ROMA 3
3
Aleng sayu marung daha' Yahudi
1Avin ha' nunan, nuno' daha' Yahudi lalau sayu men'uh kelunan ha' béh, nun kah bang sunat atih? 2#Kel d M 4:7-8; NDI 103:7; 147:19-20; Rom 9:4; 1 Pet 4:11 Kahum kah tuk-tuk na'. Aring na', avin lim dahun Allah uh en Na' uk men daha' atih. 3#Rom 9:6; 11:29; 2 Tim 2:13 Nuno' tuk na' awi daha' balei tei em nginah? Avin daha' em nginah nutih, seng deng anan na Tuhan em teneng iah? 4#NDI 51:6; 116:11 Peletu-letu nusi'. Pulu hangun pah itam kelunan lim pamoh, bi Allah atih teneng, awi jam tuk aleng uh kalung anih,
“Ja Ika' tula teneng alem Dahum,
dahin maneng tegu Ika' en kelunan pesala.”
5Bi awi barik tam aleng em teneng atih seng bara teneng Allah, seng nun kah aleng dahun tam? Allah em teneng atih tegu Iha' menei ukum Na' iah? Barik dahun tam kelunan tua nah aréh, iha' kah dahuk nuréh réh. 6Peletu-letu nusi'. Avin awi ha' nunan, nuno' tuk Allah seng petneng usun tana anih?
7Bi awi teneng Allah atih kelalau tula avin amoh kui, ja mi'at aren Na', na nun pah akui té' alem ukum awi kelunan aleng sala pah ré'? 8#Rom 6:1-2 Na' nun itam em na ji'ek ja sayu nei tula, awi dahun daha' aleng peji'ek kamé' atih? Tekep kah daha' atih ga' ukum pa.
Daha' Yahudi dahin daha' aleng alem adet ha' béh sala lim
9 #
Rom 1:18—2:24
Kerei inih, nuno' kah? Té' kah itam kelunan Yahudi lalau sayu men'uh daha' ha' béh iah? Peletu-letu nusi'. Avin uh tula nah sala kelunan lim, kelunan Yahudi nurei pah kelunan Gerika, lim-lim tam té' hida sala, 10#NDI 4:1-3; 53:2-4 awi aleng uh té' alem surat,
“Ji kelunan pah em té' aleng teneng, lan, ji pah em té',
11ji la'ung pah em té' aleng dapit alem kenep na',
ji la'ung pah em ilau Allah.
12Lim daha' uh nyayang, lim uh piah-piah tei ji'ek;
ji kelunan pah em té' aleng na sayu, lan, ji pah em té'.”
13 #
NDI 5:9; 140:4 “Tengek daha' awi liang aleng neng'eng,
daha' pakei jelan daha' ngavan peluvat.”
“Alem ba daha' té' ivah nyipa'.”
14 #
NDI 10:7
“Ba daha' penu dahin tulah dahin pa'i.”
15 #
Yes 59:7-8
“Tang kudek daha' timah ngenep meso' daha kelunan,
16tasa' dahin tusah té' té' alan daha',
17alan aleng dena' nusi' daha' jam na'.”
18 #
NDI 36:2
“Takut té' Allah nusi té' té' alem kenep daha'.”
19 #
Rom 2:12; Gal 3:22 Itam jam, ket aleng kurin tebara menuna' atih, atih nah en na' bara men daha' aleng hida tebara atih, ja lim-lim ba kelunan pekep, dahin lim-lim huang usun tana seng bara sala daha' ha' unan Allah. 20#NDI 143:2; Rom 7:7; Gal 2:16 Avin kenan ngioh tebara menuna' ji-ji kelunan pah em té' aleng en Allah itung teneng. Avin kenan tebara atih daha' jam marung sala tua.
Teneng Allah nei tula tegu kelunan nginah
21 #
HST 10:43; Rom 1:7 Bi kerei inih teneng Allah atih uh tula nah té' ji alan dep men'uh aleng alem tebara menuna', alan anan pah tebara menuna' uh bara, daha' nabi pah uh bara na' lahuh, 22#Gal 2:16 iha' tih, barik Allah aleng teneng aleng nei kenan kinah té' Yesus Kristus men lim-lim kelunan aleng nginah. Avin nusi' daha' selepi, 23#Rom 3:9,19; 5:12 avin lim-lim daha' uh na sala, dahin em ateng té' aren Allah. 24#Rom 5:1; Ef 2:8 Kenan asi Na' tua Iha' itung daha' teneng, avin Kristus Yesus makau daha'. 25#Lewi 16:12-15; Ef 1:7; Ib 4:16 Iha' nah aleng alan en Allah na ngavan Na' deng muéh lim sala té' daha Na', en daha' ala kenan kinah. Iha' ngenep bara teneng Na', avin alem aru kenep Na' Iha' kelung sala kelunan menuna'. 26Lan, Iha' ngenep bara teneng Na' kerei inih, ja batung Na' dep tula teneng, hi-hi aleng nginah té' Yesus pah lahuh en Na' itung teneng nah daha' lahuh.
27 #
1 Kor 1:29,31 Avin ha' nunan, nun pa'un ngavan ta' nei bau kenep atih? Nusi' té'! Nun pa'un na'? Men hadui iah? Nusi', bi marung kinah keta'? 28#Gal 2:16 Avin anan nah kamé' kuma' Allah itung kelunan teneng avin kinah, nusi' avin iha' ngioh tebara menuna' atih.
29 #
Rom 10:12
Allah kelunan Yahudi dep Allah tih du? Nusi' Iha' Allah daha' kelunan aleng bengsa' ha' béh lahuh iah? Adang, Iha' Allah men kelunan hi-hi aleng bengsa' ha' béh lahuh, 30#Rom 4:11-12; Gal 3:20 avin Allah atih ji tua. Daha' aleng sunat atih en Na' itung teneng avin daha' uh nginah, dahin kelunan aleng em sunat atih pah lahuh en Na' itung teneng avin daha' uh nginah lahuh. 31#Mat 5:17; Rom 4:3; 8:4 Avin ha' nutih, en tam uau nah tebara menuna' atih avin kinah iah? Peletu-letu nusi'. Bi sa' en tam nageng keta'?
Currently Selected:
ROMA 3: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
