USANG DAHA' ISRAEL 32
32
Hudo' sapi' met
Kel d M 9:6-29
1 #
HST 7:40
Tegu daha' jam Musa mahen lelan nei ngiléh men ujung ngalang anan, lun tei nah daha' pepeng pala Harun, pelalau kuma' men iha', “Sayu nah im na ji ket ngavan tam ketalau, avin nusi' nah itam jam seng nuno'-nuno' tuk marung Musa aleng geri itam men Mesir arei dih la'an.”
2Iha' nah Harun kuma' men daha', “Peng nah iseng-iseng met aleng té' té' iling doh kam, té' anak aké' kam dahin té' anak doh kam, geri nah pala akui.” 3Pelalau nah daha' anan mepeng lim-lim iseng met aleng té' té' iling daha', pelalau tei geri na' pala Harun. 4#HST 7:41 En na' ala nah met-met atih té' daha', en na' nyelung nah na na' jadi' ji hudo' anak sapi'. Uh anan kuma nah daha', “U itam kelunan Israel, anih nah ji ket en tam ketalau, aleng uh mayak itam musang men daléh Mesir dih.”
5Tegu Harun jam daha' kuma' nunan, en na' na nah ji avo' ha' unan hudo' anak sapi' anan, dahin kuma' men daha', “Jima dau aya' men Tuhan.” 6#1 Kor 10:7 Jihima ma'un nah daha' pesun-pesun, en daha' uk nah bun usu daha' en daha' tevek, en daha' tevek, en daha' pahun dahin bun usu ngavan daha' pahlung atih lahuh. Uh anan melo' nah daha' kuman dahin du'i, men'uh anan la'an, peju nah daha' pekelu'an, avin daha' sayu kenep.
7Kuma' nah Tuhan men Musa, “U Musa, tei nah im ngiléh, avin daha' bengsa' ka' aleng im ayak men daléh Mesir arei dih uh na hadui aleng em teneng. 8Salet lan daha' tei nyayang men alan aleng uh Eh bara men daha', daha' pah uh na ji hudo' anak sapi' en daha' ketalau, daha' pah uh ma'uk bun usu daha' men ket atih lahuh, dahin kuma', ‘U itam kelunan Israel, anih nah ji ket aleng en tam ketalau, aleng uh mayak itam musang men daléh Mesir,’ “ken daha' kah. 9Kuma' pah Tuhan la'an men Musa, “Akui uh jam daha' anih ji bengsa' aleng lalé' mahen ala katuk. 10Avin anan bei nah Akui bunget daha' dahin lemvah daha', bi ika' nah aleng seng Ek na ji bengsa' aleng kapan lelan.”
11 #
Kah d Is 14:13-19
Bi Musa akei asi lelan té' Tuhan Allah, ken na', “U Tuhan, na' nun pah Ika' seng bunget na daha' anak Ka' aleng uh Im geri musang men daléh Mesir té' tingan Ka' dahin té' tu'a usu Ka' anan lo? 12Ujung kuma' pah daha' Mesir na Ika' na'a, ‘Iha tei geri daha' musang ja seng menei katé' té' daha' dahin ja lematei daha' ha' ngalang-ngalang dahin seng lemvah daha' té' usun tana anih tua nah anan dih,’ ken daha' pah na'a tih. Meng nah Im bunget daha', pebalui nah kenep Ka' té' katé' aleng uh seng Im nei té' daha' anak Ka' atih. 13#Ar Kel 17:8; 22:16-17 Adang hituk kah Ika' té' Abraham, Ishak dahin Israel, panyin Ka' dih keta'? Bi Ika' pah aleng uh tevah té' batung Ka' dep kuma' men dalo' di, ‘Akui seng na daha' pahu kelo' kahum awi kelawing ha' langit, lim daléh aleng Ek jaji anih seng Ek uk men daha' pahu kelo', ja daha' hipun na' pa'en-pa'en,’ bi Kum di.” 14Lun pehili nah kenep Tuhan, nusi nah Iha' menei katé' aleng uh en Na' jaji seng Na' nei té' daha' anak Na' atih dih.
15Uh anan nei nah Musa ngiléh men ujung ngalang anan, té' pah dua' li'ap bato' tebara atih en na' geri, tebara-tebara Tuhan pah té' en ngalung pelengep té' iha'. 16Dua' li'ap bato' anan nah ket en Allah na, dahin en Na' mahet-mahet nah ngalung daho'-daho' té' bato' atih lahuh. 17Tegu Yosua kelenghi dahun daha' atih medéng, kuma' nah iha' men Musa, “Té' dahun pedéng daha' perang ha' lepau,” ken na'. 18Bi ken Musa men iha', “Aleng kelenghek nusi' anan dahun daha' nyanyi avin daha' maneng, nusi' pah anan dahun angih daha' avin daha' kalah, té' pah anan dahun daha' pehu'ei nyanyi tua kah anan pa,” ken na'.
