ROMA 15
15
Katuk ngioh katah Kristus aleng peji dahin kelunan aleng lema kinah
1Itam aleng tu'a, tekep tam tuboh lema daha' aleng em tu'a, meng tam seng pelemana' una' kenep tam dep. 2#1 Kor 9:19; 10:24,33 Sayu nah ha'ut-ha'ut tam masi kenep daha' aleng ha' béh ngavan daha' nei sayu, dahin nageng kinah daha'. 3#NDI 69:10 Avin Kristus pah, nusi' Ha' ngioh kenep Na' dep, bi awi jam tuk aleng alem surat, “Lim tuten ngavan daha' nuten ika' hu'uh mepuk té' Akui.” 4#Rom 4:23-24; 1 Kor 10:11 Avin ket nun-nun aleng hu'uh kalung menuna' hu'uh kalung ja katuk itam, ja kenan aru kenep dahin halau aleng nei men surat Tuhan itam deng nginah. 5#Fil 3:16 Sayu nah Allah aleng pa'un aru kenep dahin halau atih na ikam piah kenep ji la'ung dahin ji la'ung, ngioh katah Yesus Kristus, 6ja dahin ji kenep dahin ji daho' kam ikam mahek Allah, Iha' tih Taman Tuhan tam Yesus Kristus.
7Avin atih sayu nah ikam ala ji dahin ji awi jam tuk Kristus hu'uh ala itam, ngavan aren Allah pi'at. 8#Mat 15:24; HST 3:25 Anih nah dahuk: Kristus uh jadi' panyin daha' aleng gem adet sunat ja Iha' bara barik Allah aleng teneng, ja Iha' pela'ung jaji men sepun tam menuna', 9#2 Sam 22:50; NDI 18:50; Rom 11:30 ja daha' bengsa' aleng ha' béh pah deng mahek Allah avin asi Na', awi aleng uh alem kalung.
“Avin atih akui ngenep mahek Ika' té' hang kelunan aleng bengsa' ha' béh,
dahin nyanyi mahek aran Ka'.”
10 #
Kel d M 32:43
Ji pah la'an dahun na',
“Petenglu nah dahin daha' kelunan Na', u ikam aleng bengsa' ha' béh.”
11 #
NDI 117:1
Té' pah la'an,
“Hek nah Tuhan, u ikam aleng bengsa' ha' béh,
sayu nah lim-lim kelunan mahek Iha'.”
12 #
Yes 11:10; K Tula 5:5 Dahun nabi Yesaya kuma',
“Ji ledung aleng men pakat Isai atih seng nei nyemau,
Iha' aleng seng nei peju seng tuboh kelunan aleng bengsa' ha' béh,
té' Iha' nah daha' bengsa' ha' béh atih seng nginah lahuh.”
13Sayu nah Allah aleng pa'un kinah atih, ngepnu ikam lim té' lu dahin dena' té' alem kam nginah, ja ikam sa' nei nyungei té' alem kinah kam atih, alem tingan Belua' Ma'ang.
Dahun Paulus marung batung na' dep
14Akui jam alem kenep kui marung kelo', u kelo' harik lim-lim, ikam uh penu té' ket aleng sayu, dahin penu té' lim-lim ket aleng sayu, dahin penu té' lim-lim na'an hituk, jam pah kelo' pekatuk ji la'ung dahin ji la'ung. 15#Rom 1:5; 12:3 Bi marung balei tuk-tuk anih akui uh makang na surat men ikam seng ngenep pehituk ikam la'an, avin asi en Allah nei men akui 16#Rom 11:13; Fil 2:17 ngavak mejei Yesus Kristus men kelunan aleng bengsa' ha' béh. Akui manau dengah sayu Allah atih ja kelunan aleng bengsa' ha' béh aleng ek uk men Iha' deng tei té' kenep Na' avin daha' uh telesen kenan Belua' Ma'ang.
17Avin atih, halem Kristus Yesus akui melu tavit hadui kui men Allah. 18#2 Kor 3:5 Nusi' kui makang nengaran nun-nun pah, bi marung ket ngavan Kristus nyadui men alem kui dep kah, ngavan daha' aleng bengsa' ha' béh atih nei ngioh. Iha' uh nyadui alem daho' dahin alem hadui, 19#Mk 16:17 alem tingan tada' dahin hadui ngavan daha' ngeniheng, dahin alem tingan Belua' Ma'ang. Nunan nah akui hu'uh pedengah lim dengah sayu marung Kristus men daléh Yerusalem dahin teliling na' ateng ha' Ilirikum pah. 20#2 Kor 10:15-16 Lan, kenep kui seng ngenep mutat dengah sayu ha' ngavan aran Kristus atih em payan té', ja meng akui na uma té' ujung jihé' aleng uh en daha' ha' béh tegreng. 21#Yes 52:15 Awi jam tuk aleng uh kalung.
“Kelunan aleng em payan jam dengah Na' seng nyineng,
dahin kelunan aleng em payan kelenghi atih seng nei jam halem na'.”
Kenep sihu Tuhan marung anau na'
22 #
Rom 1:10-13
Atih nah tavit na' kuri-kuri hangun akui uh sa'eng tegu kui ngenep nei ateng ha' ikam. 23Bi kerei inih avin akui em té' avak la'an té' alem lim daléh anih, té' pah avin kuri-kuri duman dara kui hu'uh ngenep nei ateng ha' ikam, 24#1 Kor 16:6 akui nginah seng jam kelo' tegu kui tei ha' Spanyol. Akui nginah alem anau kui akui seng ngeta' ha' ikam. Hu'uh nah akui lema kenep uk dahin kelo', akui nginah ikam seng mekoh akui tei dahin sayu kenep kelo' men inan 25#HST 19:21; 20:22 Bi kerei inih akui tei ha' Yerusalem ngenep masi daha' anak Tuhan 26#1 Kor 16:1-4; 2 Kor 8:1; 9:2,12 Avin daha' Makedonia dahin Akhaya hu'uh piah kenep té' ji ket aleng hu'uh daha' peng aleng en daha' nei men daha' anak Tuhan aleng humé' ha' daléh Yerusalem. 27#Rom 9:4; 1 Kor 9:11 Lan, kenep daha' kaséh na hadui atih, daha' awi uh té' utang dahin daha' Israel lahuh. Avin uh peji nah daha' bengsa' ha' béh atih daven alem Belua' dahin daha' Yahudi, tekep kah daha' masi daha' marung ket usun tana anih lahuh. 28Tegu kui hu'uh pek'uh lim daho' atih, dahin ma'uk bua daha' atih men daha', akui seng tei ha' Spanyol seng nyangei ha' ikam. 29#Rom 1:11 Akui jam, tegu akui ateng ha' ikam, akui seng ateng dahin penu té' asi Kristus.
30 #
2 Kor 1:11; Fil 1:27; Kol 4:3; 2 Tes 3:1 U kelo' harik, akui akei ikam avin Tuhan tam Yesus Kristus, dahin avin halam Belua' Ma'ang, sayu ikam nengayet lelan dahik alem sebayang kam té' Allah men akui, 31ja Iha' tuboh akui té' hang daha' aleng muau ha' daléh Yudea, té' pah ja hadui kui men daha' ha' Yerusalem tei té' kenep daha' aleng anak Tuhan hitih lahuh, 32ja akui deng ateng ha' ikam alem kenep Allah dahin sayu kenep, dahin ngepanah kenep kui dahin kam. 33Sayu nah Allah aleng pa'un dena atih té' dahin kam lim. Amin.
Currently Selected:
ROMA 15: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
