USANG DAHA' ISRAEL 36
36
1“Sayu Bezaleel dawa' Aholiab dahin daha' aleng en Tuhan uk ugé' dahin haman na nun-nun hadui meju Ngavan Aleng Ma'ang atih, ngioh aleng uh en Tuhan bara atih,” ken Musa.
Kahum lan ket en daha' Israel uk
2En Musa uvui nah Bezaleel dawa' Aholiab dahin lim kelunan aleng tugé' aleng en Tuhan uk ugé' alem kenep daha' atih dih, dahin muvui daha' aleng ngenep masi tua na hadui atih lahuh. 3Nei nah daha' ala ket aleng hu'uh en daha' Israel uk atih ha' Musa, iha' tih ket aleng seng en daha' na Lepau Tuhan atih. Tegu daha' anan nei ala na' nunan, beka' té' loh kah daha' Israel nei maten ket en daha' uk men Musa tih ha'ut jihima. 4Daha' aleng tugé' na hadui Lepau Tuhan anan dih pah melek hadui daha' jaki tei bara Musa, 5ken daha' men iha', “Té' loh kah daha' nei geri ket en daha' geri ré', bi uh huwi nah men'uh aleng seng en pakei ngioh aleng kurin Tuhan en tam na atih,” ken daha'.
6En Musa na nah daho' men daha' bara daha' lim-lim ha'ut lepau em mun daha' nei geri la'an, “Meng nah pekwat kelo' laké' dahin kelo' doh nei ma'uk ket en kam uk na Lepau Tuhan tam la'an,” ken Musa nah nyapat daha', iha' nah daha' lasi em ma'uk la'an, 7avin lim ket aleng uh en daha' geri atih pah uh sukup nah té' hadui atih, bi uh huwi pah atih lahuh.
Na Lepau Avan Tuhan
Us 26:1-37
8Lim daha' aleng tugé' men hang daha' tukeng-tukeng anan dih na Lepau Avan Tuhan anan, iha' tih pakei pulu li'ap balun aleng en daha' anyam men uvan puti lanih dahin uvan nyemit awi langit, uvan nyemit mavoh dahin uvan bela ngelehirang. En daha' anyam sayu-sayu nah, en daha' na pah gaben meliket kerub té' iha' lahuh. 9En daha' na pulu-dua' meter ji unang#36:9 12 METER JI UNANG iha' tih 6 depa' ji unang. arun ha'ut-ha'ut balun atih, berang na' dua' meter#36:9 2 METER iha' tih ji depa' huwi., piah lim kah arun na', piah pah berang na' lahuh. 10Lima' balun atih en daha' ngepet pething jadi' ji tua, nunan pah lima' aleng la'an atih en daha' ngepet jadi' ji. 11En daha' na nah pakau-pakau té' balan balun aleng en daha' pething una' atih, nunan pah daha' na pakau té' balan ji aleng en daha' pething baya atih lahuh. Uvan nyemit awi langit en daha' na. 12En daha' na pah lima'-pulu pakau té' balan balun aleng en daha' pething una' atih, nunan pah té' aleng kedua', ja ha' jadi' petuk. 13En daha' na pah lima'-pulu kawit met ngavan petuk dua'-dua' balun Lepau Tuhan atih pakei kawit met atih, jadi' ji tua nah.
14En daha' na pah pulu-ji balun men bulun kading la'an hapau Lepau Avan Tuhan anan. 15Arun ha'ut-ha'ut balun bulun kading anan en daha' na, arun na' pulu-telo' meter ji unang#36:15 13 METER JI UNANG iha' tih 7 depa' ji unang., berang na' dua' meter. 16En daha ngepet pething nah lima' balun bulun kading atih, nurei pah daha' na nem atih lahuh. 17En daha' na nah lima'-pulu pakau té' ji balun bulun kading aleng en daha' pething una' atih, nunan pah té' aleng kedua' atih. 18En daha' na pah lima'-pulu kawit temaga' en daha' tei té' pakau atih ngavan pelapit balun Lepau Avan Tuhan atih, ja ha' jadi' ji tua. 19En daha' na pah ji tebin hapau Lepau Avan Tuhan atih la'an, iha' tih anit duba laké' aleng en daha' ngareng bela, en daha' na pah anit masik aya' en daha' tei pedah hujung anit duba atih dih la'an lahuh.
20En daha' na nah tegan kayo' penaga tegan liding Lepau Avan Tuhan atih. 21Arun ha'ut-ha'ut tegan liding anan pat meter ji unang#36:21 4 METER JI UNANG iha' tih 2 depa' ji unang., berang na' tusu-pulu sentimeter#36:21 70 SENTIMETER iha' tih 3 puhek.. 22Ha'ut-ha'ut tegan liding atih en daha' na dua' kudek na' ngavan patah-patah lim tegan liding Lepau Avan Tuhan atih. 23En daha' na pah dua'-pulu tegan liding Lepau Avan Tuhan atih aleng men pedah ta'o matan dau pa'un. 24En daha' na pah pat-pulu sut tegan ngavan kudek dua'-pulu tegan liding atih nesut, pirek en daha' na. 25Bah ulei matan dau pa'un té' Lepau Avan Tuhan anan, en daha' na pah dua'-pulu tegan liding na' lahuh, 26pat-pulu loh kah sut tegan ngavan kudek tegan liding na' nesut, pirek loh kah en daha' na. 27Nem tegan liding en daha' na ha' pedah jenamin Lepau anan, iha' tih men pedah matan dau uli. 28En daha' na peging pah dua' tegan liding ha'ut tukuk na' ha' uveng na' jenamin. 29En daha' na pelapit nah dua' tegan liding tukuk anan men ida ateng hujung, ji tua belegin aleng té' iha' atih. Nunan nah tuk daha' na dua tegan liding aleng tukuk-tukuk lepau anan. 30Jadi' saya' nah tegan liding ha' tukuk-tukuk anan hujung pulu-nem sut atih, avin dua' sut té' ha'ut-ha'ut ji tegan atih.
31Kayo' penaga pah en daha' na selatek na', lima' selatek na' bah ji, 32nurei pah bah ji té' Lepau Avan Tuhan atih, lima' pah selatek na' men pedah jenamin, iha' tih men pedah matan dau uli. 33Kayo' selatek aleng marung belua atih en daha' tei men alem tegan liding anan, men uveng ji tei ateng uveng ji. 34Lim-lim tegan liding atih en daha' usut met, en daha' na pah belegin met ngavan masuk kayo'-kayo' selatek atih, kayo'-kayo' selatek atih pah en daha' usut met lim pah lahuh.
35En daha' na nah balun liding na', iha' tih balun nyemit awi langit dahin balun nyemit mavoh, balun bela ngelehirang dahin balun puti lanih anyam na', en daha' na pah gaben meliket kerub té' iha', daha' aleng tugé' na balun daha' kah aleng na ket atih. 36En daha' na pah pat jihé' kayo' penaga, en daha' usut met, té' pah kawit met daha' tei té' jihé' atih, en daha' na pah sut jihé' atih, pirek en daha' na.
37En daha' na pah balun ba Lepau Avan Tuhan atih, balun nyemit awi langit, balun nyemit mavoh, balun bela ngelehirang dahin balun puti aleng lanih aleng kalung-kalung anyam na', 38en daha' na pah lima' jihé' na' dahin kawit na'. Bulan lima' jihé' atih pah en daha' usut met, dahin lim tuk-tuk na' pah en daha' usut met lim lahuh, bi lima' sut jihé' atih, temaga' kah en daha' na.
Currently Selected:
USANG DAHA' ISRAEL 36: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
