1 Kor 2
2
Intshumayelo kaPawuli eKorinte
1Lami, bazalwane, ekufikeni kwami kini kangifikanga ngobugabazi bokukhuluma langokuhlakanipha, ngitshumayela iqiniso elifakaziweyo likaNkulunkulu. 2Ngoba ngamisa ukuthi kangizukwazi lutho phakathi kwenu, kuphela uJesu Kristu, lowo owabethelwayo. 3Impela ngangikhona kini ngisebuthakathakeni, lasekwesabeni, lasekuthuthumeleni;#Seb 18:9 4ukukhuluma kwami lokutshumayela kwami kakubanga ngamazwi okuhlakanipha ahugayo, kodwa kwaba ngokubonakalisa kukaMoya lokwamandla, 5ukuze ukukholwa kwenu kungakhelwa phezu kokuhlakanipha kwabantu, kodwa kwakhelwe phezu kwamandla kaNkulunkulu.
6Ukuhlakanipha sikukhuluma phakathi kwabapheleleyo, lanxa kungeyisikho ukuhlakanipha kwalesisikhathi ingabe ukuhlakanipha kwababusi balesisikhathi, abazakubhubha. 7Kodwa sikhuluma ukuhlakanipha kukaNkulunkulu okufihlakeleyo, icebo lakhe eliyimfihlakalo, alimisela thina ngaphambi kokudatshulwa komhlaba libe yinkazimulo yethu. 8Kakho loyedwa owababusi balesisikhathi okwaziyo lokhukuhlakanipha; ngoba uba babekwazile, babengayikuyibethela iNkosi yenkazimulo. 9Kodwa kunjengoba kulotshiwe ukuthi:
Lokho ilihlo elingakubonanga, lendlebe engakuzwanga,
okunganakanwanga yingqondo yomuntu,
uNkulunkulu ukulungisele abamthandayo.#Isa 64:4
10UNkulunkulu usambulele thina lokhu ngoMoya. Ngoba uMoya uhlolisisa konke, yebo, lezinto ezizikileyo zikaNkulunkulu. 11Ngubani ebantwini owazi imicabango yomuntu, ngaphandle komoya womuntu okuye na? Ngokunjalo okukaNkulunkulu kakwaziwa muntu, kuphela uMoya kaNkulunkulu. 12Thina kasemukelanga umoya womhlaba kodwa semukele umoya ovela kuNkulunkulu, ukuze sikwazi esikuphiwa ngesihle nguNkulunkulu. 13Kuyilezizinto esikhuluma ngazo, kungesikho ngamazwi esawafundiswa yikuhlakanipha kwabantu kodwa ngamazwi esawafundiswa nguMoya, sichasisa okomoya ngokomoya.
14Umuntu wemvelo kazamukeli izinto zikaMoya kaNkulunkulu, ngoba ziyibuthutha kuye; kalawo amandla okuziqedisisa, ngoba ziqedisiswa ngokuboniswa nguMoya. 15Umuntu womoya uyahlola zonke izinto, kodwa yena kahlolwa muntu. 16Ngoba ngubani owake wayazi ingqondo yeNkosi ukuze ayifundise iNkosi na? Kodwa thina silengqondo kaKristu.#Isa 40:13
Currently Selected:
1 Kor 2: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
