ROMA 10
10
1U kelo' aleng harik, kenep kui lan dahin sebayang kui men Allah, iha' tih ja daha' atih ala urip. 2#HST 22:3; Rom 9:31-32 Akui bara marung daha' atih, daha' nyuto té' Allah, bi daha' em jam. 3Avin daha' em nelana' teneng Allah, kenep daha' pah ngenep na ji na'an teneng men batung daha', nusi' nah daha' nyepida batung daha' té' teneng aleng men Allah. 4#Mat 5:17; Yoh 3:18; Ib 8:13 Avin Kristus nah aleng ka'uh tebara menuna, ja ha'ut-ha'ut la'ung aleng nginah seng en Na' itung teneng.
5 #
Lewi 18:5; Gal 3:12 Avin Musa ngalung marung kelunan aleng na teneng aleng té' alem tebara menuna' atih, kelunan atih seng murip kenan na'. 6#Kel d M 30:12-14 Bi teneng aleng men kinah kuma' nunih, Meng im kuma' alem kenep ka', “Hi kah seng tei ma'un halem Surga?” (aleng aran na' atih seng geri Kristus ngiléh). 7Dahin, “Hi kah aleng seng ngiléh ha' avan patei?” (aleng aran na' atih geri Kristus ma'un men hang kelunan matei). 8#Kel d M 30:14 Bi nun kah aleng dahun na'? “Daho' atih té' té' béh ka', té' alem ba ka' dahin té' alem kenep ka',” iha' tih daho' kinah aleng en alo' bara, 9#2 Kor 4:5 iha' tih, iha' ba ka' meng'i lan Yesus atih Tuhan dahin kenep ka' nginah Allah uh meju Iha' men hang kelunan matei, ika' seng ala urip. 10Avin té' alem kenep tam kelunan nginah, atih aleng geri itam teneng, dahin kenan ba tam itam meng'i, atih nah aleng geri itam ala urip.
11 #
Yes 28:16
Avin uh té' alem surat Tuhan aleng kuma', “Hi-hi aleng nginah té' Iha', nusi' ha' seng ga' ha'éh.” 12#HST 10:34; 15:9 Avin nusi' ha' selepi kelunan Yahudi dahin kelunan Yunani, avin Tuhan Iha' nah Tuhan men itam lim, Iha' pah nyamah kenep té' lim kelunan aleng ngetalau Iha'. 13#Yoel 2:32 Avin “ha'ut-ha'ut kelunan aleng ngetalau aran Tuhan seng ala urip.” 14Bi anih la'an, nuno' tuk daha' ngetalau Iha' alem daha' em payan té' kinah daha' té' Iha', dahin nuno' kah daha' seng nginah té' Iha' iha' daha' em payan kelenghi dengah marung Iha', seng nuno' daha' jam kelenghi marung Iha' awi en té' kelunan aleng nira? 15#Yes 52:7 Nuno' kah daha' deng nira awi ha' em té' daha' aleng nyihu? Awi jam tuk aleng uh kalung. “Kelalau sayu jam daha' aleng nei geri dengah sayu!”
16 #
Yes 53:1
Bi nusi' daha' lim ngioh dengah sayu atih. Iha' kah Yesaya kuma' dih, “U Tuhan, hi kah aleng uh nginah té' dengah en amé' nira?” 17#Yoh 17:20 Avin ha' nunan, tula nah kinah nei avin daha' kelenghi dengah, dengah atih pah nei alem daha' pedengah Kristus.
18 #
NDI 19:5
Bi akui kuma', nusi' payan daha' atih kelenghi iah? Adang uh,
“Dengah daha' hu'uh putat-purat té' ji usun tana anih,
dahin dahun daha' hu'uh ateng ha' lirin usun tana.”
19 #
Kel d M 32:21
Akui meteng, nusi' daha' pahu Israel jam halem na' iah? Adang daha' jam. Iha' kah Musa kuma' una' dih,
“Akui seng na ikam mi'en kenan ji bengsa' aleng em té' aran.
Akui seng na ikam bunget kenan ji bengsa' aleng ngelahdu.”
20 #
Yes 65:1
Uh anan Yesaya pah makang kuma',
“Kelunan aleng em ilau Akui uh pesuk Dahik,
dahin men kelunan aleng em meteng marung Akui, Akui uh nei tula.”
21 #
Yes 65:2
Bi dahun Na' marung daha' Israel, “Pahdau-pahdau Akui uh mejei usu Kui men ji pahu aleng muau Dahuk dahin aleng nyakat.”
Currently Selected:
ROMA 10: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