19Tegu Musa nei jeleng lepau daha', kitab na' pah hudo' anak sapi' atih dahin kelunan pah nyivan-nyivan lahuh, bunget nah iha', en na' tepidet nah dua' li'ap bato' atih dih té' pa'un ngalang atih, pelalau bi'ang nah. 20En na' ala nah hudo' anak sapi' aleng en daha' na anan dih pelalau nutung na' té' apui. Uh anan en na' lemruk nah lanih-lanih, en na' urah nah ha' hungei, en na' nyihu nah daha' Israel du'i ata' hungei anan.
21En Musa teng nah Harun, “Nun aleng en daha' bengsa' anih na té' ika' du, ja ka' na ket aleng sala lan nunan té' daha'? 22Harun tira nah men Musa, “Meng im bunget akui amei, ika' pah aleng uh jam daha' bengsa' anih kelalau ji'ek. 23Nunih dahun daha' men akui dih pa, ‘Sayu nah im na ji ket aleng ngavan kamé' ngetalau, ja ket atih nah aleng mayak kamé', avin nusi nah kamé' jam nun aleng jadi' té' Musa aleng mayak kamé' musang men daléh Mesir arei dih la'an,’ ken daha' dih. 24Iha' nah akui kuma' men daha', ‘Hi aleng té' met, sayu nah iha' ma'uk na' men akui,’ lim daha' pah ma'uk akui met, pelalau ek sau nah alem apui ké', beka' nei musang nah hudo' anak sapi' anih dih.”
25Tegu Musa jam daha' tepurung hiréh hitih, Harun pah em deng duan daha' la'an, ateng daha' en bunu daha' kebia tua nutih, 26tei nah Musa nekring té' alan ngavan daha' tei ha' lepau-lepau daha' atih, pelalau kuma', “Hi aleng nginah té' Tuhan sayu nah daha' nei pala akui.” Lun tei nah daha' bengsa' Lewi pala iha'. 27Iha' nah iha' kuma' men daha', “Nunih nah dahun Tuhan Allah Israel, ‘Sayu nah ikam ngaput bukan té' iung-u'ing kam, tei nah ikam panau hiréh hitih alem lepau-lepau nih, nejuk nah ha' ha'ut-ha'ut ketamen. En kam lematei nah daha' harin kam atih tua, nurei kah daha' aleng béh amin kam lim lahuh,’ ” ken na'. 28Lun tei nah daha' Lewi anan na awi aleng hu'en Musa. Dau anan daha' lematei kio-kio' telo' libu' kelunan men hang daha' anan. 29Uh anan kuma' nah Musa, “Men dau anih nah ikam uh ma'ang jadi' en telesen men Tuhan, jadi' imam men Tuhan, avin ikam lim uh lematei dahin em namu té' daha' anak aké' kam dahin daha' harin-harin kam, avin ha' nunan ikam pah ala asi aleng nei men Tuhan men ikam dau anih.”
30Dau malah ji la'an kuma' nah Musa men daha' bengsa' atih, “Ikam anih uh na sala aya' lan. Bi kerei inih akui seng tei ma'un ngalang pala Tuhan la'an, ja akui na lawih aleng ngavan pekesayu na dahin Na' avin tavit sala kam anan.” 31Tei nah Musa pala Tuhan la'an, ken na' men Iha', “Daha' bengsa' anih uh na sala aya' lelan, daha' uh na ket en daha' ketalau atih men met. 32#NDI 69:29; K Tula 3:5 Kerei inih, Im masi nah daha', Im mayau nah sala daha' atih. Iha' Ika' em mebet sala daha', aran kui nah Im bet tua men alem buhup aleng Im ngalung anan.”
33Bi ken Tuhan men Musa, “Hi aleng na sala té' Akui aran daha' kah Ek bet men alem buhup Kui. 34Kerei inih, tei nah im geri daha' atih ha' ngavan aleng Ek bara men ika' dih. Meliket Kui seng té' panau una' ha' unan kam ja mayak ikam. Bi tegu jaka' dau Kui. Akui seng nyulei sala daha' té' daha'.”
35Men'uh anan en Tuhan nei nah perah té' daha' bengsa' anan avin daha' uh ngehameng nyihu Harun na hudo' anak sapi' arei dih.
Currently Selected:
USANG DAHA' ISRAEL 32: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
