USANG DAHA' ISRAEL 6
6
Tuhan muvui Musa
1 #
Us 3:13-15
Ken Allah men Musa la'an, “Akui nah Tuhan. 2Akui uh petula batung Kui men Abraham, Ishak, dahin Yakub, petula Akui aleng Allah Aleng Lalau Ningan, bi nusi' payan daha' jam aran Kui Tuhan, avin nusi' payan Kui petula batung Kui nunan men daha'. 3Akui uh té' na jaji dahin daha' ma'uk tana Kanaan men daha', tana ngavan daha' melo' awi kelunan sawih. 4Té' pah lahuh hu'uh Ek kelenghi nah dahun angih daha' Israel aleng en daha' Mesir ngedipen atih, Akui pah hituk té' jaji Kui. 5Avin anan, bara nah Dahuk anih men daha' Israel, ‘Akui nah Tuhan, Akui seng mekau ikam men katé' aleng en daha' Mesir na té' ikam anan, dahin makau ikam men alem dipen daha', dahin ala ikam uli té' usu Kui aleng Ek jei anih, dahin té' ukum aleng bahat. 6Akui seng na ikam jadi' pahu Kui, Akui nah seng jadi' Allah kam, ja ikam jam Akui nah Tuhan aleng Allah kam, aleng makau ikam men hadui aleng en daha' Mesir ngepden ikam na atih. 7Akui seng geri ikam ha' daléh aleng uk Ngavak tevah na jaji seng Ek uk men Abraham, Ishak dahin Yakub atih. Akui seng ma'uk na' men ikam en kam sengayan. Akui nah Tuhan.’ ” 8Nunan nah Musa bara daha' Israel, bi nusi' daha' kelenghi dahun Musa, avin daha' uh pah kenep kenan hadui aleng bahat atih.
9Tuhan kuma' men Musa la'an, 10“Tei nah im pala Firaun laja' Mesir anan, nyihu iha' mekoh daha' Israel musang men daléh na' anan.”
11Bi ken Musa men Tuhan, “Daha' Israel anan pah aleng em kelenghi dahuk lahuh, lalau lan pah Firaun anan, seng kaséh ha' kelenghi dahuk lahuh iah, avin akui ji kelunan aleng em tugé' duan nih.”
12Iha' nah Tuhan duan Musa dawa' Harun, nangen dawa' lelan tei pala daha' Israel dahin pala Firaun laja' Mesir, dahin geri daha' Israel musang men Mesir.
Aran pahu-pahu Musa dawa' Harun
13Anih nah lima daha' aleng dekaya' alem ha'ut pahu daha':
Anak-anak aké' Ruben aleng anak una' Israel, iha' nah Henokh, Palu, Hezron, dahin Karmi, anan nah lim daha' panak Ruben.
14Anak-anak Simeon iha' nah Yemuel, Yamin, Ohad, Yakhin, Zohar dahin Saul aleng anak ji doh Kanaan, anan nah lim daha' panak Simeon.
15 #
Kah d Is 3:17-20; 26:57-58; 1 Tuk 6:16-19 Anih nah aran anak aké' Lewi, dahin panak-panak dalo': Gerson, Kehat dahin Merari. Umun Lewi ji atuh telo'-pulu-tusu duman.
16Anak-anak aké' Gerson: Libni dahin Simei dahin panak-panak dawa'.
17Anak-anak aké' Kehat: Amram, Yizhar, Hebron dahin Uziel. Umun Kehat ji atuh telo'-pulu-telo' duman.
18Anak-anak aké' Merari: Mahli dawa' Musi.
Anan nah lim daha' pahu Lewi, ngioh panak-panak dalo'.
19Amram ala nah Yokhebed aleng harin taman na' jadi' doh na', doh anih nah aleng hinan Harun dawa' Musa. Umun Amram ji atuh telo'-pulu-tusu duman.
20Anih anak aké' Yizhar: Korah, Nefeg dahin Zikhri.
21Anak-anak aké' Uziel: Misael, Elsafan dahin Sitri.
22En Harun ala nah Eliseba, anak Aminadab aleng doh, harin Nahason aleng doh, doh anan nah aleng nganak Nadab, Abihu, Eleazar dahin Itamar.
23Anak-anak aké' Korah: Asir, Elkana dahin Abiasaf, anan nah lim daha' panak-panak Korah.
24Eliazar anak Harun ngehawa' pah ji anak doh, anak Putiel, doh anih nah aleng nganak Pinehas.
Anan nah lim daha' aleng taman-taman daha' pahu Lewi dahin lim panak-panak daha'.
25Harun dawa' Musa nah aleng en Tuhan duan, “Geri nah daha' Israel anan musang men tana Mesir, ngioh peng-peng daha',” ken Tuhan. 26Musa dawa' Harun anih nah aleng tei tengaran dahin Firaun laja' Mesir, ja dawa' geri daha' Israel musang men daléh Mesir.
Harun aleng pejoh dahun Musa
27Tegu Tuhan tengaran dahin Musa ha' daléh Mesir, 28iha' nah Tuhan kuma' men iha', “Akui nah Tuhan. Tei nah im bara lim-lim Dahuk nih men Firaun laja' Mesir, iha' tih nira lim-lim daho' aleng Ek bara ika' anih.”
29Bi Musa kuma' men Tuhan, “Bi akui anih ji kelunan aleng em tugé' duan, seng nuno' tekep Firaun kaséh kelenghi dahuk du?”
Currently Selected:
USANG DAHA' ISRAEL 6: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
