USANG DAHA' ISRAEL 34
34
Bato' ngavan kalung tebara atih aleng kedua'
Kel d M 10:1-5
1Lun kuma' nah Tuhan men Musa, “Na im dua' li'ap bato' awi aleng una' arei dih. Akui kah ngalung lim Dahuk awi aleng Ek ngalung té' bato' aleng una' aleng im mi'ang arei dih. 2Jihima jima nemei nah im, nei nah im pala Akui ha' ngalang Sinai, nekring nah im ha' ujet ngalang anan ha' unan Kui. 3Meng té' ji la'ung nei dahim, ji-ji la'ung pah meng nei ha' ngalang anan, kading, duba dahin sapi' pah em deng nei kani uro' teliling ngalang anan.” 4Lun en Musa na nah dua' li'ap bato' awi aleng una' arei dih. Jihima sepangen ma'un nah iha' men udu na' pelalau ma'un ngalang Sinai, awi aleng en Tuhan bara men iha', dua li'ap bato' atih dih pah en na' geri.
5Lun nei nah Tuhan té' alem avun, nekring té' béh Musa pelalau metut aran Na' Tuhan. 6#Us 20:5-6; Kah d Is 14:18; Kel d M 5:9-10; 7:9-10 Lun panau nah Tuhan lalau unan Musa pelalau kuma', “Akui nah Tuhan, Tuhan, Akui nah Allah aleng nyalam dahin masi, aru kenep, nyungei asi dahin masi, aru kenep, nyungei asi dahin teneng lan, 7aleng petageng jaji Kui dahin libu'-libu' kelunan, dahin mebet sala, mebet kenep aleng mahing, dahin mebet dusa nun-nun. Bi daha' aleng sala adang Kui mukum daha'. Akui nyulei sala taman daha' ateng anak daha' nurei pah ateng sau-sau daha' dahin ateng tebin daha' aleng ketlo' dahin kepat.”
8Pelalau nah Musa nyepukun ha' tana sebayang té' Tuhan. 9Ken na', “U Tuhan, iha' Ika' lan masi akui, akui akei Ika' nei panau tugung kamé'. Lan pah kenep daha' bengsa' anih mahing lan, Im bet nah sala-sala kamé', Im ala nah kamé' jadi' daven Ka' tua,” ken Musa.
Tuhan bara jaji Na' la'an
Us 23:14-19; Kel d M 7:1-5; 16:1-17
10Lun ken Tuhan nah men Musa, “Kerei ini Akui na ji jaji dahim. Akui seng na hadui té' unan daha' bengsa' anih, iha' tih hadui aleng ngavan daha' ngeniheng. Nusi' peletu payan té' ket nunan uh kitan daha' bengsa' ha' béh té' usun tana anih men'a. Ketu bengsa' aleng murip té' usun tana anih seng jam hadui Kui anih na'a, avin hadui aleng seng Ek na té' ikam anan adang anan kelalau petingan. 11Sayu nah im pa'en hituk té' lim-lim aleng Ek bara men ika' dau anih. Nyineng im, Akui seng muga kelunan Amori, kelunan Kanaan, kelunan Het, kelunan Feris, kelunan Hewi dahin kelunan Yebus men unan kam. 12Mengan sayu-sayu im, meng kam peji pakat dahin daha' ha' daléh aleng ngavan kam seng tei anan, bahi daha' geri ikam tei tasa'. 13#Kel d M 16:21 En kam ngahem nah avo'-avo' laluh daha', jihé'-jihé' hudo' daha' en kam muret, nurei pah tengulun-tengulun daha' en teveng lim lahuh.
14Meng kam sebayang té' ket nun-nun aleng ha' béh, avin Mi'en nah aleng aran Kui nih, huak Kui kuma' mi'en, adang Akui mi'en lan nah anan.#34:14 Mi'en Tuhan atih ji na'an mi'en aleng sayu. Kitan Na' nah daha' aleng sebayang té' ket ha' béh seng ga' katé aya', iha' nah Iha' mi'en alem halam Na', em kaséh daha' seng ga' tusah.
15“Meng kam peji pakat dahin daha' daléh anan, avin tegu daha' tei ngetalau hudo' daha' dahin na nun-nun men ket en daha' ketalau atih dahin ma'uk laluh men daha' kah, adang daha' seng mavéh ikam tei kuman kanen aleng en daha' uk laluh atih. 16Awi anak aké' kam ngehawa' anak doh daha', adang anak doh daha' anan ngenep ngioh ket en daha' ketalau atih, ujung-ujung en daha' nyihu pah ikam tei ngetalau hudo'-hudo' daha', ujung-ujung pekioh tua pah daha' anak kam tei na'a.
17 #
Us 20:4; Lewi 19:4; Kel d M 5:8; 27:15 “Meng kam nyelung ket nun-nun jadi' hudo' en kam ketalau.
