ARING KELESING 47
47
1Men'uh anan dih tei nah Yusuf bara Firaun, “Tamak dahin dalo' harik uh té' nah dalo' ha' Gosyen paget hulung kading, duba, sapi', dahin lim-lim ketanun dalo' aleng men daléh Kanaan, uh en dalo' geri lim nah.” 2Lima' la'ung men hang dalo' harin na' en na' geri pala Firaun. 3Iha' nah Firaun meteng dalo' harin Yusuf nan, “Ket nun aleng hadui kelo'?” Iha' dalo' nyu'ei Firaun, “Kamé' ji'ek nih men sepun amé', ateng kamé' kerei inih, mengalei lelan kamé' puboh hulung.” 4Ji dahun dalo' men Firaun lahuh, “Kamé' ji'ek nei nyakei tua nah anih té' daléh anih, avin nusi' nah té' uro' murip ha' tana avan amé' ji'ek puboh hulung amé' ha' tanan Kanaan tih, avin lalé' nah lien amé' hitih, avin anan amei, kalo' ji'ek akei kalo' seng té' murip ha' Gosyen tih tua nah anih.”
5Iha' nah Firaun kuma' men Yusuf, ken na', “Tamam dahin dalo' harim ji'ek uh nei pala ika' nah anan. 6Bi tana Mesir nih ika' nah aleng uh puboh na' hu'ek dih, avin anan no' nah kurim bara tamam dahin dalo' harim, bara dalo' tatah aleng sayu avan dalo' ji'ek té' murip alem daléh anih. Sayu kah dalo' té' ha' Gosyen nan. Tana' ika' jam té' aleng tugé' men hang dalo' sayu im nyihu iha' nei puboh hulung kui.”
7En Yusuf geri pah Yakub taman na' tei pala Firaun. Pelalau Yakub akei asi té' Tuhan men Firaun. 8En Firaun teng nah Yakub, “Kuri duman uh urip ka' du?”
9Nyu'ei nah Yakub iha', “Dara-dara urip kui nyakei ha' usun tana nih ji atuh telo'-pulu duman. Nusi' pah té' ha' sayu urip kui alem dara-dara akui ji'ek murip anih, nusi' urip kui aru awi urip daha' sepuk dih, awi daha' menuna' tegu daha' té' murip té' usun tana anih.” 10Yakub akei asi té' Tuhan men Firaun, iha' nah iha' tei musang men unan Firaun. 11Tei nah Yusuf bara taman na' dahin dalo' harin na', bara tana aleng anun dalo' ngavan dalo' ji'ek murip té' daléh Mesir nan, tatah daléh aleng sayu lan, iha' tih ha' tana Rameses, awi aleng kurin Firaun anan. 12Yusuf pah puboh taman na' dahin dalo' harin-harin na' dahin lim-lim daha' huang uma taman na', dahin ma'uk ket en daha' ji'ek kani, nutih kah kahum la'ung daha' dahin anak-anak daha', nutih kah iha' ma'uk-ma'uk ket men daha'.
Lien aya'
13Lim-lim alem daléh anan nusi' peletu té' ket en daha' ji'ek kani la'an, avin atek lien aya' lelan daha', ketu-ketu kelunan alem daléh Mesir dahin daléh Kanaan uh lema tua nah daha' ji'ek kenan lien daha'. 14Bi Yusuf té' mepeng lim ligit aleng uh kelan na' ha' daléh Mesir dahin ha' daléh Kanaan anan, iha' tih ligit legah parei daha' aleng en daha' belé' té' iha' anan dih, en Yusuf geri nah ligit atih ha' uma Firaun. 15Tegu ligit daléh Mesir dahin daléh Kanaan uh pah, tei nah lim-lim daha' Mesir pala Yusuf, iha' daha' kuma' men iha', “Im uk nah ket en amé' ji'ek kani! Seng nuno' kah ka'uh kamé' ji'ek seng tei matei ha' unan ka' nunih kurim, avin ligit uh em té' nunih?”
16Iha' Yusuf nyu'ei, “Tana' ha' em té' ligit kam la'an, sayu kam ma'uk hulung kam, iha' kui ma'uk ket en kam kani kalui hulung kam nan.” 17Iha' nah daha' geri hulung daha' pala Yusuf, iha' nah Yusuf ma'uk ket en daha' kani té' duman anan, kalui hulung guda' daha', kading, duba, sapi', keledei lahuh, en na' puboh nah daha' lim dahin ma'uk ket en daha' ji'ek kani kalui lim-lim hulung daha' anan.
