ROMA 12
12
Barik aleng tekep
1 #
Yoh 4:24; Rom 6:11,13; 1 Pet 2:5 Avin anan u kelo' harik, akui nangen ikam lelan avin tavit lim asi Allah té' itam, sayu nah ikam ma'uk batung kam jadi' ket bu sayu aleng murip dahin aleng ma'ang, atih nah aleng ngavan kenep Allah melu, atih pah ket aleng tekep en kam uk men Iha'. 2#Rom 1:28; Gal 1:4; Ef 4:23; 5:10,17 Meng kam jadi' la'ung lalé' ngioh barik usun tana anih, bi sayu barik kam nei pebalui kenan kenep kam aleng nei maring, ja ikam deng nelana' nun aleng sayu, dahin aleng ngavan Allah melu, dahin aleng atek kenep Allah lan.
Kuri na'an ket en Allah ih
3 #
1 Kor 12:11; Ef 4:7 Avin men alem asi aleng uh en Allah uk men akui, akui kuma' men ha'ut-ha'ut la'ung kam, meng kam bau kenep alem kam pelemana' batung kam dep, bi sayu pelemana' sayu-sayu ja ikam pelemana' aleng teneng, dahin hituk té' kinah kam aleng uh en Allah petulan men ikam ha'ut-ha'ut la'ung kam. 4#1 Kor 12:12 Awi jam tuk ji batung kahum kah kelawei na', bi lim kelawei atih nusi' ha' piah hadui na', 5#1 Kor 12:27; Ef 4:25 nunan nah itam anih lahuh, lan pah itam kahum kelawei bi ji tua batung alem Kristus, dahin ha'ut-ha'ut la'ung tam jadi' kelawei daha' aleng ha' béh.
6 #
1 Kor 12:4-11
Itam uh ala hadui aleng en Belua' uk aleng sekdep ha'ut la'ung ngioh asi Na' men itam. Awi Iha' ma'uk hadui bara dahun Tuhan, sayu nah itam bara dahun Tuhan, ngioh tulan kinah tam. 7#1 Pet 4:10-11 Awi itam nyadui masi kelunan, sayu nah itam tangen na na'; awi ji la'ung katuk, tangen nah iha' katuk. 8#Mat 6:3; 2 Kor 8:2; 9:7 Iha' té' ji la'ung aleng nangen ikam, sayu nah iha' nangen lelan lahuh, dahin hi aleng ma'uk, sayu nah iha' ma'uk na' dahin nyamah, dahin hi aleng geri kelunan, sayu nah iha' na na' dahin tangen; iha' aleng masi, sayu nah iha' masi dahin sayu kenep.
Tebara nyihu nyalam té' alem urip aleng maring
9 #
Am 5:15; 1 Tim 1:5; 1 Pet 1:22 Sayu nah ikam nyalam dahin lan-lan kenep. Lek nah barik aleng ji'ek, gem nah ket aleng sayu. 10#Fil 2:3; 2 Pet 1:7 Alem halam kam dahin daha' harin tam, sayu kam piah-piah pepasi ji la'ung dahin ji la'ung. Sayu nah ikam pepju pedeng kam.
11 #
HST 18:25; K Tula 3:15 Alem tangen kam, meng lekoh. Sayu nah ikam tangen lan alem kenep kam dahin nyadui men Tuhan.
12 #
1 Tes 5:17
Melu alem kinah tam, dahin aru kenep té' alem katé', dahin tangen pa'en té' alem sebayang.
13 #
Ib 13:2
Masi nah humé' daha' anak Tuhan, nyamah nah té' daha' aleng hakei.
14 #
Mat 5:44; HST 7:59; 1 Kor 4:12 Akei sayu té' Tuhan men daha' aleng pekaté' ikam, akei sayu, dahin meng mulah.
15 #
NDI 35:12
Melu nah dahin daha' aleng melu, nangih dahin daha' aleng nangih.
16 #
Ivun 3:7; Rom 11:20; 15:5 Sayu nah ikam piah kenep lim té' alem urip kam. Meng nah ikam pelemana' aleng bau, bi sayu ikam pelemana' aleng liva. Meng nah ikam bau kenep.
17 #
Yes 5:21; 1 Tes 5:15 Meng nyu'ei ji'ek kelunan dahin barik aleng ji'ek. Pelemana' nah ket aleng sayu aleng en kelunan lim nyineng. 18#Mk 9:50; Ib 12:14 Awi ha' deng, lim nun-nun aleng deng kam na sayu nah ikam na na', ja kam murip sayu dahin kelunan lim. 19#Lewi 19:18; Kel d M 32:35; Mat 5:39; Rom 13:4; 2 Tes 1:6-7; Ib 10:30 U ikam aleng ek nyalam, meng nah ikam ngenep nyulei, bi kelung nah Allah nyulei na', avin té' uh kalung, “Hulei atih Akui aleng hipun na'. Akui anih nah aleng seng nyulei, ken Tuhan.” 20#Ivun 25:21-22; Mat 5:44 “Hi-hi aleng bunu kam awi iha' la'o, en kam makan nah iha'; awi iha' megang ba, en kelo' uk nah ata' men iha', avin kenan hadui aleng nunan ja kenep na' nei pelemana' té' hadui na'.” 21Meng nah ikam alah kenan ji'ek, bi sayu nah ikam pekalah ji'ek atih té' aleng sayu.
Currently Selected:
ROMA 12: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
