ARING KELESING 45
45
Yusuf petula iha' men dalo' hari na'
1 #
HST 7:13
Tegu anan nusi' nah Yusuf deng pihen kenep na' la'an ha' unan kelunan aleng nekring té' béh na' anan, pelalau nah iha' ji'ek medéng, “Nyihu nah lim kelunan musang men inih.” Ji la'ung pah em té' aleng melo' tinan la'an dahin Yusuf, iha' nah iha' petula iha' men dalo' harin-harin na'. 2Nei nah iha' nangih aya'-aya', kelenghen daha' Mesir dahin lim daha' aleng té' ha' uma laja' Firaun nan lim nah dahun na' ji'ek nangih. 3Iha' nah Yusuf kuma' men dalo' harin na', “Akui nah aleng Yusuf! Té' loh kah tamei ji'ek murip iah?” Bi dalo' harin na' anan peletu em nyu'ei iha', avin dalo' ji'ek ngihau takut té' iha'. 4Iha' nah Yusuf kuma' men dalo' harin na', “Hinih kelo' nei, arin.” Iha' nah dalo' tei jeleng iha'. Ken na' pah la'an, “Akui nah Yusuf harin kelo' aleng en kelo' belé ha' daléh Mesir anih. 5Bi kerei inih, meng nah kelo' ji'ek tusah kenep, meng nah kelo' kuma' kelo' sala avin tavit kelo' belé akui nunan dih. Té' pah anan, avin Allah aleng nyihu akui ji'ek nei una' té' kelo' hinih kah anih, ja puboh hengan kelunan. 6Avin dua' duman nah uh té' lien alem daléh anih, bi té' loh kah lima' duman la'an, dara kelunan seng em ngelisah tana dahin seng em ngelunau. 7Allah uh nyihu akui nei una' té' kelo', ja masi urip anak kelo' té' usun tana anih, dahin petuboh urip kelo' lim lahuh, ja kelo' deng nei ala asi nunih kah anih. 8Allah aleng nyihu akui nei hinih anih, nusi' ha' kelo' harik. Iha' aleng na akui itung taman Firaun, dahin na akui dekaya' alem lim uma na', aleng gem lim-lim daléh Mesir anih.
9 #
HST 7:14
“Tei nah kelo' uli salet pala tamei, bara nah men iha' dahuk anih, ‘Nunih dahun Yusuf anak ka' dih,’ ken kelo' si, ‘Allah aleng na akui dekaya' gem lim-lim daléh Mesir, avin anan nei nah kelo' salet, meng kelo' mahen nei. 10Ika' seng té' murip ha' tana Gosyen amei, sayu ka' jeleng té' béh kui, ika' dahin lim dalo' harik nih dahin daha' anak-anak kui, nurei pah kading, duba' sapi', dahin lim-lim ket aleng té' té' ika'. 11Hinih nah akui puboh ika', amei, avin lien anih lima' duman la'an. Meng nah ika' tei sutuk lalé', nurei pah kelo' lim aleng huang uma telo', nurei pah lim kelunan aleng ngioh ika',’ ken kelo' men iha'.
12“Atek batung kelo' pah uh nyineng, nurei pah harik Benyamin nih lahuh, ba-ba kui pah aleng uh bara men kelo' lahuh anih. 13En kelo' petira nah sayu-sayu men tamei marung tuk aren kui ha' Mesir nih, nurei pah ket nun-nun aleng uh en kelo' nyineng lahuh. Tangen nah kelo' nei, geri nah tamei salet nei hinih.”
14Pelalau nah iha' marek keran Benyamin harin na' aleng da'uk anan, dahin nangih, nurei pah Benyamin ji'ek lahuh nei nangih té' la'ip Yusuf. 15Yusuf pah tei marek lim dalo' harin na', bara kenep na' té' dalo', pelalau pah iha' ji'ek nei nangih ngelua' meté' ngelameng dalo'. Men'uh anan iha' nah dalo' harin-harin na' petengaran dahin na'.
16Tegu Firaun kelenghi dengah harin-harin Yusuf té' nei ateng, melu lelan kenep Firaun, nurei pah kenep lim daha' aleng nyadui men iha' lahuh. 17Iha' nah Firaun pelalau kuma' men Yusuf, “Im bara nah men dalo' harim nunih, ‘En petmei nah udan hulung-hulung kelo' nan, tei nah kelo' ha' tana Kanaan, 18en avéh nah taman kelo' dahin lim-lim kelunan huang uma kelo', nei nah pala akui, akui pah seng ma'uk men kelo' ket aleng huwi sayu men alem tana Mesir anih, kelo' pah seng kuman adung tana anih. 19En geri kelita' men daléh Mesir nih ngavan geri anak kelo', hawan kelo' dahin taman kelo' men inan nei hinih. 20Meng kelo' pelemana' ketanun kelo' seng java', avin kelo' melek na', avin ket aleng sayu ha' daléh Mesir nih, iha' anun kelo' nah anan lahuh,’ kum men dalo',” ken Firaun.
21Iha' nah alo' anak Israel na awi kurin na' anan. Iha' nah Yusuf ma'uk kelita' men dalo', ngioh dahun Firaun nan, en na' uk pah nguyo' men dalo', té' iung alan lahuh. 22Pehiget ji ha' ma'uk ket kajau en dalo' té', awi basung dahin seluwen nih, bi men Benyamin lima' seluwen dahin basung en na' uk men iha', nurei pah lahuh telo' kilogram ji unang#45:22 3 KILOGRAM JI UNANG iha' tih kio'-kio' 6 kati'. pirek en na' uk iha'. 23Men taman na', pulu keledei laké' en na' kato' hangan-hangan kanan bareng aleng sayu-sayu men daléh Mesir, té' pah pulu keledei doh aleng geri parei dahin luti dahin nguyo' taman na' té' iung alan. 24Iha' nah iha' nyihu dalo' harin na' tei leka', iha' pah duan dalo' lahuh, “Meng-meng kelo' seng em tuman barik kelo' té' iung alan.”
25Iha' nah dalo' ji'ek tei leka' men daléh Mesir tei ha' tana Kanaan ha' taman dalo' Yakub. 26En dalo' bara nah men iha', “Yusuf dih té' loh kah iha' murip, iha' nah aleng dekaya' aleng gem lim daléh Mesir.” Bi muau tua henoh kenep Yakub kelenghi dahun dalo', avin ha' em nginah té' dahun dalo'.
27Bi tegu dalo' bara aleng dahun Yusuf men iha', nurei pah iha' uh nyineng kelita' aleng en Yusuf kato', avan seng geri iha' lahuh, iha' nah kenep Yakub taman dalo' nei awi soh dih. 28Iha' nah Israel kuma', “Deng nah anih. Anak kui Yusuf dih té' loh kah iha' ji'ek murip ni, akui seng ngenep tei nyineng iha' em payan kui matei.”
Currently Selected:
ARING KELESING 45: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
