ROMA 13
13
Nyihu nyepida batung tam té' daha' aleng dekaya'
1 #
Ivun 8:15; Yoh 19:11; Tit 3:1 Sayu nah ha'ut-ha'ut la'ung nyepida té' daha' aleng pelitah daha'. Avin nusi' té' pelitah aleng em men Allah pa'un na'. Lim pelitah aleng uh té' atih en Allah petneng kah atih. 2Avin anan hi aleng melawan daha' aleng dekaya' atih, iha' nah aleng nyura' tebara Allah, dahin kelunan aleng nyura' atih seng ga' ukum té' batung na' dep. 3#1 Pet 2:13-14; 3:13 Avin daha' aleng dekaya' atih, nusi' daha' petakut daha' aleng na hadui sayu, bi daha' aleng na hadui ji'ek atih aleng en daha' mano'. Ngenep kah ika' seng em takut té' daha' aleng dekaya' atih iah? Na nah hadui aleng sayu, nurei ika' seng en daha' hek té' hadui ka'. 4#NDI 82:6; Rom 12:19 Avin iha' pah ji panyin Allah aleng na sayu men ikam lahuh. Bi awi ika' na ji'ek, atih nah ngavam takut, avin nusi' daha' aleng dekaya' atih gem malat tung-tung tua, avin iha' nah panyin Allah aleng nei nyulei dahin geri unget Allah men hi-hi aleng na ji'ek. 5Avin ha' nutih, tekep ikam nyepida tua, nusi' ha' avin ikam seng ga' unget tua, avin adang ha' barik kah lahuh. 6Avin atih nah tavit ikam ma'uk sukei lahuh, avin daha' nah aleng panyin Allah aleng pa'en na hadui anih.
7 #
Mat 22:21
Bayen nah men kelunan lim ket aleng seng tekep en kam uk, iha' tih awi huwa men kelunan aleng tekep ala huwa, dahin sukei men kelunan aleng tekep ala sukei; sayu takut té' kelunan aleng tekep ngavan kam takut, dahin ju nah kelunan aleng tekep kam ju.
Halam aleng pela'ung tebara menuna'
8 #
Gal 5:14; 1 Tim 1:5 Meng nah ikam putang nun-nun té' kelunan ha' béh, bi pehalam pedeng kam tua, avin hi-hi aleng nyalam daha' ha' béh, iha' nah aleng hu'uh halum té' tebara menuna' atih. 9#Us 20:13-15; Lewi 19:18; Kel d M 5:17-21 Avin tebara-tebara anih, “Meng nah im nuyang, Meng nah im lematei, Meng nah im nakau, Meng nah im ngivah,” dahin nun-nun tebara aleng ha' béh pah hu'uh pepeng té' alem daho' anih, iha' tih, “Sayu nah im nyalam daha' ha' béh awi ika' nyalam batung ka' dep.” 10#Mat 22:40; 1 Kor 13:4 Halam atih, nusi' ha' na nun-nun aleng ji'ek té' kelunan aleng ha' béh Avin atih, halam atih aleng pela'ung alan tebara menuna' atih.
Tebara marung urip aleng ma'ang
11 #
Ef 5:14; 1 Tes 5:6-7 Alem ha' nunih, ikam jam kerei inih tegu na' uh ateng, tekep nah ikam ma'un men udu kam, avin kerei inih urip tam uh lalau jeleng men'uh aring tam nei nginah. 12#Ef 5:11; 2 Tim 1:10; 1 Yoh 2:8 Avin uh lalau belua malem nah, seng malah nah dau. Avin atih sayu nah itam mesau lim hadui aleng men lidem, dahin nganan té' kanen aleng men malah. 13#Lk 21:34; Ef 5:18 Sayu nah itam na barik aleng tutau, awi aleng tekep men urip malah, meng tam hujen dahin mavuk, meng petuyang, dahin meng na barik aleng masep, dahin meng pano' dahin pepi'en. 14#Gal 3:27 Sayu nah itam nganan, ala Tuhan Yesus Kristus kanan tam, dahin meng nah itam hituk té' batung tam dahin ngioh kivah tam.
Currently Selected:
ROMA 13: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
