1 Corinto 1

1Gábwat iye a sulat nikán a ti Pablo a dinulaw ayun tu kaluuban nu Diyos tán magin apostol ni Cristo Jesus. Sakay gábwat be tu kapátkákka tam a ti Sostenes.#1:1 Basaán tu Roma 1:1, Gimet 18:17. 2Iye a sulat ay para tu mánnampalataya hide a katoy ti Corinto a pinili na para magin kao na tu pamamag-itan nu pákpagkaessa ni Cristo Jesus. Kumonna be tu pinile hide tu atanan a lugar a dumulaw tu ngahan nu Panginoon a ti Jesu-Cristo, u Panginoon tam a atanan.#1:2 Basaán tu Gimet 18:1.

3Magkahod kam nakwa ti págpapala sakay kapayapaan a gábwat tu Diyos a Ama tam sakay tu Panginoon a ti Jesu-Cristo.#1:3 Basaán tu Roma 1:7.

U Págpapala hide a Gábwat ni Cristo

4Pirmiyák a magpasalamat tu Diyos dipo tu págpapala a inyatád na nikam tu pamamag-itan ni Cristo Jesus. 5Dipo tu pákpágkaessa moy ni Cristo ay limmagu kam tu atanan a bagay, magin ti paggupos sakay karunungan. 6U patunay a impangaral me tungkol ni Cristo ay malinaw a ketan nikam. 7Kaya awan kam nagkulang tu ányaman a pagpapala a ispirituwal, mentaras maguhay kam tu kássole nu Panginoon tam a ti Jesu-Cristo.#1:7 Basaán tu Roma 1:8. 8Sakay u Diyos u mangpabegsák nikam hanggan tu katapusan, tánni demáttan kam a awan ti kapintasan tu kássole nu Panginoon tam a ti Jesu-Cristo.#1:8 Basaán tu 1 Corinto 5:5, 2 Corinto 1:14. 9Matapat u Diyos a nangdulaw nikam tánni mákpagkaessa tu Anak na a ti Jesu-Cristo a Panginoon tam.#1:9 Basaán tu Roma 8:28, 1 Juan 1:3.

U Págkampe-kampe nu Mánnampalataya hide

10Nadid kákkapatkákka hide, mákkekakagbiyák nikam tu ngahan nu Panginoon tam a ti Jesu-Cristo: mabiyag kam ti maayus a awan mamágdadema magkaessa kam ti isip sakay layunin tánni awan nikam ti pamágkampe-kampe. 11Dipo inbaheta nikán nu kabilay hide ni Cloe a mamágdadema kam hina. 12U gusto ko a kagiyán, tehhod kan a magkagi a, “Tagasunudák ni Pablo.” U kagi be nu essa ay “Tagasunudák ni Apolos.” U kagi be nu agum ay “Tagasunudák ni Pedro,” oni te magkagi pa, “Tagasunudák ni Cristo.”#1:12 Basaán tu Gimet 18:24. 13Bakin? Nahate beman ti Cristo? Nepako beman ti Pablo para nikam? Nabawtismuwan kam beman tu ngahan na?#1:13 Basaán tu Mateo 28:19, Gimet 2:38.

14Magpasalamaták tu Diyos ta awanák ti binawtismuwan nikam maliban di Crispo sakay ti Gayo.#1:14 Basaán tu Gimet 18:8, Roma 16:23. 15Kaya awan ti makapángkagi a nabawtismuwan kam tu ngahan ko. 16(O bál, binawtismuwan ko bál itod u pamilya ni Estefanas. Maliban nide ay awanák dán ti matandaan a binawtismuwan ko.)#1:16 Basaán tu 1 Corinto 16:15. 17Dipo awanák dinulaw ni Cristo para magbawtismo nan para mangaral tu Maganda a Baheta. Impangaral ko ngane iye, pero bakán a tu pamamag-itan nu maganda a pággupos a sigun tu karunungan nu mundu. Dipo ni konna hod u gimitán ko ay makay itod u makaakit tu tolay hide, sakay mebali awan u kákkatay ni Cristo tu kudus.#1:17 Basaán tu Juan 4:2, Gimet 10:48, 1 Corinto 2:1, 14, 13.

