ARING KELESING 46
46
Yakub dalo' huang amin na' bulak ha' Mesir
1Leka' nah Israel tei geri lim-lim ketanun na'. Ateng nah iha' ha' Bersyeba, iha' nah iha' pelalau nevek hulung, ma'uk ket aleng bara bun usu na' men Allah Ishak taman na'. 2Tegu malem anan nei nah Alah tula té' Israel, dahin kuma' men iha', “Yakub, Yakub!” Nyu'ei nah iha', “Té' kah akui, Tuhan!” 3Ken Tuhan men iha', “Akui nah Allah, aleng Allah tamam, meng im kawah tei ha' Mesir, hinan Akui seng na pahu ka' dekaya'. 4Akui pah aleng té' tugung ika' pa'en tegu ika' tei ha' Mesir, Akui pah seng geri ika' uli la'an men inan, usu Yusuf pah aleng seng puboh patei ka' na'a.”
5Leka' nah Yakub men Bersyeba. Dalo' anak Israel geri taman dalo' dahin lim anak dalo' dahin doh dalo' panau té' ujung kelita' aleng en Firaun kato' men dalo' anan ngavan geri dalo'. 6#HST 7:15 Lim hulung dalo' dahin lim-lim ketanun dalo' aleng uh kelan dalo' té' alem tana Kanaan en dalo' geri lim. Ateng nah Yakub dalo' panak lim ha' tana Mesir, 7lim anak-anak na' dahin sau-sau na' aleng laké' dahin aleng doh, en na' geri lim ha' Mesir.
8Anih lim aran pahu-pahu Israel aleng uh tei ha' Mesir, iha' tih Yakub dahin dalo' anak na' lim. Anak una' Yakub, Ruben. 9Aleng anak Ruben, Henokh, Palu, Hezron dahin Karmi. 10Aleng anak Simeon iha' nah Yemuel, Yamin, Ohad, Yakhin, Zohar dahin Saul, anan aleng anak na' té' doh daha' Kanaan. 11Aleng anak Lewi iha' nah Gerson, Kehat dahin Merari. 12Aleng anak Yehuda iha' nah Er, Onan, Syela, Peres dalo' Zerah, bi Er dawa' Onan uh matei ha' tana Kanaan. Bi nganak nah Peres, iha' nah iha' na Hezron dawa' Hamul. 13Aleng anak Isakhar iha' nah Tola, Pua, Ayub dahin Simron. 14Aleng anak Zebulon iha' nah Sered, Elon dahin Yahleel. 15Atih nah anak dahin sau Lea aleng en na' nganak men Yakub ha' Padan-Aram, anan nah anak-anak aké' na', té' pah Dina aleng anak doh na'. Lim-lim daha' panak atih kahum daha' telo'-pulu-telo' la'ung.
16Aleng anak Gad, iha' nah Zifyon, Hagi, Syuni, Ezbon, Eri, Arodi, dahin Areli. 17Aleng anak Asyer iha' nah Yimna, Yiswa, Yiswi dahin Beria, Serah iha' nah aleng harin doh dalo'. Té' pah anak Beria, iha' nah Heber dawa' Malkiel. 18Atih nah aleng anak Zilpa aleng en na' nganak men Yakub, lim dalo' pulu-nem la'ung. Zilpa atih doh panyin Laban aleng en na' uk men anak doh na' Lea atih dih.
19Aleng anak Rahel doh Yakub, iha' nah Yusuf dawa' Benyamin. 20#Ar Kel 41:50-52 Yusuf pah nganak Manasye dawa' Efraim ha' tana Mesir, aleng anak na té' Asnat, anak doh Potifera aleng imam ha' On. 21Aleng anak Benyamin, iha' nah Bela, Bekher, Asybel, Gera, Naaman, Ehi, Rosy, Mupim, Hupim, Ared. 22Atih nah pahu Rahel dawa' Yakub, lim daha' pulu-pat la'ung.
23Aleng anak Dan iha' nah Husim. 24Aleng anak Naftali iha' nah Yahzeel, Guni, Yezer dahin Syilem. 25Anan nah aleng pahu Bilha aleng doh panyin Laban en na' uk men Rahel anak doh na', iha' aleng na anak dahin sau men Yakub, kahum dalo' tusu la'ung.
26Lim-lim kahum daha' aleng uh ateng ha' Mesir dahin Yakub, daha' aleng atek muloh men tulang Yakub, nusi' itung daha' doh divan na', lim kahum daha' nem-pulu-nem la'ung. 27#HST 7:14 Bi té' dua' anak Yusuf aleng en na' nganak ha' Mesir. Jadi' lim daha' panak Yakub aleng uh té' ha' Mesir, kahum daha' tusu-pulu la'ung.
Yakub dahin daha' huang amin na' ateng ha' Mesir
28En Yakub nyihu nah Yehuda tei una' bara Yusuf, ja Yusuf tei ha' Gosyen jam taman na'. Alem nunan dih ateng nah daha' ha' Gosyen. 29Iha' nah Yusuf ala kelita' na' tei ha' Gosyen jam taman na' Israel. Tegu ha' uh ateng taman na', pelalau nah iha' marek keran taman na', nangih tua nah iha' ji'ek té' la'ip taman na' nan. 30Kuma' nah Israel men Yusuf, “Kerei inih lema nah kenep kui tei matei, avin akui uh nyineng neng ka' dahin uh jam ika' ji'ek té' murip loh nunih puyo'.”
31Kuma' nah Yusuf men dalo' harin-harin na', men lim dalo' aleng anak taman na' atih, “Akui seng tei jam Firaun bara iha' anih, ‘Lim dalo' harik dahin lim daha' aleng huang uma tamak, aleng murip ha' Kanaan dih, uh nei nah daha' ateng ha' akui, 32bi lim daha' kelunan atih té' lim hulung kading dahin duba daha' avin daha' atih kelunan malei puboh hulung, lim hulung kading, duba, sapi', dahin lim ketanun daha' uh en daha' geri lim nah.’ 33Tegu Firaun muvui kelo' na'a, meteng kelo' nunih, ‘Hadui nun aleng kalei kam na?’ iha' ken na', 34sayu kelo' nyu'ei iha' nunih, ‘Kalo' ji'ek kelunan panyin ka' anih amei aleng mengalei lelan puboh hulung men alem kamé' da'uk ateng-ateng kerei inih, nunan nah hadui amé' men sepun amé',’ ken kelo', uréh nah kelo' deng murip ha' tana Gosyen anih na'a, avin daha' aleng puboh hulung awi kading, duba nih masep daha' kurin daha' Mesir tih.”
Currently Selected:
ARING KELESING 46: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
