USANG DAHA' ISRAEL 37
37
Na Pati Avan Jaji Atih
Us 25:10-22
1En Bezaleel ala nah kayo' penaga, en na' na pah Pati Avan Jaji atih, arun na' ji meter#37:1 JI METER iha' tih 5 puhek., ayan na' tusu-pulu sentimeter#37:1 70 SENTIMETER iha' tih 3 puhek., bau na' tusu-pulu sentimeter lahuh. 2En na' usut met telesen halem dahin hawang na', en na' na bau tevei balan na', met kah en na' na lahuh. 3En na' na pah pat belegin met jeleng-jeleng balan tukuk Pati atih, dua' bah ji dua' pah bah ji. 4En na' ala nah kayo' penaga ngavan pektang na', en na' na dua' kayo' tang na' atih, dahin musut met té' iha' lahuh. 5En na asuk nah kayo' tang atih halem belegin atih, ja té' ngavan metang pati anan. 6En na' na nah ben ngavan pekesayu na ngavan asi Allah, arun na' ji meter, ayan na' ji unang meter. 7En na' nyelung pah met en na' na dua' meliket kerub té' ujung ben ngavan pekesayu na atih dih, en na' nukun-nukun na na', 8ji meliket kerub en na' na uveng anih, ji meliket kerub en na' na uveng atih. 9Kapit dawa' meliket kerub atih peting bau, kapit dawa' nah aleng nyingau ben ngavan pekesayu na atih, neng dawa' petelunga', dahin nyineng pala ben atih dih.
Na mija' ngavan ma'uk luti men Tuhan
Us 25:23-30
10En na' na nah mija' lahuh, kayo' penaga loh kah en na' ala en na' na na', arun na' ji meter, ayan na' ji unang meter#37:10 JI UNANG METER iha' tih 2 puhek huwi. Alem dahun daha' Yahudi lim tuken anih adang tepet, bi avin ha' dep aran tuken tam iha' nah iha' awi em tepet jam na' pedung., bau na' ji unang meter. 11En na' usut nah met telesen té' iha', en na' na bau tevei balan na' té' met. 12Tekulung tevei balan na' pah en na' na lahuh, bau berang kamah, en na' na bau la'an pah tevei balan tekulung atih, met lim kah en na' na lahuh. 13En na' na pah pat belegin met, en na' tei nah belegin-belegin atih jeleng balan tukuk na', iha' tih té' ha'ut kudek na' atih, jeleng tekulung na'. 14Alem na' nah daha' masuk kayo' tang na', ja daha' deng metang mija' anan. 15En na' na pah dua' kayo' tang na', kayo' penaga en na' ala en na' na, en na' usut met lim pah té' iha lahuh. 16Uh anan en na' na nah uvung-uvung mija' atih, iha' tih uit seletah, uit makuk, tebuk bau dahin tebuk liva awi tebuk malei, té' ket anan nah daha' pakei muak ket nun-nun en du'i, met telesen lim-lim en na' na ket anan.
Na lirui met
Us 25:31-40
17En na' na pah lirui, met telesen en na' na, en na' nukun-nukun na na', ladung na', iung na', kelekuset na', kelalem na', nurei pah bunga'-bunga' aleng awi pidang-pidang na' pejulun piah té' iha' lahuh.
18Nem hangat en na' na té' béh na', telo' bah ji telo' pah bah ji. 19Té' ha'ut-ha'ut hangat na' en na' na telo' kelekuset piah jam bua badam dih, en na' na pah kelalem na' dahin na bunga' aleng awi pidang bunga' té' iha' lahuh. 20Té' ha'ut-ha'ut hangat lirui atih en na' na pah pat kelekuset awi jam bua badam, nurei pah kelalem na', dahin na bunga' aleng awi pidang jam na'. 21En na' na pah ji kelalem hida ha'ut-ha'ut pa'un hangat na'. 22Kelalem dahin hangat-hangat na' atih en na' na peging té' iung lirui atih, lim anan met telesen en na' na, en na' nukun-nukun na na'. 23En na' na pah tusu lirui na' tei té' hujung ha'ut iung lirui atih, en na' na pah ketip na' dahin gasa' na', met telesen lim kah anan lahuh. 24Telo'-pulu-pat kilogram#37:24 34 KILOGRAM iha' tih 56 kati' huwi. met telesen en na' na lirui anan dahin lim uvung-uvung na' atih.
Na avo' ngavan mahun ket aleng sayu bu na'
Us 30:1-5
25En na' na pah avo' ngavan mahun ket aleng sayu bu atih, kayo' penaga kah en na' na, arun na' ji unang meter, nurei pah ayan na' lahuh, besagi' pat, bau na' ji meter, idoh-idoh na' en na' na peging té' avo' anan. 26En na' usut met telesen té' lagah na' dahin té' lim liding na' nurei pah té' lim idoh na' atih. En na' na bau pah tevei balan na', met kah en na' na lahuh. 27En na' na pah dua' belegin met, na' tei té' sepipah balan avo' anan behida' na', atih nah ngavan masuk kayo' tang na', ja ngavan metang na'. 28En na' na pah kayo' tang na', kayo' penaga kah en na' na, en na' usut met lim kah lahuh.
Na kenyu ngavan daha' ngenyu dahin ket aleng bu sayu en daha' pahun
Us 30:22-38
29 #
Us 30:22-38
En na' na pah kenyu aleng ma'ang ngavan daha' ngenyu, dahin ket en daha' pahun aleng ma'ang lahuh, aleng na bu sayu atih, daha' aleng haman na bu sayu kah aleng na na'.
Currently Selected:
USANG DAHA' ISRAEL 37: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