Ti Cristo u Kapangyariyan sakay Karunungan nu Diyos

18U adal tungkul tu kákkatay ni Cristo tu kudus ay awan de atádden ti kabuluhan nu tolay hide a mepahamak, pero nikitam a naligtas dán ay iye u kapangyariyan nu Diyos. 19Dipo nesulat, “Sidaán ko u karunungan nu mágkarunung hide, sakay gimitán ko a awan ti kabuluhan u katalinuwan nu mágkalalake hide.”#1:19 Basaán tu Isaias 29:14. 20Nadid, anya u lamang nu mágkalalake hide a tolay, u maisto hide nu Kautusan, u mágkalalake a magdibate ti panahunáy nadid? Awan! Impeta nu Diyos a u karunungan ti munduwáy ay awan ti pinagseserbiyan.

21Sigun tu karunungan nu Diyos, ay awan na impahintulut a matukuyan siya nu tolay tu pamamag-itan nu karunungan ni munduwan iye. Nan, inligtas na u manalig hide nikuna tu pamamag-itan nu Maganda a Baheta a ipáppangaral me a tu pangileng nu agum ay awan ti kabuluhan. 22U Judio hide ay makántanungán ti himala bilang katunayan. Sakay u áehyukán nu Griego hide ay karunungan. 23Pero u ipáppangaral me ay ti Cristo a nepako tu kudus a essa a kesángdulan nu Judio hide, sakay para tu Hentil hide ay awan kan iye ti kabuluhan.#1:23 Basaán tu 1 Corinto 2:2, Galacia 3:1, Corinto 5:11. 24Pero tu dinulaw hide nu Diyos, Judio man oni Griego, ti Cristo u kapangyariyan sakay karunungan nu Diyos. 25Dipo u akala de a kamangmangan nu Diyos ay karunungan a mas nan tu atanan a karunungan nu tolay, sakay u akala de a kahinaan nu Diyos ay begsák a mas tu atanan a begsák nu tolay.

26Kákkapatkákka hide, isipán moy u kalagayan moy nikuna dulawán kam nu Diyos. Sasangan la nikam u makagi a mágkalalake, tehhod a kapangyariyan sakay mayaman a tolay. 27Pero pinile nu Diyos u nebilang hide a awan ti tukoy a tolay ti munduwáy para ipasanike u mágkalalake. Pinile be nu Diyos u mágkahina hide para ipatagama u mágkabegsák.#1:27 Basaán tu Santiagu 2:5. 28Pinile nu Diyos u neturing hide nu mundu a mababa a tolay, awan ti halaga, sakay awan ti kabuluhan ti munduwáy tánni ipeta nu Diyos a u inturing a mahalaga nu tolay he hide ti munduway ay inturing nu Diyos a awan ti seserbi.#1:28 Basaán tu Roma 4:17. 29Kaya awan ti tolay a maare a magmadakál tu atubang nu Diyos.#1:29 Basaán tu Efeso 2:9. 30Siya u naggábwatan nu biyag moy nadid dipo tu pákpagkaessa moy ni Cristo Jesus. Nikuna tam a natukuyan u karunungan nu Diyos dipo nikuna sakay tu ginimet na tu kudus ay inturing kitam nu Diyos a matuwid, dipo pinatawad na dán u kasalanan tam. Imbilang kitam nu Diyos a banal sakay pinalaya na kitam gábwat tu kasalanan sakay inligtas na kitam. 31Kaya ngane, konna tu nakasulat tu Kasulatan, “U Panginoon u dapat a ipagmadakál nu masoh a magmadakál.”#1:31 Basaán tu Jeremias 9:24.

Currently Selected:

1 Corinto 1: MBJC

Highlight

Copy