18Lebau duman anan, té' duman aleng maring la'an, tei pah daha' pala Yusuf nekulah, iha' daha' kuma' men iha', “Nusi' nah kamé' deng mahuk kenep amé' la'an té' ika' amei, avin ligit amé' ji'ek uh pah dahin hulung amé' pah lahuh uh anum lim nah anan amei, nusi' nah té' ji nun-nun ket té' kamé' la'an aleng seng en amé' uk men ika' la'an amei, bi batung dahin tana amé' dep kah la'an. 19Seng nuno' kah ka'uh kamé' ji'ek seng tei matei tua nunih kurim, nurei pah tana amé' lahuh? Sayu nah im melé' kamé' lim dahin tana amé' tih lahuh, kalui ket en amé' ji'ek kani. Tana amé' dahin batung amé' lahuh anun Firaun nah tua, dipen na' tua nah kamé' bareng. Im uk nah beni men kamé' lahuh ja kamé' ji'ek murip, meng nah kamé' tei matei, ja tana em tei melek tua nunan lahuh.”
20Iha' nah Yusuf melé' lim-lim tana daha' Mesir nan men Firaun, avin ha'ut-ha'ut la'ung daha' Mesir tei mebet tana daha', avin kelalau katé' daha' té' lien atih. Nunan nah pa'un Firaun hipun tana atih. 21Marung tuk daha' kelunan anan, en na' na nah daha' dipen na' tua alem daléh Mesir nan, men lirin na' pedah ji ateng lirin na' pedah ji. 22Tana daha' imam dep kah aleng em na' belé', avin daha' imam nan en Firaun puboh, iha' nah daha' deng murip, avin iha' aleng masi daha', iha' nah daha' em mebet tana daha' nutih lahuh. 23Kuma' nah Yusuf men lim daha' kelunan atih, “Anih nah beni kam ja kam deng nuvuh té' tana atih, avin dau anih akui uh melé' ikam dahin tana kam anun Firaun. 24Marung uli luma' kam, sayu petulan na' lima', ji tulan en uk Firaun, pat tulan aleng kam na beni luma' kam dahin itung kanen anak kam dahin lim kam aleng alem amin lahuh.”
25Iha' nah daha' kuma', “Avin ika' uh puboh urip amé' nunih amei, ika' uh masi kamé' nunan, bei nah kamé' ji'ek em dipen Firaun tua.” 26Iha' nah Yusuf na ji tebara aleng em deng en asan ha' daléh Mesir ateng kerei inih, iha' tih alem lima' tulan uli luma' daha' anan, ji tulan aleng anun Firaun. Bi tana aleng anun imam ké', dep kah atih, nusi' nah Firaun hipun na'.
Ket aleng baya loh en Yakub akei
27Murip nah Israel ha' daléh Mesir ha' tana Gosyen. Daha' pah itung kelunan aleng alem daléh atih tua. Nei-nei katan nah daha', avin kahum nah anak daha' nurei pah sau-sau daha' lahuh. 28Pulu-tusu duman Yakub uh té' murip ha' daléh Mesir, arun urip Yakub ji atuh pat-pulu-tusu duman. 29#Ar Kel 49:29-32; 50:6Jeleng-jeleng Israel seng tei matei, en na' uvui nah anak na' Yusuf, iha' ha' kuma' men iha', “Iha' ika' nyalam té' akui ji'ek, im tei nah usu ka' té' tian hapi kui nih, dahin na jaji aleng tageng ja ika' seng masi akui lan-lan ngioh dahuk anih. Meng im nanem akui ha' daléh Mesir nih si', 30bi sayu nah akui té' dahin daha' sepuk dih. Im ari nah patei kui men daléh Mesir nih, tei nanem akui peji alem liang daha' sepuk dih.” Nyu'ei nah Yusuf, “Sayu kah, no' pah dahum tua men akui.”
31Nyu'ei pah Yakub, “Supah im una' arin.” Iha' nah Yusuf supah dahin na'. Pelalau nyenéh nah Israel ha' usun kahung avan na' tudu atih.
Currently Selected:
ARING KELESING 47: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
