USANG DAHA' ISRAEL 5
5
Musa dawa' Harun ha' unan laja' daléh Mesir
1Lun tei nah Musa dawa' Harun pala Firaun, ken dawa' men iha', “Nunih nah dahun Tuhan, Allah Israel, ‘Bei nah daha' pahu Kui anan tei, ja daha' na ji kuman aya' men Akui ha' tana ngahit tih.’ ”
2Bi ken Firaun, “Tuhan nuno' aleng tekep seng ek ngioh dahun Na', dahin mekoh kelunan Israel anan tei? Nusi' kui jam Tuhan anan, nusi' pah akui mun kelunan Israel nan tei.”
3Iha' nah Musa dawa' Harun kuma', “Té' Allah daha' Ibrani uh nei pesuk kawa'. Bei nah lim kamé' tei ha' tana ngahit ateng telo' dau su anau na' men inih, ja kamé' ma'uk ket en amé' tevek bara bun usu amé' men Tuhan Allah amé' atih, ja meng nah Iha' menei perah pegei té' kamé', iha' ha' em nunan pah, bahi malat pah nei maté' kamé',” ken dawa'.
4Bi ken laja' Mesir men dawa', “U Musa, Harun, na' nun kua' peletu daha' anih té' hadui daha' aleng en daha' na men akui? Tei nah kua' na hadui kua' tih.” 5Ken Firaun la'an, “Nyineng kua' bangsa' kua' anih uh huwi kahum alem daléh anih, seng deng kua' nyapat daha' anih na hadui daha' anan iah?”
6Dau anan, en Firaun bara nah daha' aleng dekaya' alem hadui dahin daha' aleng madun alem hadui anan, nunih dahun na', 7“Men dau anih meng nah ikam ma'uk jemé' la'an men daha' bengsa' anan ngavan daha' na bato' bata, no' bei daha' tei ilau dep men daha'. 8Nyihu nah daha' na bato' bata anan piah kahum dehalem dahin duji dih, meng ha' seng kanya, no' bei daha' la'ei. Avin daha' lekoh kah daha' medéng-medéng nunan nan, ‘Bei nah kamé' tei ma'uk bun usu amé' men Allah amé',’ ken daha' kah. 9Sayu nah na hadui daha' sa'-sa' bahat, ja daha' sa' kalen té' hadui daha', meng nah daha' kelenghi daho' amoh anan.”
10Tei nah daha' aleng dekaya' alem hadui dahin daha' aleng madun daha' nyadui anan bara daha', “Nunih nah dahun Firaun, ‘Nusi' nah akui ma'uk jemé' men ikam la'an. 11Ikam dep nah tei ilau, hino'-hino' kam tei ilau, tei nah ikam tua, bi bato' bata en kan na, meng ha seng kanya men'uh aleng uh kam na malei.’ ” 12Pelalau petat tua nah daha' anan alem daléh Mesir tei ilau tungun jelei pasé' ja atih kalui jemé' parei. 13Daha' aleng dekaya' alem hadui daha' anan pah meté' nimah daha', dahin kuma', “Pek'uh nah hadui kam ana, ngioh hadui kam aleng en kam na ha'ut dau, awi men alem ha' té' jemé' dih.” 14Daha' Mesir aleng dekaya' alem hadui atih jeliket daha' Israel aleng madun-madun atih, dahin kuma' men daha', “Dehalem dih dahin dau anih, na' nun ikam em na bato' bata piah kahum awi aleng uh kam na una' dih?”
15Men'uh anan tei nah lim daha' Israel aleng jadi' madun atih pala Firaun dahi kuma', “U laja', nun lalé' ka' na nunan té' kamé' panyin ka' anih? 16Jemé' pah em té' en uk men kamé' la'an, bi alem ha' nunan pah, kamé' en daha' ngepden pa'en na bato' bata, en daha' jeliket pah kamé', aleng lan na', daha' panyin ka' bengsa' ka' anan kah aleng sala.”
17Ken Firaun nyu'ei, “Ikam kelalau lalé lekoh kah pa, uvung lekoh kam nunan kah ikam kuma' nunih tih pa, ‘Kelung nah kamé' tei ja kamé' bara bun usu amé' men Tuhan,’ ken kam kah. 18Tei nah kerei inih, na hadui kam atih, nusi' kamé' seng ma'uk jemé' men ikam la'an, bi nusi' deng iha' em piah kahum na' pa'en bato' bata anan en kam na.” 19Men dau anan iha' nah daha' Israel aleng madun men daha' anan jam daha' té' alem katé' lan, avin daha' Mesir kuma' men daha', “Meng peletu kan tei ngurang bato' bata en kam na ha'ut-ha'ut dau.”
20Tegu daha' leka' men béh Firaun, daha' pah pepsuk dahin Musa dawa' Harun aleng pidah daha', 21ken daha' men dawa', “Sayu nah Tuhan pelemana' kua', dahin petneng tuk-tuk anih, avin kua' uh peji'ek aran amé' ha' unan Firaun dahin lim daha' panyin-panyin na', nurei pah lahuh kua' uh ma'uk malet men daha' ngavan daha' lematei kamé'.”
Musa sebayang té' Tuhan
22Iha nah Musa sebayang té' Tuhan, ken na', “Tuhan, na' nun Ka' sa' mi'at katé' té' daha' anih? Na' nun Ka' nyihu akui nei anih di du? 23Avin men aring akui tei pala Firaun ja tengaran dahin na' alem aran Ka', beka' iha' sa' na ji'ek té' daha' pahu anih, Ikaa' pah em makau daha' lahuh.”
24Bi ken Tuhan men Musa, “Kerei inih iha' ika' seng jam ket aleng seng Ek na té' Firaun kenan usu Kui aleng tu'a anih, adang iha' peden seng mekoh daha' tei na'a. Kenan usu aleng ningan anih na iha' seng muga daha' leka' men daléh na',” ken Na'.
Currently Selected:
USANG DAHA' ISRAEL 5: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
