USANG DAHA' ISRAEL 35
35
Marung tuk Dau Kelarah
1Lun en Musa nyihu nah daha' Israel pepeng, kuma' nah iha' men daha', “Nunih nah dahun Tuhan aleng en Na' nyihu itam na. 2#Us 20:8-11; 23:12; 31:15; 34:21; Lewi 23:3; Kel d M 5:12-14 Alem nem dau itam nyadui na ket en tam na. Té' dau aleng ketusu, anan nah dau ngavan tam ngeta', iha' tih Dau Kelarah aleng ma'ang, Dau Kelarah Tuhan. Ha'ut la'ung aleng nyadui tegu dau anan sayu nah lematei iha'. 3Meng pangu apui hino'-hino' ha' ngavan kam lahuh tegu dau anan, ken Na' di,” ken Musa.
Daha' ma'uk ket en daha' uk na Lepau Tuhan
Us 25:1-9
4Lun en Musa bara nah lim daha' Israel nan, “Nunih dahun Tuhan dih: 5Nulan nah daven kam en uk men Akui. Ha'ut-ha'ut la'ung aleng nyi'an kenep na' en na' geri nah daven na', en na' uk men Akui, iha' tih met, nunan kah pirek, temaga', 6balun nyemit awi langit, balun nyemit mavoh, balun bela ngelehirang, balun puti lanih, bulun kading, 7anit duba laké' aleng en ngareng bela, anit masik aya', kayo' penaga, 8nyak lirui, tuk uro' aleng en kam na kenyu aleng bu sayu atih ngavan daha' ngenyu dahin na ket bu sayu aleng en pahun, 9bato' unam dahin bato' aleng en tei té' basung efod imam dahin en tei té' belasang na' lahuh, ken Na' di,” ken Musa.
Uvung-uvung Lepau Tuhan
Us 39:32-43
10“Lim-lim kelunan aleng tukeng men ikam sayu nah lim daha' nei na ket aleng hu'en Tuhan na anih, 11iha' tih na Lepau Tuhan, na hapau na' dahin balun aleng tabun na', na kawit-kawit na', tegan liding na', kayo' selatek na', jihé' na' dahin na sut jihé' na', 12nurei pah na Pati Avan Jaji atih lahuh dahin kayo' tang na', dahin na ben aleng ngavan pekesayu na dahin balun liding na', 13nurei pah na mija' dahin kayo' tang na', dahin na lim-lim na'an uvung-uvung na' dahin na luti aleng en uk men Tuhan lahuh, 14nurei kah na iung lirui dahin lim uvung na', dahin na batung lirui na' tih dahin nyak na' lahuh, 15na avo' ngavan mahun ket aleng bu sayu dahin kayo' taang na', dahin na kenyu dahin tuk uro' aleng bu sayu atih lim lahuh, dahin na ba Lepau Tuhan atih pah lahuh, 16dahin na avo' ngavan mahun laluh dahin na temaga' lagah na', na kayo' tang na' dahin lim uvung-uvung na', na pasau ngavan mayau dahin ladung na', 17na balun kelahen na', dahin na jihé'-jihé' na' lahuh, na sut jihé' dahin balun ba kelahen na' lahuh, 18na kayo' jek Lepau Avan Tuhan dahin kayo' jek kelahen, dahin talé' na' pah en tam na lahuh. 19Na kanan daha' aleng na hadui imam ha' ngavan aleng ma'ang atih pah lahuh, men imam Harun, dahin kanan dalo' anak na' aleng na hadui imam atih lahuh.”
Daha' nei geri daven daha' na Lepau Tuhan
20Lun peju nah daha' Israel men unan Musa. 21Uh anan nei nah daha' aleng nyi'an kenep daha' aleng ngenep masi hadui Tuhan nei geri ket en daha' geri ngavan na Lepau Tuhan dahin ngavan na hadui halem na', dahin geri ket en daha' na kanan aleng ma'ang men imam lahuh. 22Daha' laké' dahin daha' doh pah lahuh nei, hi-hi tua aleng nyi'an kenep daha' en daha' aten nah teba'eng met daha', iseng met, selegem, dahin keluseng met, no' ketu-ketu na'an daven met daha' en daha' geri lim nah, tegak tua nah daha' kelunan nei geri met daha' en daha' jei men Tuhan. 23Nunan pah kelunan aleng hipun balun nyemit awi langit, balun nyemit mavoh, balun bela ngelehirang, balun puti lanih, bulun kading, anit duba laké' aleng en ngareng bela dahin anit masik aya', en daha' geri nah daven daha' atih men Tuhan lahuh. 24Hi-hi aleng ngenep ma'uk pirek dahin temaga', daha' anan pah nei geri anun daha' lahuh ma'uk na' men Tuhan. Nurei pah kelunan aleng hipun kayo' penaga, daha' pah nei maten na' lahuh ngavan na Lepau Tuhan atih. 25Daha' doh aleng haman manyam balun pah nei geri balun daha' aleng uh en daha' anyam atih, iha' tih balun nyemit awi langit, balun nyemit mavoh, balun bela ngelehirang dahin balun puti lanih. 26Daha' doh aleng nyi'an kenep masi atih pah manyam bulun kading lahuh. 27Kelunan aleng mayak daha', daha' atih pah nei geri bato' unam dahin bato' aleng en daha' tei té' basung efod imam dahin tei té' belasang na' lahuh 28En daha' aten pah tuk uro' aleng bu sayu dahin nyak zaitun men lirui, dahin men kenyu aleng seng en daha' usut dahin men ket aleng bu sayu aleng seng en daha' pahun. 29Lim-lim daha' laké' dahin daha' doh aleng nyi'an kenep pah nei geri ket en daha' uk atih men Tuhan, ja ha' té' lim na'an hadui en daha' na ngioh aleng kurin Tuhan men Musa.
Daha' tukeng aleng human na Lepau Tuhan atih
Us 31:1-11
30Iha' nah Musa bara daha' Israel, “Tuhan uh mili Bezaleel anak Uri sau Hur, men pahu Yehuda. 31Iha' uh en Na' ngepnu té' Beluan Na', na iha' tugé' dahin jam dahin haman alem nun-nun hadui, 32iha' tih nyelung na met, pirek dahin temaga', 33ja iha' nyuvei ngalung bato' aleng melegah ja en telepet, na-na kalung kayo' dahin na nun-nun na'an hadui aleng en daha' aleng haman na. 34Tuhan uh ma'uk ugé' alem kenep na' dahin alem kenep Aholiab anak Ahisamakh aleng men pahu Dan lahuh ja dawa' katuk daha' ha' béh. 35Iha' uh ngepnu dawa' té' ugé' na nun-nun na'an hadui aleng en tukeng na, na awi hadui daha' aleng tugé', na awi hadui daha' aleng haman manyam balun, iha' tih men uvan nyemit awi langit, uvan nyemit mavoh, uvan bela ngelehirang dahin uvan puti lanih, dahin na awi hadui daha' aleng haman manyam, iha' tih awi jam tuk na nun-nun na'an hadui dahin na dawa' haman awi daha' aleng haman pelemana' petneng-petneng hadui atih lahuh.
Currently Selected:
USANG DAHA' ISRAEL 35: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
