Dute 15
15
Umnyaka wokuyekela imilandu
1Ngasekupheleni kweminyaka yonke eyisikhombisa lizakuyekela imilandu. 2Lizakuyiyekela ngalindlela; lowo lalowomuntu oweboleke omunye uzakumyekela umakhelwana wakhe isikwelede sakhe, angasibizi kowakibo, ngoba ukuyekela kumenyezelwe yiNkosi. 3Lingasibiza kowezizweni; kodwa uba umfowenu elokwakho loba kuyini elizakukuyekela. 4Kodwa kakuyikuba labayanga phakathi kwenu, ngoba iNkosi uNkulunkulu wenu izakulibusisa elizweni elinika lina ukuba libe ngelenu, 5uba lilalela ilizwi leNkosi uNkulunkulu wenu isibili, ligcine kuhle limithetho yonke engililaya yona lamuhla. 6INkosi uNkulunkulu wenu izalibusisa njengokulithembisa kwayo: lizakweboleka izizwe ezinengi, kodwa kaliyikweboleka lutho kuzo; lizakubusa izizwe ezinengi, kodwa zona kaziyikulibusa lina.
7Uba kukhona phakathi kwenu umuntu ongumyanga ongowakini, okhona komunye wemizi yenu elizweni lakini elinika lina iNkosi uNkulunkulu wenu, lingenzi inhliziyo zenu zibe lukhuni, lincitshane,#Levi 25:35 8kodwa mpheni yena, limeboleke njengokuswela kwakhe, loba kuyini. 9Lingali ukumeboleka ulutho ngoba umnyaka wesikhombisa, umnyaka wokuyekela ususeduze; qaphelani ukuba kungabi khona umcabango onje enhliziyweni zenu. Uba lisala ukumeboleka uzakhala eNkosini ngani, libe lesono. 10Kodwake mnikeni ngesihle, inhliziyo yenu ivuma nxa limnika; ngoba ngenxa yalokhu iNkosi uNkulunkulu wenu izakulibusisa kuwo wonke umsebenzi wenu lakukho konke ukwenza kwenu. 11Abayanga kabasoze baphele elizweni. Ngakho ngiyalilaya ngithi: Phanani abantu bakini, abaswelayo labangabayanga abaselizweni lakini.#Mat 26:11; Mark 14:7; Joha 12:8
Ukuphathwa kwezigqili
12Uba owakini, umHeberu loba umHeberukazi, ethengiswa kuwe, uzakukusebenzela iminyaka eyisithupha; ngomnyaka wesikhombisa uzakumkhulula ukuba ahambe.#Levi 25:39–46; Eks 21:1–11 13Lapho umkhulula ukuba ahambe, ungamvumeli ukuhamba engaphathanga lutho; 14muphe ngesihle ezimvini zakho, lokwesibuya sakho, lokwesikhamelo sakho sewayini; umuphe njengalokhu iNkosi uNkulunkulu wakho ekubusisile. 15Uzakhumbula ukuthi lawe wawuyisigqili elizweni laseGibithe, lokuthi iNkosi uNkulunkulu wakho yakuhlenga. Ngalokho ngiyakulaya lamuhla. 16Kodwa uba yena esithi kuwe: Kangiyikusuka kuwe; ngoba ekuthanda labendlu yakho, langoba ehlezi kuhle lawe, 17uzakuthatha usungulo, ubhobozele indlebe yakhe ngalo emnyango, ukuba abe yisigqili sakho kokuphela; wenze njalo lakuso isigqilikazi sakho. 18Kakungabi lukhuni kuwe ukumkhulula ukuba ahambe; ngoba ukusebenzele iminyaka eyisithupha ngengxenye yemali yoqatshiweyo. Ngakho iNkosi uNkulunkulu wakho izakukubusisa kukho konke okwenzayo.
Amazibulo ezinkomo
19Lizakuwehlukanisela iNkosi uNkulunkulu wenu wonke amazibulo amaduna ezinkomo zenu lawezimvu zenu; kaliyikusebenza ngezibulo lezinkomo zenu, futhi kaliyikugunda izibulo lezimvu zenu.#Eks 13:12 20Lizakulidla lina labezindlu zenu phambi kweNkosi uNkulunkulu wenu iminyaka ngeminyaka endaweni iNkosi ezakuyikhetha. 21Kodwa uba izibulo lilesici, loba liqhula, loba liyisiphofu, loba lilasiphi isici, lingalihlabeli iNkosi uNkulunkulu wenu. 22Lingalidla emizini yenu. Abahlambulukileyo labangahlambulukanga bangalidla, njengalokhu kudliwa umziki lempala. 23Kodwake lingadli igazi lalo; lilichithele emhlabathini njengamanzi.#Gen 9:4; Levi 7:26, 27; 17:10–14; 19:26; Dute 12:16, 23
Currently Selected:
Dute 15: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
