USANG DAHA' ISRAEL 7
7
1Ken Tuhan men Musa, “Nyineng im, Akui seng na ika' jadi' awi Allah té' Firaun, dahin Harun harim aleng dekaya' atih jadi' nabi ka'. 2Im bara nah lim Dahuk aleng Ek bara men ika' anan dih, meng em bara na'. Sayu Harun harin aleng dekaya' atih tengaran Firaun men kua' ja iha' mekoh daha' Israel leka' men daléh na'. 3#HST 7:36 Bi kenep Firaun Ek na mahing. Lan pah Akui mi'at-mi'at tada'-tada' Kui dahin hadui avan daha' ngeniheng ha' tana' Mesir, 4bi Firaun seng em kelenghi dahun kua'. Akui pah seng pekaté daha' Mesir té' usu Kui, uh anan daha' kelunan Kui aleng bangu atih seng Ek geri musang, iha' tih daha' Israel aleng pahu Kui anan, dahin geri daha' musang tavit ukum aleng bahat. 5Uréh daha' Mesir anan jam Akui anih Tuhan, tegu Akui mejei usu kui nyelibau Mesir dahin geri daha' Israel musang men hang daha'.” 6Musa dawa' Harun pah ngioh katuk aleng en Tuhan nyihu dawa' na atih dih. 7Tegu dawa' tengaran dahin Firaun anan, umum Musa saya'-pulu-duman, umun Harun men dawa' saya'-pulu-telo' duman.
Hekun Harun
8Ken Tuhan bara Musa dawa' Harun, 9“Tegu Firaun mekilau kua' na ji tada', sayu im kuma' men Harun, ‘Im ala nah hekun ka' anan, im sau nah ha' unan Firaun, ja ha' balui nyipa'.’ ” 10Iha' nah Musa dawa' Harun tei pala Firaun, en dawa' na nah awi dahun Tuhan men dawa' atih dih. En Harun sau nah hekun na' ha' unan Firaun dahin ha' unan lim daha' kelunan aleng nyadui ida na', hekun anan pah balui nyipa'. 11Men'uh anan en Firaun uvui nah kelunan aleng tugé', dahin kelunan aleng jam basa'-basa'. Daha' aleng tugé' alem daléh Mesir anan pah na awi aleng en dawa' na atih lahuh, pakei haman daha'. 12Lim-lim daha' pah mesau hekun daha', hekun daha' anan pah haman tei balui nyipa' lahuh, bi hekun Harun anan dih pah meté' nyelu lim hekun-hekun daha'. 13Bi kenep Firaun sa'-sa' mahing la'an, iha' pah em kaséh kelenghi dahun dawa', awi aleng uh Tuhan bara atih dih.
Katé nei ha' Mesir
Tulah aleng una': Daha
14Kuma' nah Tuhan men Musa, “Mahing lan kenep Firaun nan, nusi' peletu iha' mun daha' bengsa' anan tei leka'. 15Bi jihima tei nah im pala Firaun tegu jaka' iha' tei hungei, im pidah nah iha ha' bahé' hungei Nil nan, im geri nah hekun ka' aleng uh balui nyipa' anan dih. 16Kum men iha', ‘Tuhan Allah daha' Ibrani nyihu akui nei pala ika' anih, nei ja bara ika', ken Na': Bei nah daha' pahu Kui anan tei, ja daha' sebayang té' Akui ha' tana ngahit tih, ken Na'. Beka' ateng kerei inih pah ika' em kaséh kelenghi dahun Na'. 17#K Tula 16:4 Avin anan, nunih nah dahun Tuhan la'an: Kenan tada' anih nah ika' seng jam Akui anih Tuhan, ken Na'. Nyineng im, akui seng nyaman hungei Nil té' hekun aleng alem usu kui anih, ata' hungei Nil anih pah seng balui daha. 18Lim masik aleng halem hungei Nil anih pah seng matei, ateng hungei Nil anih pah bu butung tua, kelunan Mesir pah seng duyah du'i ata' hungei Nil nih.’ Nunan nah dahum men Firaun,” ken Tuhan.
19Tuhan kuma' men Musa la'an, “Im duan nah Harun, ‘Ala nah hekun ka', ju nah usu ka' nyelibau ata' daha' Mesir, nyelibau hungei aleng dekaya', nurei kah hungei uk, nyelibau ata' bawang dahin nyelibau lim lesung daha' Mesir, ja lim ata' na' balui daha si', ja ha' daha tua-tua nah té' lim tana Mesir anan, sayu alem ketakoh kayo' nunan pah alem ketakoh bato'.’ ”
20Nurei nah Musa dawa' Harun na awi aleng Tuhan bara dawa' atih. En na' ju nah hekun anan pelalau nyaman hungei Nil ha' unan Firaun dahin ha' unan daha' aleng ida-ida na' atih lahuh, pelalau lim-lim ata' hungei aleng ha' hungei Nil anan balui daha. 21Masik pah matei lahuh. Hungei Nil anan pah bu butung tua nah, daha' Mesir pah em deng du'i ata' na' la'an. Lim-lim usun tana Mesir anan pah daha tua-tua. 22Bi daha' aleng haman basa'-basa' alem daléh Mesir anan pah na nunan lahuh, pakei ugé' daha', ateng kenep Firaun pah maling dahin em ngenep kelenghi dahun dawa', awi aleng uh en Tuhan bara atih. 23Firaun pah tei uli, pelalau tei alem uma na' dahin em ngenep pelemana' ket atih. 24Lim daha' Mesir ngalé' tevei bahé' hungei Nil ilau ata' en daha' du'i, avin nusi' nah daha' deng du'i ata' hungei Nil tih.
25Alem tusu dau halum-halum dara Tuhan uh na ata' hungei Nil ji'ek nunan.
Currently Selected:
USANG DAHA' ISRAEL 7: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
