Eks 22
22
Imithetho yempahla eyebiweyo leyenikezwe ukulondolozwa
1Uba umuntu eseba inkabi loba imvu, ayihlabe ingabe ayithengise, uzahlawula inkabi eyodwa ngenkabi ezinhlanu, lemvu eyodwa ngezimvu ezine. Uzakuhlawula; uba engelalutho, uzathengiswa ngenxa yokweba kwakhe.#22:1 Amazwi evesi 4 abolandela amazwi evesi 1
2Uba isela lificwa lifohlela endlini, litshaywe lize life, umninindlu kayikuba lecala legazi. 3Kodwa uba ilanga laseliphumile, uzakuba lecala legazi. 4Uba okwebiweyo kufunyaniswa kuye kusaphila, loba kuyinkabi loba kungubabhemi ingabe kuyimvu, uzahlawula kuphindwe kabili.
5Nxa umuntu edlisa ensimini ingabe esivinini, ayekele inkomo zakhe zingene zidle ensimini ingabe esivinini somunye, uzahlawula ngokuhle kwensimu yakhe lokuhle kwesivini sakhe. 6Uba kuthungelwa umlilo, ulumathe emeveni kuze kutshe lenhlanga zamabele loba amabele angakavunwa loba insimu, othungele umlilo uzahlawula ngakho konke.
7Uba umuntu enikeza umakhelwane wakhe imali loba impahla ukuba ayilondoloze, beseyebiwa endlini yalowomuntu, isela lizahlawula kuphindwe kabili uba lifunyanwa. 8Kodwa uba isela lingafunyanwa, umninindlu uzasondela kuNkulunkulu ukuba kubonwe ukuthi kafakanga yini isandla empahleni yomakhelwane wakhe. 9Ngezindaba zonke zamacala, eyenkabi lekababhemi leyemvu leyezambatho, ingabe eyempahla elahlekileyo umuntu atsho ngayo ukuthi ngeyakhe, indaba yabo bobabili izabekwa phambi kukaNkulunkulu; olahlwa nguNkulunkulu uzahlawula umakhelwane wakhe kuphindwe kabili.
10Uba umuntu enikeza kumakhelwane wakhe ubabhemi loba inkabi loba imvu ingabe imfuyo nje ukuba akulondoloze, besekusifa loba kulimala ingabe kuthunjwe, kungabonwa muntu, 11uzafunga isifungo phambi kwakhe laphambi kweNkosi ukuthi kafakanga isandla empahleni yomakhelwane wakhe; umniniyo uzasamukela isifungo sakhe, angahlawuli lutho. 12Kodwa uba yebiwe kuye, uzamhlawula umniniyo. 13Uba idatshuliwe, kayilethe ibe yibufakazi, angayihlawuli edatshuliweyo. 14Uba umuntu eseboleka ulutho kumakhelwane wakhe, beselulimala loba lusifa umninilo engekho, uzahlawula konke. 15Kodwa uba umninilo ekhona, kayikukuhlawula; uba bekuqatshiwe, imali yokuqatsha kayihlawulwe.
Imithetho emayelana lamanye amacala
16Uba umuntu eyenga intombi engakhombanga, alale layo, uzakuyilobola ibe ngumkakhe.#Dute 22:28, 29 17Uba uyise esala impela ukumnika yona, uzahlawula imali elingana lelobolo lentombi.
18Lingayekeli umthakathi ukuba aphile.#Dute 18:10, 11
19Olala lenyamazana kabulawe.#Levi 18:23; 20:15, 16; Dute 27:21
20Onikela kwabanye onkulunkulu ngaphandle kweNkosi kabhujiswe.#Dute 17:2–7
21Lingamoni umuntu wezizweni, lingamhluphi; ngoba lani lalingabantu bezizweni kwelaseGibithe.#Eks 23:9; Levi 19:33, 34; Dute 24:17, 18; 27:19 22Lingahluphi umfelwakazi lentandane. 23Uba libahlupha, bakhale kimi, ngizakuzwa ukukhala kwabo, 24luvuthe ulaka lwami, ngilibulale empini, omkenu babe ngabafelwakazi labantwana benu babe yizintandane.
25Uba liseboleka umyanga othile ebantwini bami imali, lingamphathi njengomebolekisi, lingathathi inzalo kuye.#Levi 25:35–38; Dute 15:7–11; 23:19, 20 26Uba lithatha ingubo yomakhwelwane wenu ibe yisibambiso, ibuyiseleni kuye lingakatshoni ilanga;#Dute 24:10–13 27ngoba iyiso sodwa isambatho sakhe sokwambathisa umzimba wakhe; uzakulala ngani na? Lapho ekhala kimi, ngizamuzwa, ngoba ngilomusa. 28Lingathuki uNkulunkulu, lingaqalekisi induna yabantu bakini.#Seb 23:5
29Lingaphuzi ukunikela isivuno senu lewayini lenu. Lizakunginika amazibulo emadodaneni enu, 30lenze njalo langezinkabi zenu lezimvu zenu; azahlala lonina insuku eziyisikhombisa; ngosuku lwesificaminwembili linginike wona.
31Lina lizakuba ngabantu abangcwele kimi; ngakhoke lingadli inyama edatshulwe yizilo zeganga, kodwa iphoseni ezinjeni.#Levi 17:15
Currently Selected:
Eks 22: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
