Kol 3
3
Ukunakana ngokwaphezulu lokubulala inkanuko zasemhlabeni
1Ngakhoke uba livusiwe kanye loKristu, funani okwaphezulu, lapho akhona uKristu ehlezi ngakwesokunene sikaNkulunkulu.#Hubo 110:1 2Nakanani ngokwaphezulu, linganakani ngokwasemhlabeni. 3Ngoba lafa, ukuphila kwenu kufihliwe loKristu kuNkulunkulu. 4Lapho esebonakaliswa uKristu oyikuphila kwethu, lani lizakubonakaliswa kanye laye enkazimulweni. 5Ngakhoke bulalani inkanuko zenu zasemhlabeni, ukuphinga lokungcola, inkanuko ezimbi, ukufisa okubi, lomhawu oyikukhonza izithombe. 6Lezizinto zibanga ulaka lukaNkulunkulu. 7Lalihamba kuzo lani lapho lalisahlezi kuzo. 8Kodwa khathesi lahlani konke lokhu, ulaka, ukuthukuthela, inzondo, ukuhlambaza, lokukhuluma okubi ngomlomo wenu. 9Lingaqambelani amanga, lokhu selimlahlile umuntu omdala lezenzo zakhe,#Efe 4:22 10selambethe omutsha owenziwa kutsha ekwazini ukuze afuze lowo owamenzayo.#Gen 1:26; Efe 4:24 11Lapho kakukho umGriki lomJuda, osokileyo longasokanga, owezizwe lomSikethiya, isigqili lokhululekileyo; kodwa uKristu uyikho konke, ukibo bonke. 12Ngakhoke, njengabakhethiweyo bakaNkulunkulu abangcwele labathandekayo, yambathani ububele lesihawu, lokuzithoba, lobumnene, lokubekezela,#Efe 4:2 13libekezelelane, lithethelelane, uba umuntu elensolo komunye. Njengoba iNkosi yalithethelela, yenzani njalo lina.#Efe 4:32 14Phezu kwakho konke lokhu yambathani uthando oluyisibopho sokuzwana okupheleleyo. 15Kakubuse enhliziyweni zenu ukuthula kukaKristu, elabizelwa kukho emzimbeni munye; futhi wobani ngababongayo. 16Ilizwi likaKristu kalihlale phakathi kwenu ngokupheleleyo. Fundisanani lilayane ngokuhlakanipha konke. Hlabelelani amahubo lezihlabelo lengoma zokomoya, libonge uNkulunkulu enhliziyweni zenu.#Efe 5:19–20 17Konke elikwenzayo, loba kungelizwi loba kungezenzo, kwenzeni konke ebizweni leNkosi uJesu, libonge uNkulunkulu uYise ngaye.
Ukuphathana kwabomuzi
18Bafazi, zehliseleni ngaphansi kwamadoda enu njengokufanele iNkosi.#Efe 5:22; 1 Pet 3:1 19Madoda, thandani omkenu, lingabi lolunya kibo.#Efe 5:25; 1 Pet 3:7 20Bantwana, lalelani abazali benu ezintweni zonke, ngoba lokhu kuyayithokozisa iNkosi.#Efe 6:1 21Bobaba, lingabathukuthelisi abantwana benu ukuba bangadani.#Efe 6:4 22Zigqili, lalelani ezintweni zonke labo abangamakhosi enu emhlabeni, kungesikho ngokubamba amehlo njengabathokozisa abantu, kodwa ngobuqotho benhliziyo, liyesabe iNkosi.#Efe 6:5–8 23Konke elikwenzayo kwenzeni ngenhliziyo kungathi likwenzela iNkosi, atshi abantu, 24lazi ukuthi lizakwamukela umvuzo welifa eNkosini. UKristu yiyo iNkosi eliyikhonzayo. 25Owenza okubi uzakwamukeliswa okubi akwenzileyo; uNkulunkulu kabandlululi muntu.#Dute 10:17; Efe 6:9
Currently Selected:
Kol 3: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
