USANG DAHA' ISRAEL 33
33
Tuhan nyihu daha' leka' men Nyalang Sinai
1 #
Ar Kel 12:7; 26:3; 28:13 Kuma' nah Tuhan men Musa, “Leka' nah ikam men inih, ika' dahin lim daha' aleng im ayak men daléh Mesir dih. Tei nah ikam ha' daléh aleng uh Ek jaji men Abraham, Isahk dahin yakub dalo' dih. Nunih Dahuk di, ‘Akui seng ma'uk daléh atih men pahu-pahu ka'.’ 2Akui seng nyihu ji meliket panau una' té' ikam ja mayak ikam, Akui pah seng muga daha' kelunan Kanaan, kelunan Amori, kelunan Het, kelunan Feris, kelunan Hewi dahin kelunan Yesbus atih. 3tei nah ikam ha' daléh atih, ji daléh aleng penu té' telang uso' dahin nyihun. Bi batung Kui nusi Kui pekwat seng nei dahin kam ja ikam em tasa' Kenak té' iung alan, avin ikam anih ji bengsa' aleng mahen lan ala katuk.”
4Tegu daha' kelenghi dahun Tuhan kuma' nunan, lun maté' kanan lumuh nah daha', ji la'ung pah em té' meté' kanan aleng sayu men daha'. 5Avin Tuhan uh kuma' men Musa, “Bara nah men daha' Israel nan, ‘Ikam anih ji bengsa' aleng mahen lan ala tebara. Awi Akui pah nei jaki-yo' dahin kam, adang Akui seng nasa' ikam. Avin anan uéh nah kanan kam aleng kajau kam pakei anan, Akui pah seng nyineng ket aleng seng ek na té' ikam.’ ” 6Tegu daha' leka' men ngalang Horeb anan nusi' nah daha' meté' kanan daha' aleng sayu atih la'an.
Lepau ngavan Musa pejam dahin Tuhan
7Tegu daha' Israel na Lepau Avan Tuhan Melo', lun tei nah Musa na ji lepau su men lepau daha' aleng kahum, aran lepau anan kenan na', “Lepau Ngavan Pejam dahin Tuhan.” Hi-hi aleng ngenep tengaran dahin Tuhan, tei nah daha' ha' lepau anan. 8Tegu Musa tei ha' lepau anan, tei nah lim daha' atih nekring té' ba lepau daha' ateng Musa ateng ha' lepau atih dih. 9Tegu Musa tei halem lepau anan, nei nah ji beluluk avun ngiléh pelalu ngeta' té' ba lepau atih, iha' nah Tuhan tengaran dahin Musa men alem avun anan. 10Tegu daha' bengsa' Israel anan jam belukuk avun atih té' ngeta' té' ba lepau anan, lun nukem nah daha' sebayang té' ha'ut-ha'ut avan daha' té' ba lepau daha'. 11Tengaran nah Tuhan dawa' Musa petelunga' neng awi ji la'ung tengaran dahin bakéh na'. Uh anan tei nah iha' uli ha' lepau na'. Bi Yosua aleng anak Nun, iha' nah aleng lengep Musa, uha' pah ji laké' aleng da'uk loh urip na', nusi' pah iha' tei melek lepau anan.
Musa akei Tuhan petula aren Na'
12Kuma' nah Musa men Tuhan, “Lan kah Ika' uh duan akui, ‘Nyihu nah daha' bengsa' anih leka',’ Kum ké', bi nusi' Ka' bara hi aleng Im nyihu dahik. Lan pah Ika' kuma', ‘Akui jam ika’, ika' pah aleng Ek masi',’ Kum pah. 13Avin anan, iha' Ika' masi akui, Im bara nah alan Ka' men akui, ateng kui jam Ika', ja akui pa'en ala asi ha' unan Ka'. Ika' pah uh jam, Ika' aleng uh mili daha' bengsa' anih ja daha' Anum.”
14Iha' nah Tuhan kuma', “Sayu kah, Musa, Akui té' kah anih mayak ika' dahin pedena' ika'.”
15Kuma' nah Musa men Tuhan, “Awi Ika' em mayak kamé', meng nyihu kamé' leka' men inih. 16Seng nuno' tuk kui jam, nurei pah daha' kelunan Ka' anih lahuh, seng jam kah kamé' akui seng té' ala asi ha' unan Ka' lo? Em Ika' kah té' nei mayak kamé' ja kamé' mukéh men kelunan té' usun tana anih, nuréh kamé' jam lan iah?”
17Kuma' nah Tuhan men Musa, “Sayu kah, Akui seng na awi dahum nan, avin ika' uh té' ala asi ha' unan Kui. Akui pah jam ika'.”
18Ken Musa nyu'ei Iha', “Im petula aren Ka' men akui arin.”
19 #
Rom 9:15
Bi Tuhan kuma', “Akui seng metei lim-lim alah Kui ha' unan ka' dahin metut aran kui ‘Tuhan’ ha' unan ka' dahin metut aran Kui ‘Tuhan’ ha' unan ka'. Akui pah seng ma'uk asi men kelunan aleng ek uk asi dahin nyalam hi aleng Ek nyalam.” 20Ken Tuhan la'an, “Nusi' ka' seng tahen nyineng neng Kui, avin kelunan aleng nyineng neng Kui, avin kelunan aleng nyineng neng Kui peletu em deng murip.” 21Kuma' pah Tuhan la'an, “Té' ji ngavan aleng jeleng Akui, tinan nah ika' deng nekring, iha' tih té' ujung ngalang bato' atih. 22Tegu aren Kui nei lalau tinan, Akui pah seng muleng ika alem luvang ngalang bato' anan, Ek meben té' usu Kui tuken Akui lalau na'. 23Tegu Akui lalau tinan, uréh Kui mebet usu Kui, ika' pah seng jam la'ung Kui tua, nusi' neng Kui seng kitam.”
Currently Selected:
USANG DAHA' ISRAEL 33: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
