Dute 16
16
Imikhosi emithathu emikhulu
1Gcinani inyanga kaAbibi, liyidumise iNkosi, uNkulunkulu wenu, ngokugcina iPhasika, ngoba ngenyanga kaAbibi iNkosi uNkulunkulu wenu yalikhupha eGibithe ebusuku.#Eks 12:1–20; Levi 23:5–8; Nani 28:16–25#Eks 23:14–19 2Lizakuthatha ezimvini zenu loba ezinkomeni zenu, linikele umhlatshelo wePhasika eNkosini uNkulunkulu wenu endaweni iNkosi ezakuyikhetha ukuba idunyiselwe kiyo. 3Lingadli isinkwa esilemvubelo kanye lomhlatshelo wePhasika; insuku eziyisikhombisa lizawudla kanye lesinkwa esingelamvubelo, isinkwa senhlupheko — ngoba laphuma eGibithe ngokuphangisa. — Ngalokhu lizakulukhumbula usuku lokuphuma kwenu eGibithe zonke insuku zokuhamba kwenu. 4Kakungabonwa mvubelo kulo lonke ilizwe lenu insuku eziyisikhombisa; futhi inyama eliyihlaba ngosuku lokuqala kusihlwa kayingalali ubusuku bonke kuze kuse. 5Lingawunikeli umhlatshelo wePhasika emizini yenu elinika yona iNkosi uNkulunkulu wenu, 6kodwa kuphela endaweni iNkosi uNkulunkulu wenu ezakuyikhetha ukuba idunyiselwe kiyo. Nikelani khona umhlatshelo wePhasika ekutshoneni kwelanga, ngesikhathi elaphuma ngaso eGibithe. 7Lizakuwupheka, lilidlele iPhasika endaweni iNkosi uNkulunkulu wenu ezakuyikhetha; ekuseni lizabuyela emathenteni enu. 8Insuku eziyisithupha lizakudla isinkwa esingelamvubelo; ngosuku lwesikhombisa kube lenkonzo yokucina eNkosini uNkulunkulu wenu; lingasebenzi ngalo. 9Kalibobala amaviki aba yisikhombisa, liwabale kusukela esikhathini eliqala ngaso ukuvuna amabele.#Levi 23:15–21; Nani 28:26–31 10Ng’khona lizakuyigcinela iNkosi uNkulunkulu wenu umkhosi wamaviki ngokupha umnikelo wesihle ngezandla zenu, liwunike njengokubusiswa kwenu yiNkosi uNkulunkulu wenu. 11Endaweni iNkosi ezakuyikhetha ukuba lidunyiselwe kiyo lizakuthokoza phambi kwayo lina lamadodana enu lamadodakazi enu, lenceku zenu lencekukazi zenu, lomLevi ohlala emizini yenu, lowezizweni, lentandane, lomfelwakazi, abahlala kini. 12Khumbulani ukuthi laliyizigqili eGibithe, ligcine kuhle lezizimiso.
13Gcinani umkhosi wamadumba insuku eziyisikhombisa, lapho seliqedile ukubhula lokukhama iwayini,#Levi 23:33–36, 39–43; Nani 29:12–38 14lithabe emkhosini lina lamadodana enu lamadodakazi enu, lenceku zenu lencekukazi zenu, lomLevi, lowezizweni, lentandane, lomfelwakazi, abahlala emizini yenu. 15Insuku eziyisikhombisa lizayigcinela iNkosi uNkulunkulu wenu umkhosi endaweni ezayikhetha; ngoba izakulibusisa kuzo zonke izithelo zenu lakuwo wonke umsebenzi wezandla zenu, ukuba lithokoze kakhulu.
16Kathathu ngomnyaka bonke abesilisa benu bazakuza ukuyikhonza iNkosi uNkulunkulu wenu endaweni ezakuyikhetha, ngomkhosi wesinkwa esingelamvubelo, ngomkhosi wamaviki, langomkhosi wamadumba. Kabangezi ukuyidumisa iNkosi bengaphathanga lutho; 17kodwa yilowo lalowo anike ngamandla akhe, lanjengesibusiso iNkosi uNkulunkulu wenu elinike sona.
Abahluleli lomsebenzi wabo
18Lizakukhetha abahluleli lezinduna emizini yonke yezizwe zenu, iNkosi uNkulunkulu wenu elinika yona, ukuba bahlulele abantu ngokwahlulela okulungileyo. 19Lingonakalisi ukulunga, lingabandlululi muntu, lingamukeli umvuzo wokuthengwa, ngoba uphumputhekisa amehlo abahlakaniphileyo, wonakalise indaba yabalungileyo.#Eks 23:6–8; Levi 19:15 20Nxwanelani ukulunga kuphela, ukuba lisile, lithumbe ilizwe elinika lona iNkosi uNkulunkulu wenu.
21Lingagxumeki isigodo sibe yinsika kankulunkulukazi uAshera ngaseceleni kwealtare leNkosi uNkulunkulu wenu elizakulenza;#Eks 34:13 22lingamisi nsika yokukhonzela, ngoba iNkosi uNkulunkulu wenu iyayizonda.#Levi 26:1
Currently Selected:
Dute 16: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
