ROMA 4
4
Abraham en Allah itung teneng kenan kinah na'
1Nun kah aleng dahun tam marung Abraham, sepun tam? 2Avin awi Abraham en Allah itung teneng avin hadui na', té' kah avan na' melu, bi nusi' ha' melu ha' unan Allah. 3#Ar Kel 15:6; Gal 3:16; Yak 2:23 Iha' kah iha' nunih dahun surat Tuhan dih keta': “Abraham nginah té' Allah, atih nah aleng itung teneng té' iha'”? 4#Mat 20:7,14; Rom 11:6 Men kelunan aleng nyadui, adang té' kah huwa na', nusi' ha' itung ket en daha' uk tua men iha', bi avin ha' huwa na' kah atih. 5Bi men kelunan aleng em nyadui, bi nginah iha' té' Allah aleng mekoh daha' aleng uh muau Iha' men'a jadi' teneng, kinah na' atih aleng itung teneng men iha'. 6#NDI 32:1-2 Nunan pah Daud na ja'bei kelunan aleng en Allah itung teneng nusi' ha' men hadui na'.
7“Sayu lan nah men lim kelunan aleng uh pebet lim sala daha', sala daha' pah uh en Allah havun.
8Sayu lan nah men kelunan aleng em Allah pelemana' sala na' la'an.
ken na' dih pa. 9#Ar Kel 15:6 Nuno, dahun na' na “Sayu lan nah” anan, pega' men kelunan aleng sunat dahin aleng em sunat kah lahuh iah? Itam kuma', kinah Abraham aleng ngavan Allah itung iha' teneng. 10Alem ano' kah kinah atih en itung teneng men iha'? Alem iha' uh sunat iah? Alem iha' em payan sunat iah? Nusi' ha' men'uh iha' uh sunat, bi men em payan iha' sunat. 11#Ar Kel 17:10-11 Sunat atih en na' ala jadi' tada', iha' tih ji tada' aleng bara iha' teneng kenan kinah alem iha' em payan sunat. Avin ha' nunan iha' jadi' taman lim kelunan aleng nginah, lan pah daha' em sunat, ja daha' atih pah en itung teneng lahuh. 12#Mat 3:9; 2 Kor 12:18; 1 Pet 2:21 Té' pah iha' jadi' taman lim kelunan aleng sunat, bi nusi' aleng sunat tua, bi aleng ngioh inah kinah sepun tam Abraham alem iha' em payan sunat.
13 #
Ar Kel 18:18; 22:17-18; Gal 3:29 Nusi' ha' kenan tebara menuna jaji atih en uk men Abraham dahin men sau na' iha' seng nyengayan usun tana anih, té' pah atih avin men teneng na' aleng men kinah na' kah. 14Awi kelunan aleng murip ngioh tebara menuna' atih aleng seng hipun usun tana anih, adang tung-tung tua nah kinah atih, jaji anan pah em té' bang na'. 15#Rom 3:20; 5:13; 7:8,10 Avin tebara menuna' atih geri unget tua anan, bi avan aleng em té' tebara menuna', hinan pah em té' sala lahuh. 16Anan nah tavit na', teneng atih men kinah pa'un na', ja jaji atih tula nei men halam, ja ha' la'ung men lim sau Abraham nusi' ha' men daha' aleng murip alem tebara menuna' tua, bi men kelunan aleng murip kenan kinah kah lahuh, awi kinah na'. Avin iha' aleng taman tam lim-lim, 17#Ar Kel 17:5; Yes 48:13 awi jam tuk aleng hu'uh kalung, “Akui hu'uh na ika' taman kuri-kuri kahum bengsa'.” Jaji atih tageng ha' unan Allah aleng ngavan Abraham nginah, iha' tih Allah aleng pekurip kelunan aleng matei dahin duan ket aleng em payan té' awi jam tuk ket aleng uh té'. 18#Ar Kel 15:5 Lan pah iha' awi em deng nei la'ung ket aleng en Abraham kinah atih bi iha' nginah loh, ateng iha' jadi' taman kuri-kuri kahum bengsa', awi daho' aleng uh kelenghen na' atih dih, aleng kuma', “Nunan kah sau ka' baya.” 19#Ar Kel 17:17 Nusi' kinah na' tei beloh tegu iha' pelemana' batung na' uh em nyatan, avin urip na' uh kio'-kio' matuh duman, nusi' pah iha' kawah kenep na' avin Sara nyalun. 20#Ib 11:7,11,34 Bi avin iha' hituk té' jaji Allah, nusi' ha' kua' kenep na' dahin tei em nginah, bi iha' sa' tu'a kinah na', dahin mahek Allah, 21dahin nginah lelan Allah té' tingan na ket aleng uh en Na' jaji. 22#Ar Kel 15:6 Avin ha' nunan kinah atih “en Allah itung barik teneng men iha'.”
23 #
Rom 15:4
Daho' anih iha' nah, “tuk atih nah en Allah itung teneng men iha'” atih, nusi' ha' kalung men Abraham tua, 24#1 Pet 1:21 bi avin itam kah lahuh. Teneng atih seng en itung men itam lahuh aleng nginah té' Iha' aleng uh meju Yesus Tuhan tam men hang kelunan matei, 25#Yes 53:4-5; 1 Kor 15:17 Iha' aleng uh en Na' uk avin lim sala tam, dahin aleng en Na' ju ngavan Na' itung itam teneng.
Currently Selected:
ROMA 4: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
