USANG DAHA' ISRAEL 38
38
Na avo' ngavan mahun laluh men Tuhan
Us 27:1-8
1En na' na nah avo' ngavan mahun laluh men Tuhan atih, kayo' penaga pah en na' ala, en na' na, arun na' dua' meter nurei pah ayan na' lahuh, besagi pat, bau na' ji meter ji unang. 2En na' na pah idoh na' té' ha'ut-ha'ut tukuk na' behujung peging té' iha', avo' anan en na' usut temaga'. 3En na' na pah lim uvung avo' anan, iha' tih taring na', sekup na', uit bisin, kagap dahin tuhei na', temaga' en na' na lim ket anih. 4Lagah ngavan apui en na' na kawang-kawang awi matan jala dih, en na' tei halem na' marung belua avo' anan, temaga' kah en na' na ket anih. 5En na' na pah pat belegin tei té' ha'ut tukuk lagah anan dih ngavan masuk kayo' tang na'. 6Kayo' penaga pah en na' ala en na' na, en na' usut temaga' pah lahuh. 7En na' asuk nah kayo' tang atih halem, sepipah avo' atih dih, ngavan metang na'. Avo' anan en na' na pegawah, tegan kah en na' na.
Na pasau temaga'
Us 30:18
8 #
Us 30:18
En na' na nah ji pasau temaga' ngavan mayau lahuh, ladung ngavan na' pah en na' na men temaga', men kelingei-kelingei temaga'#38:8 Kelingei daha' menuna' en daha' na men temaga'. Daha ngahin-ngahin na', dahin musu na' ateng ha' ngetirit. dalo' doh aleng nyadui ha' jenawa ba Lepau Avan Tuhan anan aleng en na' na.
Na latan Lepau Avan Tuhan
Us 27:9-19
9En na' nemei nah latan na', arun latan na' pedah ulei matan dau pa'un pat-pulu-nem meter#38:9 46 METER iha' tih 25 depa'., balun puti lanih anyam na' pah en na' na kelahen na' lahuh. 10Dua'-pulu jihé' na' dua'-pulu pah sut jihé' na' lahuh, temaga' lim kah en na' na, bi kawit-kawit dahin kameng-kameng jihé' anan pirek. 11Nunan loh kah pedah ta'o matan dau pa'un lahuh. 12Latan pedah matan dau uli arun na' dua'-pulu-telo' meter, balun puti lanih pah en na' na kelahen na', en na' na pulu jihé' na' pulu pah sut jihé' na' lahuh, pirek en daha' na kawit-kawit dahin kameng-kameng jihé' na'. 13Nunan kah arun pedah matan dau pa'un lahuh, dua'-pulu-telo' meter arun na'. 14Bah ji ba na' en daha' na pah balun tusu meter arun na', en daha' na telo' jihé' na' telo' pah sut jihé' na lahuh, 15nunan loh kah bah ji ba anan lahuh. 16Balun puti lanih anyam na' en daha' na kelahen teliling latan lepau anan. 17Temaga' lim kah sut-sut jihé' na', bi kawit-kawit dahin kameng-kameng jihé' anan pirek en daha' na, pirek pah en daha' tei ujung bulan jihé' na' atih. Pirek lim-lim aleng kameng aleng puvung té' jihé' kelahen latan atih. 18Balun ketamen kelahen anan en daha' anyam kalung-kalung té' uvan nyemit awi langit, uvan nyemit mavoh, uvan bela ngelehirang dahin balun puti lanih anyam na'. Arun na' pitan meter, bau na' dua' meter, piah tua bau balun kelahen latan atih. 19Pat jihé' na', pat pah sut jihé' atih, temaga' lim kah en na' na, bi kawit-kawit dahin kameng-kameng jihé' anan pirek en na' na, pirek pah en na' tei té' bulan jihé' anan behujung lahuh. 20Temaga' lim kah en na' na jek Lepau Avan Tuhan anan dahin jek kelahen na' lahuh.
Belaja' meju Lepau Avan Tuhan
21Nunih nah tuk belaja' daha' na Lepau Avan Tuhan, iha' tih Lepau Ngavan Jaji Allah atih. Kelunan Lewi atih aleng mujap na' lim hu'en Musa, Itamar anak Harun aleng imam atih pah aleng mayak daha' ngalung lim-lim ket atih.
22Bi Bezaleel anak Uri sau Hur men pahu Yehuda aleng na lim ket aleng en Tuhan bara men Musa atih. 23Aholiab anak Ahisamakh men pahu Dan pah aleng dahin na' lahuh, iha' tih ji laké' aleng tukeng dahin tugé' aleng haman ngalung-ngalung na ket panyam-panyam pakei uvan nyemit awi langit dahin uvan nyemit mavoh dahin uvan bela ngelehirang dahin uvan puti lanih.
24Lim bahat met aleng en pakei na Lepau Avan Tuhan anan pitan atuh nem-pulu-saya' kilogram#38:24 968 KILOGRAM iha' tih 16 pikun huwi., en nebangan té' tebangan Lepau Avan Tuhan. 25#Us 30:11-16 Lim bahat pirek aleng en daha' ala té' daha' aleng ga' ujap atih telo' tan ji unang#38:25 3 TAN JI UNANG iha' tih kio'-kio' 56 pikun ji unang., en nebangan pakei tebangan Lepau Avan Tuhan. 26#Mat 17:24 Ha'ut-ha'ut la'ung daha' ma'uk nem gram#38:26 6 GRAM iha' tih ji amat ji unang, awi ji kujut lahuh., kahum la'ung daha' aleng ma'uk té' nem atuh telo' libu' lima' atuh lima'-pulu la'ung, iha' tih daha' aleng uh ateng dua'-pulu duman umun daha' ateng daha' aleng dekaya'. 27Pirek telo' tan ji unang atih en daha' pakei na sut tegan men Lepau Avan Tuhan dahin men jihé' ketamen balun na', ji atuh kahum sut en daha' na men pirek atih, ji sut tih telo'-pulu-pat kilogram#38:27 34 KILOGRAM iha' tih 56 kati'. pirek en daha' pakei. 28Pirek dua'-pulu kilogram#38:28 20 KILOGRAM iha' tih 33 kati'. aleng i'at na' atih en daha' pakei na kawit-kawit jihé' dahin tei té' bulan jihé' pedah hujung dahin en na kameng-kameng jihé' lahuh. 29Lim bahat temaga' aleng en daha' uk anan dua' tan ji unang#38:29 2 TAN JI UNANG iha' tih 40 pikun. dahin dua'-pulu-tusu kilogram#38:29 27 KILOGRAM iha' tih kio'-kio' 44 kati'. i'at na' lahuh. 30Temaga' anan nah en daha' pakei na sut jihé' ba Lepau Avan Tuhan anan, dahin na avo' ngavan mahun laluh dahin na lagah na' dahin lim-lim uvung na', 31dahin lim sut-sut jihé' teliling Lepau Avan Tuhan dahin en tei té' jihé' ba na' lahuh, nurei kah en daha' na jek-jek Lepau Avan Tuhan dahin en daha' na kelahen teliling na' atih lahuh.
Currently Selected:
USANG DAHA' ISRAEL 38: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
