1 Kor 1
1
Isibingelelo
1Mina Pawuli, obizwe ngentando kaNkulunkulu ukuba ngumphostoli kaJesu Kristu kanye lomzalwane uSostenesi, 2sithi kulo ibandla likaNkulunkulu eliseKorinte, kubo abahlukaniselwe kuKristu Jesu, ababizelwe ukuba ngabangcwele, kanye labo bonke abakhuleka ebizweni leNkosi yethu uJesu Kristu endaweni zonke, iNkosi yabo leyethu:#Seb 18:1 3Kakube kini umusa lokuthula okuvela kuNkulunkulu uBaba laseNkosini uJesu Kristu.
4Ngiyambonga uNkulunkulu ngesikhathi sonke ngani ngenxa yomusa kaNkulunkulu eliwuphiweyo kuKristu Jesu, 5ukuthi ezintweni zonke linothisiwe kuye, ekukhulumeni konke lekwazini konke, 6njengalokhu ubufakazi ngoKristu buqinisiwe kini. 7Ngakho kalisileli lasinye isiphiwo somusa, lisalindele ukwambulwa kweNkosi yethu uJesu Kristu, 8yena ozakuliqinisa kuze kube sekupheleni, lingabi lacala ngosuku lweNkosi yethu uJesu Kristu. 9UNkulunkulu uthembekile, owalibizela ekuhlanganyeleni leNdodana yakhe, uJesu Kristu iNkosi yethu.
Ukuphikisana ebandleni laseKorinte
10Ngiyalincenga, bazalwane, ngebizo leNkosi yethu uJesu Kristu, ukuthi lonke likhulume ilizwi libe linye, kungabi khona ukwahlukana phakathi kwenu, kodwa lipheleliswe emqondweni munye lasekuboneni kunye. 11Ngoba ngitsheliwe ngabantu bakoKlowe ukuthi kukhona ukuxabana phakathi kwenu, bazalwane bami. 12Ngitsho lokhu kokuthi ilowo lalowo wenu uthi: Mina ngingokaPawuli; mina ngingokaApolosi; mina ngingokaKefasi; mina ngingokaKristu.#Seb 18:24 13UKristu wahlukanisiwe yini? UPawuli wabethelwa ngenxa yenu na? Labhaphathizwa ebizweni likaPawuli na? 14Ngiyambonga uNkulunkulu ngoba kangibhaphathizanga lamunye wenu, kuphela oKrispusi loGayusi,#Seb 18:8; 19:29; Roma 16:23 15funa kube khona othi labhaphathizwa ebizweni lami. 16Kodwa ngabhaphathiza abendlu kaStefana; ngaphandle kwalabo kangikhumbuli ukuthi ngabhaphathiza omunye.#1 Kor 16:15 17Ngoba uKristu kangithumanga ukuba ngibhaphathize, kodwa ukuba ngitshumayele ivangeli kungesikho ngokuhlakanipha kwamazwi, funa isiphambano sikaKristu senziwe ize.
Ukuhlakanipha kukaNkulunkulu lokomhlaba
18Indaba yesiphambano iyibuthutha kulabo ababhubhayo, kodwa kithi abasiliswayo ingamandla kaNkulunkulu. 19Ngoba kulotshiwe ukuthi:
Ngizakuchitha ukuhlakanipha kwabahlakaniphileyo,
lokuqedisisa kwabaqedisisayo ngizakukwenza ize.#Isa 29:14
20Singaphi isihlakaniphi? Ungaphi umbhali? Ungaphi umphikisi na? Kayisibo balesisikhathi na? UNkulunkulu kakwenzanga kube yibuthutha ukuhlakanipha komhlaba na?#Jobe 12:17; Isa 19:12; 33:18; 44:25 21Ngoba kuthe ekuhlakanipheni kukaNkulunkulu umhlaba kawumazanga uNkulunkulu ngokuhlakanipha, kwaba kuhle kuNkulunkulu ukusilisa abakholwayo ngobuthutha bentshumayelo. 22AbaJuda babiza izibonakaliso, lamaGriki afuna ukuhlakanipha, 23kodwa thina sitshumayela uKristu obethelweyo, okuyisikhubekiso kubaJuda, lobuthutha kwabezizwe, 24kodwa kulabo ababiziweyo, abaJuda lamaGriki, uKristu ungamandla kaNkulunkulu lokuhlakanipha kukaNkulunkulu. 25Ngoba ubuthutha bukaNkulunkulu buhlakaniphile kulokuhlakanipha kwabantu; lobuthakathaka bukaNkulunkulu bulamandla ukwedlula amandla abantu.
26Khangelani ukubizwa kwenu, bazalwane; kini kababanengi abahlakaniphileyo ngokomhlaba, kababanengi abalamandla, kababanengi abayizikhulu; 27kodwa uNkulunkulu ukhethile izinto zobuthutha zomhlaba ukuba ayangise abahlakaniphileyo; uNkulunkulu ukhethile okubuthakathaka komhlaba ukuba ayangise okulamandla; 28lezinto eziphansi zomhlaba lezinto ezidelelekayo uNkulunkulu uzikhethile, lezinto ezingekho ukuba achithe izinto ezikhona, 29ukuze kungabi khona umuntu ozincomayo phambi kukaNkulunkulu. 30NgoNkulunkulu lina likuKristu Jesu, ngoba uNkulunkulu wamenzela thina ukuhlakanipha lokulunga lokwahlukaniselwa lokukhululwa. 31Ngakhoke njengokulotshiweyo: Ozincomayo kazincome eNkosini.#Jer 9:24
Currently Selected:
1 Kor 1: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
