ROMA 16
16
Marung tuk Febe, Paulus kato' tabi'
1Akui bara ikam marung Febe, harin tam aleng doh, aleng masi alem sidang ha' Kengkrea lahuh. 2Ala nah iha' alem Tuhan, awi jam tuk aleng tekep men kelunan aleng anak Tuhan, dahin masi iha' té' alem nun-nun ket aleng tekep kam masi iha', avin iha' lahuh hu'uh masi kuri-kuri kelunan dahin masi batung kui pah lahuh.
3 #
HST 18:2,18,26 Uk nah tabi' men Priska dahin Akwila, bakéh-bakéh kui té' alem hadui Kristus Yesus, 4dawa' anan aleng uh ma'uk hengan dawa' puboh akui. Nusi' ha' akui anih tua aleng sayu kenep dahin dawa' atih, bi lim sidang men hang daha' aleng bengsa' ha' béh pah lahuh. 5#1 Kor 16:15,19 Uk tabi' lahuh men daha' sidang aleng té' alem uma dawa' atih.
Uk tabi' men Epenetus aleng ek nyalam, iha' nah aleng bua una anun Kristus ha' tana Asia. 6Uk tabi' men Maria aleng la'ei lelan nyadui men ikam. 7#2 Kor 8:23 Uk tabi' men Andronikus dahin Yunias aleng harik atih aleng bakéh kui alem tutup, aleng uh té' aran té' hang daha' aleng sihu Tuhan, aleng una' Kristen men'uh akui atih.
8Uk tabi' men Ampliatus aleng ek nyalam té' alem Tuhan. 9Uk tabi' men Urbanus, aleng bakéh tam alem hadui Kristus, dahin Stakhis aleng ek nyalam. 10Uk tabi' men Apeles aleng en daha' ju té' alem Kristus. Uk tabi' lahuh men kelunan huang uma Aristobulus. 11Uk tabi' men Herodion, aleng harik atih. Uk tabi' men kelunan huang uma Narkisus aleng alem Tuhan. 12Uk tabi' men Trifena dahin Trifosa, aleng tangen alem hadui Tuhan. Uk tabi' men Persis, aleng ek nyalam atih aleng tangen alem hadui Tuhan. 13#Mk 15:21 Uk tabi' men Rufus aleng uh en mili alem Tuhan, dahin men hinan na' aleng uh jadi' hinak lahuh. 14Uk tabi' men Asinkritus dahin Flegon dahin Hermes, dahin Patrobas, dahin Hermas dahin lim daha' harin tam aleng dahin daha' atih. 15Uk tabi' men Filologus dahin Yulia, dahin men Nereus dahin harin na' aleng doh men Olimpas dahin men lim daha' anak Tuhan aleng dahin dalo'.
16 #
1 Kor 16:20; 1 Pet 5:14 Sayu nah ikam petabi' pedeng kam dahin peparek aleng ma'ang. Lim-lim sidang alem Kristus menei tabi' men ikam.
Tebara nyihu jaga batung men kelunan aleng pelingo'
17 #
Mat 7:15; Tit 3:10 Akui nangen ikam, u kelo' harik, mengan nah kelunan aleng na daho' peselepi dahin na daha' petutut, aleng dep men'uh katuk aleng uh kam pekalei. Sayu nah ikam nelikun té' daha' atih. 18#Yehez 13:18; Fil 3:19; Kol 2:4; 2 Pet 2:3 Avin kelunan aleng na nutih, nusi' daha' panyin Kristus Tuhan tam, bi daha' ilau huang butit daha' tua anan. Haman daha' na daho' mih, haman na daho' sayu, té' daho' atih daha' peluvat daha' aleng em payan hipun kenep. 19#Mat 10:16; Rom 1:8; 1 Kor 14:20 Dengah barik kam aleng ngioh Tuhan hu'uh nei putat ha' daha' lim. Avin iha' nutih akui melu avin ikam, bi akui ngenep ja ikam nyemugen jam ket aleng sayu, dahin ma'ang men tuk ket aleng ji'ek. 20#Ar Kel 3:15; Rom 15:33 Allah aleng pa'un dena' atih seng salet muret Setan atih hida kudek kam. Sayu asi Tuhan Yesus Kristus tam té' dahin kam.
Tabi' bakéh sihu Tuhan
21 #
HST 16:1; 19:22; 20:4; Fil 2:19 Timotius aleng bakéh kui alem hadui kui, ma'uk tabi' men ikam, nunan pah dengan kui Lukius dahin Yason dahin Sosipater, dalo' harik tih lahuh. 22Akui Tertius aleng ngalung surat anih, kato' tabi' men ikam té' alem Tuhan. 23#HST 19:29; 1 Kor 1:14; 2 Tim 4:20 Gayus aleng ala akui iha' pah ma'uk tabi' men lim daha' sidang lahuh. Erastus aleng puboh ligit daléh anih dahin harin tam Kwartus pah ma'uk tabi'. 24Sayu nah asi Tuhan Yesus Kristus tam té' dahin kam lim-lim. Amin.
Sebayang mahek Allah
25 #
Ef 1:9; 3:5,9; Kol 1:26 Meju aran Allah! Iha' ningan petageng ikam, ngioh dengah sayu aleng ek pedengah, dahin ngioh katuk Yesus Kristus, dahin ket aleng uh tula kerei inih, aleng uh sihuk dahin lingen té' iling kelunan alem kuri dara urip men'a. 26#Rom 1:5; 2 Tim 1:10 Kerei inih daho' atih uh tula, kenan surat nabi pah ha' uh tula men ha'ut na'an kelunan, ngioh dahun Allah, ja daha' ngioh avin daha' uh nginah. 27#1 Tim 1:17; Yud 1:25 Men Allah aleng Ji tua atih aleng hipun nyemugen, té' nah aren men alem Yesus Kristus pa'en-pa'en. Amin.
Currently Selected:
ROMA 16: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
