ROMA 11

Balei tua men hang daha' Israel uh pebet

1 # 1 Sam 12:22; NDI 94:14; Yer 31:37; Fil 3:5 Avin ha' nunan akui meteng, hu'uh Allah nyarang daha' aleng bengsa' Na' iah? Peletu-letu nusi'. Avin akui anih pah ji kelunan Israel pahu Benyamin, pahu Abraham. 2#1 Laj 19:10,14 Nusi' nah Allah nyarang daha' bengsa' Na' aleng uh kitan Na' menuna'. Nusi' kah ikam hituk té' alem surat Tuhan marung tuk Elia pehu'ei dahin Allah ngenep seng pesala bengsa' Israel, 3“U Tuhan, daha' nabi Ka' hu'uh matei kenan daha' atih, avo' laluh Ka' uh en daha' uva, ji la'ung kenau kui tua aleng murip la'an, seng en daha' ngenep lematei loh pah akui nih,” ken na'. 4#1 Laj 19:18 Bi nun aleng hu'ei Allah men iha'? “Té' loh kah tusu libu' la'ung daha' laké' aleng Ek lo' men Akui aleng em peletu nyepukun ha' unan Baal.” 5#Rom 9:27 Nunan pah tegu anih lahuh té' la'an na' aleng uh en Na' mili alem asi Na'. 6#Gal 3:18 Iha' ha' men asi, nusi' nah iha' kenan hadui kelunan, avin awi ha' men hadui daha', asi atih nusi' ha' asi la'an.

7 # Rom 9:31 Iha' nunan, nuno' tuk na'? Ket aleng en daha' Israel ilau nusi' daha' ala na', bi kelunan aleng uh en Na' mili atih hu'uh ala na', dahin kelunan aleng ha' béh atih hu'uh en na' na mahing kenep, 8#Kel d M 29:4; Yes 29:10 awi aleng uh kalung.

“Allah na daha' atih jelerau,

dahin na matan daha' em jam nyineng, dahin na iling daha' em kelenghi,

ateng dau anih.”

9 # NDI 35:8; 69:23-24 Daud pah kuma',

“Bei nah jaka' daha' kuman atih jadi' ji hatoh dahin ji penya,

daha' ji bato' ngavan daha' petutut, dahin ji hulei men daha'.

10Bei nah matan daha' em mavoh ja daha' em nyineng,

dahin la'ung daha' bekudok pa'en.”

Daha' Israel pebet, bi nusi' ha' pa'en-pa'en.

Daha' aleng bengsa' ha' béh pah en Na' uvui

11 # Kel d M 32:21; HST 13:46; Rom 10:19 Akui meteng la'an, daha' atih petutut ja daha' tasa' iah? Peletu-letu nusi'. Bi avin daha' atih uh payah, urip uh nei ateng ha' kelunan aleng bengsa' ha' béh, ja daha' Israel atih mi'en nyineng daha'. 12Iha' usun tana anih nei kaya' avin daha' Israel payah, dahin lugi daha' atih jadi' avan daha' bengsa' ha' béh nei kaya', tegu daha' Israel halum lan alem Tuhan, lalau lan nah kaya' daha'!

13Bi akui kuma' men ikam aleng men bengsa' ha' béh, alem kui jadi' sihu men ikam aleng em bengsa' kui nunih, akui mahek hadui kui, 14#1 Tim 4:16 jukdau akui deng peheléh kenep daha' aleng men bengsa' kui, ja deng geri balei men hang daha' atih pala urip. 15Avin awi alem daha' bengsa' Israel pebet, kelunan ha' usun tana anih en Tuhan na sayu dahin Na', nun la'an tegu daha' en Na' ala ngelua'? Adang daha' awi peju men hang kelunan matei. 16#Kah d Is 15:17-21 Iha' dinuh atih ma'ang, adang ma'ang nah kela'ung dinuh atih, iha' pakat na' ma'ang adang da'an na' ma'ang lahuh. 17#Ef 2:11-19 Bi awi balei da'an atih hepé', ikam anih nah aleng ledung zaitun aleng alem uro' en ngawin tei té' iung zaitun aleng uh en tuvuh, dahin uh peji alem urip alem ata' na' aleng nei men pakat na' atih, 18#Yoh 4:22 meng im bau kenep té' da'an atih. Awi ika' bau kenep, hituk nah, nusi' ha' ika' aleng tuboh pakat atih, bi pakat atih aleng tuboh ika'.

