Eks 21
21
Imithetho yokuphatha izigqili
1Yilimithetho ozakuyimisa phambi kwabantu.#Dute 15:12–18 2Uba uthenga isigqili esingumHeberu, sizakukusebenzela iminyaka eyisithupha; sizakukhululeka ngesihle ngomnyaka wesikhombisa.#Levi 25:39–46 3Uba sifika kuwe sisodwa, sizaphuma sisodwa; uba sithethe, umkaso uzaphuma laso. 4Uba inkosi yaso isinika umfazi, asizalele amadodana lamadodakazi, yena labantwana bakhe bazakuba ngabenkosi, isigqili siphume sisodwa. 5Kodwa uba isigqili sisitsho isibili ukuthi: Ngiyayithanda inkosi yami lomkami labantwana bami, kangiyikuphuma ngikhululekile; 6inkosi yaso izakusiletha kuNkulunkulu, isimise emnyango loba ensikeni yomnyango, ibhoboze indlebe yaso ngosungulo, siyisebenzele size sife.
7Uba umuntu ethengisa indodakazi yakhe ukuba ibe yisigqilikazi, kayiyikuphuma njengalokhu izigqili ziphuma. 8Uba isigqilikazi singayithokozisi inkosi yaso ezithathele sona, izakuvuma ukuba sihlengwe; inkosi yaso kayizukuba lamandla okusithengisa kwabezizwe njengokuba isikhohlisile. 9Uba isithathela indodana yayo, izakusiphatha njengendodakazi yayo. 10Uba ithatha omunye umfazi, kayiyikusincitsha ukudla kwaso lengubo zaso lamalungelo omtshado. 11Uba ingasenzeli lezizinto ezintathu, sizaphuma sikhululekile ngesihle.
Imithetho emayelana labalimazayo lababulalayo
12Otshaya umuntu aze afe, uzakubulawa.#Levi 24:17 13Kodwa uba ebengamcathamelanga, kodwa wanikelwa esandleni sakhe nguNkulunkulu, ngizakukukhethela indawo ukuba abalekele kuyo.#Nani 35:10–34; Dute 19:1–13; Josh 20:1–9 14Kodwa uba umuntu esukela umakhelwana wakhe ambulale ngobuqili, uzakumsusa lakulo ialtare lami ukuba abulawe.
15Otshaya uyise ingabe unina, uzakubulawa.
16Oweba umuntu, amthengise, loba efunyanwa elaye, uzakubulawa.#Dute 24:7
17Othuka uyise ingabe unina, uzakubulawa.#Levi 20:9; Mat 15:4; Mark 7:10
18Nxa abantu besilwa, omunye atshaye omunye ngelitshe ingabe ngenqindi, angambulali kodwa amlimaze aze alale embhedeni, 19uba elulama atotobe ngodondolo lwakhe, lowo omtshayileyo uzakuyekelwa. Kodwa uzamhlawula isikhathi sokulala kwakhe, amonge aze asile ngokupheleleyo.
20Uba umuntu etshaya isigqili sakhe ingabe isigqilikazi sakhe ngenduku asibulale ngesandla sakhe, uzakujeziswa. 21Kanti nxa siphile usuku lwaba lunye ingabe insuku ezimbili, kayikujeziswa, ngoba siyimpahla yakhe.
22Nxa abantu besilwa, balimaze owesifazana okhulelweyo aze aphumise isisu sakhe, angehlelwa ngenye ingozi, omlimazileyo uzahlawuliswa njengokubiza kwendoda yakhe, ahlawule njengesiqumo sabahluleli. 23Kodwa uba esehlelwa yingozi, ukuphila kakwenanwe ngokuphila, 24ilihlo ngelihlo, izinyo ngezinyo, isandla ngesandla, unyawo ngonyawo,#Levi 24:19, 20; Dute 19:21; Mat 5:38 25ukutshiswa ngokutshiswa, inxeba ngenxeba, umvimvinya ngomvimvinya.
26Uba umuntu etshaya ilihlo lesigqili sakhe ingabe ilihlo lesigqilikazi sakhe alibulale, uzakusikhulula sihambe ngenxa yelihlo laso. 27Uba etshaya izinyo lesigqili ingabe izinyo lesigqilikazi likhumuke, uzakusikhulula sihambe ngenxa yezinyo laso.
Imithetho emayelana lezinkabi ezihlabayo
28Uba inkabi ihlaba owesilisa ingabe owesifazana afe, inkabi izakhandwa ngamatshe, inyama yayo ingadliwa; kodwa umnininkabi uzayekelwa. 29Kodwa uba inkabi ibikade ihlaba langaphambili, lomniniyo azisiwe ngalokhu, kodwa engayilondolozanga yaze yabulala owesilisa ingabe owesifazana, leyonkabi izakhandwa ngamatshe lomniniyo abulawe. 30Uba ehlawuliswa, uzahlawula yonke leyonhlawulo ukuba kuhlengwe ukuphila kwakhe. 31Loba ihlaba indodana ingabe indodakazi, kakwenziwe kuye njengomthetho lo. 32Nxa inkabi ihlaba inceku ingabe incekukazi, umniniyo uzanika inkosi yayo amashekeli esiliva angamatshumi amathathu, inkabi ikhandwe ngamatshe.
33Uba umuntu etshiya umgodi ukhamisile, loba esimba umgodi angawusibekeli, kukhalakathele kuwo inkabi ingabe ubabhemi, 34umninimgodi ulomlandu, amnike umniniyo imali, inkabi efileyo ibe ngeyakhe.
35Uba inkabi yomuntu ihlaba eyomunye ife, inkabi ephilayo izathengiswa, bahlukaniselane imali yayo, bahlukaniselane lenkabi efileyo futhi. 36Kodwa uba kusaziwa ukuthi inkabi ibikade ihlaba langaphambili, umniniyo engayilondolozanga, uzahlawula inkabi ngenkabi, efileyo ibe ngeyakhe.
Currently Selected:
Eks 21: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
