ROMA 14
14
Ket aleng tekep men daha' aleng lema dahin men daha' aleng tageng alem kinah
1 #
Kol 2:16
#Rom 15:1; 1 Kor 8:9 Kelunan aleng lema alem kinah na' atih, sayu nah kelo' ala iha', bi meng ngenep pehu'ei-pehu'ei dahin na'. 2#Ar Kel 1:29; 9:3 Avin ji kelunan aleng nginah, iha' haman kuman ket en kani ha'ut-ha'ut na'an, bi kelunan ha' béh aleng lema kinah na' atih kuman uro'-uro' tua ha'. 3#Kol 2:16 Meng nah ji kelunan aleng kuman atih seng nuten kelunan aleng em kuman, dahin meng nah kelunan aleng em kuman atih seng pesala kelunan aleng kuman, avin Allah uh ala iha'. 4#Mat 7:2; Yak 4:11-12 Hi kah ika' anih aleng pesala panyin daha' aleng ha' béh? Awi iha' nekring, awi iha' payah pah, ju laké' aya' na' atih pah aleng jam atih. Bi adang iha' seng nekring ta'en, avin Tuhan té' tingan seng petageng iha'.
5 #
Gal 4:10
Té' pah balei aleng kuma' ji dau dekaya' men'uh dau aleng ha' béh, bi té' pah aleng ha' béh aleng kuma' lim-lim dau piah tua. Sayu nah ha'ut-ha'ut la'ung kam jam lan té' alem kenep kam. 6Hi-hi aleng hituk té' dau atih, iha' hituk na' men Tuhan, dahin hi aleng kuman atih, iha' kuman na' men Tuhan, avin iha' bara sayu kenep men Allah, dahin hi aleng em kuman, iha' em kuman na' men Tuhan kah atih, iha' pah bara sayu kenep men Allah.
7Avin ji la'ung pah men itam em té' aleng murip pedeng na' dep, ji la'ung pah em té' aleng matei men batung na' dep lahuh. 8#Lk 20:38; Gal 2:20; 1 Tes 5:10 Avin awi itam murip itam murip men Tuhan, nurei pah awi itam matei itam matei men Tuhan. Avin ha' nutih, awi itam murip, awi itam matei, adang itam anun Tuhan. 9Avin anih nah tavit Kristus matei dahin murip ngelua', ja Iha' Tuhan men daha' aleng matei dahin Tuhan men daha' aleng murip. 10#Mat 25:31-32; HST 17:31; 2 Kor 5:10 Nun kah tavit na' ika' pesala harim? Avin nun kah ika' muau té' harim? Avin itam lim seng nekring ha' unan ladung aren Allah tegu besara'. 11#Yes 45:23; 59:18; Fil 2:10-11 Avin uh té' kalung,
“Piah awi Akui murip anih, ken Tuhan, ha'ut-ha'ut la'ung seng nyepukun nukem ha' unan Kui,
dahin ha'ut-ha'ut ba kelunan seng meng'i Allah.”
12 #
Gal 6:5
Avin ha' nunan, itam ha'ut la'ung seng bara marung batung tam ha' unan Allah.
13Avin ha' nutih, meng nah itam pesala ji la'ung dahin ji la'ung la'an, bi sayu nah itam hituk sayu-sayu té' daho' anih, meng ji la'ung na nun-nun ngavan harin na' netung dahin belut. 14#Mat 15:11; HST 10:15; Tit 1:15 Avin akui jam, alem Tuhan Yesus akui uh nei jam lan ji-ji pah em té' aleng masep, bi men kelunan aleng ngio' nun-nun té' masep, men iha' nah ha' masep. 15#1 Kor 8:11-13 Awi harim bahat kenep avin ket im kani, nusi' nah ika' ngioh alan halam anan. Kristus uh matei men iha', meng im nasa' iha' kenan ket im kani. 16#Tit 2:5 Meng nah ket aleng sayu men ika' atih en kelunan nuten; 17#Lk 17:20 avin keligem Allah nusi' ha' marung tuk kuman dahin du'i, té' pah marung teneng dahin dena' dahin melu té' alem Belua' Ma'ang. 18Hi-hi aleng ngioh Yesus Kristus alem tuk anih, iha' nah aleng ngavan Allah melu, dahin aleng en kelunan ju lahuh.
19 #
Rom 12:18; 15:2 Avin atih sayu nah itam ngioh ket aleng na dena', dahin aleng na itam nei pejen-pejen pedeng tam.
20Meng nah ikam nasa' hadui Allah tavit ket im kani. Lim ket kani atih adang ma'ang, bi sala na' men kelunan aleng kuman na' atih dahin na harin na' petutut. 21#1 Kor 8:13 Meng kuman sin tulan dahin du'i ata' agun dahin nun-nun aleng ngavan harim petutu dahin belut, dahin aleng na kinah na' lema. 22Kinah ka' atih, sayu nah tuboh na' alem kenep ka' ha' unan Allah. Sayu lan nah kenep kelunan aleng em pesala batung na' marung ket en na' kuma' sayu. 23#Tit 1:15 Bi hi aleng kuman dahin kawah kenep na', iha' seng ga' ukum, avin hadui na' em men kinah pa'un na'. Avin ket nun-nun aleng em men kinah pa'un na', atih nah sala.
Currently Selected:
ROMA 14: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