19Mina kuma' pah ika' si', “Da'an-da'an atih hu'uh hepé' ja akui deng ngawin té' iha'.” 20#Rom 12:16 Lan, avin tavit daha' em nginah daha' tei hepé' nutih, bi ika' anih avin kinah ka' ika' tageng. Meng bau kenep, bi sayu takut. 21Avin awi Allah em namu da'an aleng men pa'un na' atih, nusi' peletu Iha' seng namu ika' lahuh. 22#Yoh 15:2,4; Ib 3:14 Nyineng nah kenep Allah aleng masi dahin kenep Na' aleng heléh. Men daha' aleng uh belut atih heléh kenep Na', bi men ika' nah asi Allah té', iha' tih awi ika' teneng alem asi Na'. Awi ika' em tageng, ika' pah seng en Na' nyepé' lahuh. 23#2 Kor 3:16 Bi awi daha' Israel nei pekuli kenep men selalang daha' adang Allah seng ngawin daha' la'an, avin Iha' té' tingan ngawin daha'. 24Avin iha' ika' anih hu'uh hepé' men iung zaitun aleng alem uro', en ngawin té' iung zaitun aleng sayu aleng em pa'un ka', lalau lan nah da'an aleng hepé' atih en ngawin la'an ha' iung aleng iung na' lan.

Pahu Israel seng ala urip

25 # Lk 21:2; Yoh 10:16; Rom 12:16 Avin nusi' kui ngenep kelo' em jam marung ji tuk aleng uh sihuk anih, u kelo' harik, bahi ikam bau kenep alem ugé' kam dep, iha' tih balei daha' bengsa' Israel hu'uh nei mahing kenep, ateng lim daha' aleng bengsa' ha' béh nah aleng uh en Na' ujap atih nei halem. 26#NDI 14:7; Yes 27:9; 59:20; Mat 23:39 Nuréh lim daha' Israel seng ala urip, awi jam tuk alem kalung,

“Meng alem Sion Iha' aleng seng makau atih seng nei,

Iha' seng petngak lim barik aleng sala men Yakub.”

27 # Yer 27:9; Yer 31:33-34 “Anih nah jaji Kui dahin daha' atih,

tegu Akui mebet sala daha'.”

28Marung dengah sayu, daha' atih jadi' bunu Allah avin tavit ikam, bi marung tuk Allah mili kelunan, daha' atih en Na' nyalam tavit sepun daha' menuna'. 29Avin Allah em deng masan kenep Na' marung ket en Na' ih dahin marung uvui Na'. 30Avin piah awi menuna' ikam uh muau Allah, bi kerei inih ikam uh ala asi avin uau daha' pahu Israel atih, 31nunan pah lahuh kelunan atih pah hu'uh muau, ja kenan asi en kam ala atih daha' atih pah deng ala asi lahuh kerei inih. 32#Gal 3:22; 1 Tim 2:4 Avin Allah hu'uh ngaput daha' lim alem uau daha' ja Iha' deng ma'uk asi Na' men kelunan lim.

Mahek alan kenep Allah

33 # Yes 45:15; Rom 9:23; 10:12 Dalem lelan nah kaya' kenep Allah uvung nyemugen Na' dahin ugé' Na'! Tebara Na' nusi' deng en kelunan ngering, dahin alan-alan Na' pah nusi' nah kelunan deng ngioh na'.

34 # Ay 15:8; Yes 40:13; Yer 23:18; 1 Kor 2:16 “Avin hi kah aleng uh jam kenep Tuhan,

dahin hi kah aleng uh katuk Tuhan?”

35 # Ay 41:2 “Hi aleng una' hu'uh ma'uk ket nun-nun men Iha'

ja Iha' ngalui na' la'an?”

36 # 1 Kor 8:6 Avin lim ket nun-nun nei men Iha', ket lim-lim uh kenan Na', dahin ket lim-lim uh té' men Iha'. Té' Iha' nah aren atih té' pa'en-pa'en. Amin.

Currently Selected:

ROMA 11: TDK1990

Highlight

Copy

Compare