18 #
Us 12:14-20; Lewi 23:6-8; Kah d Is 28:16-25 “Dau Aya' Luti Aleng Em Té' Tavah na', sayu kam na na' pa'en. Tusu dau dara na' ikam kani luti aleng em té' tavah té' iha', iha' tih awi aleng uh Ek bara men ika'. Té' jaka' aleng uh en petneng pa'en alem bulan Abib atih en kam na na', avin alem bulan Abib anan nah ikam musang men daléh Mesir dih.
19 #
Us 13:2
“Lim-lim anak una', Akui aleng hipun anan, nurei kah anak hulung kam aleng una'-una' aleng laké' lahuh, nurei kah anak sapi', nurei pah anak duba lahuh. 20#Us 13:13 Bi tana' ha' laké' anak keledei kam aleng aring-aring ha' nganak iha' kam ngenep hipun iha' sayu kam ma'uk anak duba kalui na'. Tana' ikam em ma'uk kalui na', sayu kam jelevin keran na' tua. Nurei kah ha'ut anak aké' kam aleng una', iha' ikam ngenep iha' sayu nah ikam ma'uk kalui daha' men Akui, ja ikam hipun daha'. Meng ji la'ung pah men ikam nei tua-tua ha' unan Ku iha' em té' ket na' uk men Akui.
21 #
Us 20:9-10; 23:12; 31:15; 35:2; Lewi 23:3; Kel d M 5:13-14 “Nem dau dara na' ikam nyadui, bi dau aleng ketusu sayu nah ikam ngeta', iha' pah jaka' kam luma' jaka' kam ngelunau pah, ngeta' nah tua.
22 #
Lewi 23:15-21,39-43; Kah d Is 28:26-31 “Dau Aya' Tusu Migu, sayu kam na na' pa'en, iha' tih dau aya' aring kam ala bua tuvuh kam, dahin Dau Aya' Tegu Duman Uh Lebau.
23“Sayu nah daha' laké' nei ha' unan Kui aleng Tuhan Allah kam Israel, iha' tih nei telo' hangun alem ji duman.
24“Akui seng muga lim bengsa' ha' béh men unan kam ja daléh kam layang, ji la'ung kelunan pah em kaséh nei nyilé' daléh kam, iha' tih tegu ikam nei pala Akui aleng Allah kam telo' hangun alem ji duman.
25 #
Us 12:10
“Meng kam ma'uk nun-nun ket aleng té' tavah té' iha' peji dahin daha laluh dahin bun usu kam aleng en kam uk men Akui, nurei lahuh meng melek bun usu aleng en kam uk tegu Dau Aya' Paskah atih ateng jihima.
26 #
Kel d M 24:21; 26:2 “Lim bua-bua kam aleng una' aleng sayu, sayu nah ikam geri na' tei alem uma Kui, Allah kam.
“Meng kam maru anak kading dahin ata' mo' hinan na'.”
27Kuma' nah Tuhan men Musa, “Im ngalung nah daho' anih, avin té' daho' anih nah Akui na jaji dahim, dahin lim daha' Israel lahuh.” 28Dara Musa té' dahin Tuhan ujung ngalang anan pat-pulu dau pat-pulu malem, alem dara anan pah iha' em kuman luti em du'i ata' lahuh. En na' ngalung nah lim jaji atih dih té' dua' li'ap bato' atih, iha' tih pulu tebara Tuhan.
Musa ngiléh ngalang Sinai—neng na' ngetalah
29 #
2 Kor 3:7-16
Tegu Musa nei ngiléh men ngalang Sinai en na' geri nah dua' li'ap bato' ngavan kalung tebara Allah atih dih. Bi nusi' ha' jam neng na' ngetalah avin iha' uh tengaran dahin Tuhan dih.
30Tegu Harun dahin daha' Israel nyineng Musa, ngepu'an ngetalah tua nah neng na', takut nah daha' atih jeleng iha'.
31En Musa duan nah daha', iha' nah Harun dahin lim daha' aleng mayak-mayak daha' atih nei nepulet la'an pala iha', iha' nah Musa tengaran dahin daha'. 32Lun nei nah lim daha' Israel pala iha', iha' nah iha' bara men daha' lim-lim dahun Tuhan aleng en Tuhan bara men iha' ujung ngalang Sinai atih.
33Tegu iha' uh pah dahun na' bara daha' atih, en na' nabun nah neng na'. 34Bi tegu Musa tei pala Tuhan ja tengaran dahin Na', en na' bet nah tabun neng na' atih, tegu iha' nei musang uréh ha' nabun neng na la'an. Tegu iha' nei musang iha' nah iha' bara men daha' Israel lim-lim daho' aleng uh en Tuhan bara men iha' atih, 35daha' Israel pah nyineng neng na' ngetalah nunan. Uh anan en Musa nabun nah neng na' la'an, tegu iha' tei halem ja tengaran dahin Tuhan en na' bet kah la'an.
Currently Selected:
USANG DAHA' ISRAEL 34: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
