1 Kor 3
3
Indlela yokulandela abafundisi
1Lamike, bazalwane, bengingelakukhuluma lani njengabakomoya kodwa njengabakwabantu, njengabayizingane kuKristu. 2Ngalondla ngochago, kangilondlanga ngokudla okuqinileyo, ngoba belingakaqini. Lakhathesi kalikaqini,#Heb 5:12, 13 3ngoba liseyibo abomhlaba. Nxa kusekhona umhawu lokuphikisana phakathi kwenu, kalisibo abomhlaba na? Kalihambisi okwabantu na? 4Ngoba nxa omunye esithi: Mina ngingokaPawuli; lomunye athi: Mina ngingokaApolosi; kalisibo abomhlaba na?#1 Kor 1:12 5Kanti uApolosi uyini, loPawuli uyini na? Bayizisebenzi elakholwa ngazo; kwaba yilowo lalowo njengokunikwa kwakhe yiNkosi. 6Mina ngahlanyela, uApolosi wathelela, kodwa kunguNkulunkulu owakhulisayo.#Seb 18:4–11, 24–28 7Ngakhoke ohlanyelayo kasilutho, lothelelayo kasilutho, kodwa kuphela uNkulunkulu okhulisayo. 8Ohlanyelayo lothelelayo bayalingana, kodwa ilowo lalowo uzakwamukeliswa umvuzo wakhe ngokusebenza kwakhe. 9Thina siyizisebenzi kanye loNkulunkulu; lina liyinsimu kaNkulunkulu, liyisakhiwo sikaNkulunkulu.
Ukwakhela phezu kwesisekelo esiqotho
10Ngomusa kaNkulunkulu engiwuphiweyo, njengomakhi omkhulu ohlakaniphileyo ngabeka isisekelo, omunye wakhela phezu kwaso. Ngakho kakube yilowo lalowo aqaphelise ukuthi wakhela kanjani phezu kwaso. 11Ngoba esinye isisekelo singebekwe muntu, kuphela leso esibekiweyo, esinguJesu Kristu. 12Kodwa uba umuntu esakhela phezu kwalesisisekelo ngegolide, langesiliva, langamatshe aligugu, langezigodo, langotshani, langenhlanga, 13umsebenzi walowo lalowomuntu uzakuvela obala; usuku lokuthonisisa luzakuwudalula, ngoba luzavela lomlilo; umlilo uzakuhlola umsebenzi walowo lalowomuntu ukuba unjani. 14Uba umsebenzi womuntu awakhileyo usima, uzakwamukeliswa umvuzo. 15Kodwa uba umsebenzi womuntu usitsha, uzakulahlekelwa ngumvuzo, loba yena uqobo ezakuphepha, kodwa kube kungathi uphuma emlilweni. 16Kalazi yini ukuthi lina lilithempeli likaNkulunkulu, lokuthi uMoya kaNkulunkulu uhlala kini na?#1 Kor 6:19; 2 Kor 6:16 17Uba umuntu echitha ithempeli likaNkulunkulu, uNkulunkulu uzakumchitha yena, ngoba ithempeli likaNkulunkulu lingcwele; liyiloke lina.
18Kakungabi khona ozikhohlisayo; uba umuntu phakathi kwenu ecabanga ukuthi uhlakaniphile ezintweni zalesisikhathi kabe yisithutha, ukuze ahlakaniphe. 19Ngoba ukuhlakanipha komhlaba kuyibuthutha kuNkulunkulu. Kulotshiwe ukuthi: Ubamba abahlakaniphileyo ebuqilini babo;#Jobe 5:13 20lokuthi: INkosi iyayazi imicabango yabahlakaniphileyo ukuthi iyize.#Hubo 94:11
21Ngakhoke kakungabi khona ozincoma ngabantu; ngoba zonke izinto zingezenu, 22loba kunguPawuli, loba kunguApolosi, loba kunguKefasi, loba kungumhlaba, loba kuyikusila, loba kuyikufa, loba kuyizinto ezikhona, loba kuyizinto ezingakabi khona; konke kungokwenu; 23kodwa linake lingabakaKristu, loKristu ungokaNkulunkulu.
Currently Selected:
1 Kor 3: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
