla! Dapat masanike kam sakay maglungkut. Paibután moy tu grupo u makán gimitán ti iye! 3Maski awanák hina ay kátnaák labe hina ti ispirito, kaya kumánnák labe a katoy hina. Kaya u maggimet ti ina ay hinatulan ko dán 4tu ngahan nu Panginoon Jesus. Ni mamággipun-ipun kam, kagumanák moy ti ispirito, sakay tu kapangyariyan nu Panginoon tam a ti Jesus, 5iyatád moy ni Satanas i tolayan ina tánni mepahamak u bággi na sakay tán para maligtas u ispirito na tu Aldew nu Pághatul nu Panginoon.

6Dyan kam magmadakál. Awan moy beman tukoy a u madukás a gimet ay kumán a u págpaalsa ti tinapay? Dipo maski ni badit la ay meahes u atanan.#5:6 Basaán tu Galacia 5:9. 7Kanya ibutan moy dán u date a págpaalsa, u kasalanan tánni luminis kam. Tánni mepareho kam tu essa a bigu a namasa a awan ti págpaalsa. U tatahoden ay nalinisan kamon dipo nealay ti Cristo para nikitam. Konna siya tu tupa a iyalay kada aldew nu káttaleb. #5:7 Basaán tu Exodo 12:5. 8Kaya ngane ipagsaya tam iye a Piyesta, pero bakán a tu pamamag-itan nu tinapay a te date a págpaalsa nan tu pamamag-itan nu tinapay a awan ti págpaalsa. U gusto a kagiyán niiye ay adággen tamon u kadukássan tam sakay kahalayan sakay mabiyag kitam ti malinis sakay tapat.#5:8 Basaán tu Exodo 13:7, Deuteronomio 16:3.

9Nagsulaták nikam tu itod a dyan kam mákpággagum tu tolay hide a mangilállake sakay mangibábbey. #5:9 Basaán tu 2 Corinto 6:14. 10Bakán a u gustu ko a kagiyán ay adeyuwan moy u awan hide mánnampalataya a mággagimitán ti madukás, madadámmot, matakaw oni sumamba tu diyos-diyosan. Dipo ni adeyuwan moy u awan hide mánnampalataya ay kailangan moy a lumakad ti munduwan iye pero awan be maare.#5:10 Basaán tu 1 Corinto 10:27. 11U gusto ko a kagiyán a awan moy pákkagumanan ay u makánkagiyán hide a Kristiyano pero mággagimitán labe hide ti madukás, madadámmot, sumamba tu diyos-diyosan, magsesti, máglalasingán, sakay mágtakaw. Dyan kam mamákkan nide.

12-13Sabagay, awanák ti karapatan a humatul tu awan hide Kristiyano; u Diyos u manghatul nide. Awan beman u kapatkákka moy ti pánnampalataya u dapat moy a hatulan? Konna he u kinagi nu Kasulatan, “Ibutan moy tu grupo u mággagimitán ti madukás.”#5:12-13 Basaán tu Deuteronomio 17:7, 1 Corinto 5:2.

Currently Selected:

1 Corinto 5: MBJC

Highlight

Copy