1 Corinto 2
2
U Ipáppangaral ni Pablo
1Kákkapatkákka, nikuna immangayák hina ay inkagi ko nikam u lihim a plano nu Diyos tungkul tu Maganda a Baheta, pero bakán a tu pamamag-itan nu mágkadisalad a pággupos nu tehhod a nagadalan oni mataas a karunungan.#2:1 Basaán tu 1 Corinto 1:17. 2Pero nagdisisyonák a awanák ti ibaheta nikam maliban ni Jesu-Cristo sakay u kákkepako na tu kudus.#2:2 Basaán tu Galacia 6:14, 1 Corinto 1:23. 3Sakay nikuna hedák hina ay tukoy ko a kulang u kakayanan ko para magtoldu kanya magkábba-kábbaák sakay magpapágpággák ti ánteng a umatubang nikam.#2:3 Basaán tu Gimet 18:1, 6, 12, 1 Corinto 4:10, 2 Corinto 11:30. 4Tu pággupos ko sakay tu págbaheta ko ay awan takam inakit tu pamamag-itan nu mágkaganda hide a pággupos sakay tu karunungan nu tolay, nan tu pamamag-itan nu patunay nu Banal a Ispirito sakay tu kapangyariyan na.#2:4 Basaán tu Roma 15:19, 1 Corinto 4:20. 5Tánni awan meayun u pánniwala moy tu karunungan nu tolay nan tu kapangyariyan nu Diyos.#2:5 Basaán tu 2 Corinto 4:7, 2 Corinto 6:7, 1 Corinto 12:9.
U Karunungan nu Diyos
6Pero tu mágkatatag dán hide tu ispiritwal a kákkabiyag, u itáttoldu me ay u karunungan nu Diyos, bakán a karunungan ni munduwan iye oni u tagapamahala hide ti panahunan iye a u kapangyariyan de ay lumipas. 7Pero u ipáppangaral me ay u lihim a karunungan nu Diyos a nelihim tu itod pero intalaga na iye para tu kapuriyan tam, bagu pa a lalangán i munduwáy.#2:7 Basaán tu Roma 8:29-30. 8Essa man tu tagapamahala hide ti panahunáy nadid ay awan ti nakaintendi ti iye a lihim. Dipo ni naintendiyan di iye, ay awan di nakwa inpako tu kudus u Panginoon tam a makapangyariyan. 9Pero konna he u nakasulat tu Kasulatan,
“Awan palla ti tolay a naketa oni nakasaneg,
sakay nakatukoy,
tu bagay hide a inhanda nu Diyos para tu magmahal hide nikuna.”
10Pero inhayag iye nikitam nu Diyos tu pamamag-itan nu Banal a Ispirito. Dipo tukoy nu Banal a Ispirito u atanan a bagay, maskin u madisalad a karunungan nu Diyos. 11Dipo konna be tu tolay, awan ti makatukoy tu áisipán na maliban tu sadile na a ispirito. Konna la bi hod, awan ti makatukoy tu áisipán nu Diyos maliban tu Ispirito nu Diyos. 12Pero bakán a u ispirito nu mundu u tinanggap tam nan u Ispirito nu Diyos, tánni maintendiyan tam u kaluub hide a inyatád na nikitam.#2:12 Basaán tu Roma 8:15.
13Kaya ngane a mangaral kame tu pamamag-itan nu karunungan nu Banal a Ispirito bakán a ayun tu karunungan nu tolay. U ipáppaliwanag me tu páppágyanan hide nu Ispirito nu Diyos ay u tatahoden a Ispiritwal. 14Dipo u tolay a awan u Ispirito nu Diyos nikuna ay umád a tumanggap tu kaluub hide a gábwat tu Ispirito nu Diyos. Para nide, awan iye ti kabuluhan sakay awan de maintendiyan, dipo awan nide u Ispirito nu Diyos a mangdemlag tu isip de.#2:14 Basaán tu 1 Corinto 1:18, Santiagu 3:15. 15U tolay a te Ispirito nu Diyos ay maare na a matukuyan u kahalagaan nu atanan a bagay ni iye ay maganda oni awan pero u tolay a awan nikuna u Ispirito nu Diyos ay awan na matukuyan u tolay a tehhod a Ispirito nu Diyos. 16Konna he u nakasulat tu Kasulatan,
“Deya u makatukoy tu áisipán nu Panginoon? Awan!
Kanya awan be ti makapayo nikuna.”
Pero hikitam a mánnampalataya hide ay tukoy tam u áisipán ni Cristo.#2:16 Basaán tu Isaias 40:13, Roma 11:34.
Currently Selected:
1 Corinto 2: MBJC
Highlight
Share
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
