USANG DAHA' ISRAEL 31
31
Daha' aleng na lepau Avan Tuhan
Us 35:30—36:1
1Kuma' nah Tuhan men Musa, 2“Akui uh mili Bezaleel anak Uri aleng sau Hur dih, aleng men pahu Yehuda, 3Akui pah ngepnu iha' té' Beluak dahin na iha' tugé', na iha' jam dahin haman alem nun-nun hadui, 4ja iha' na kalung-kalung kajau, iha' tih nyelung na met, pirek dahin temaga', 5ja iha' nyuvei ngalung bato' aleng melegah ja en telepet, ja iha' na-na idoh kayo' dahin na nun-nun na'an hadui aleng en daha' aleng haman na. 6Akui pah uh mili Aholiab anak Ahisamakh men pahu Dan na hadui anan dahin na' lahuh. Akui uh ma'uk ugé' alem kenep ha'ut-ha'ut kelunan aleng tugé' na hadui usu lahuh, ja daha' na nun-nun aleng uh Ek bara men ika' anan dih, 7iha' atih, na' Lepau Ngavak Melo', na Pati Ngavan Jaji, dahin na ben na' aleng ngavan pekesayu na atih, dahin na lim uvung Lepau Kui anan, 8nurei kah na mija' ngavan matah luti dahin lim uvung na', na lirui aleng men met telesen dahin lim uvung na', na avo' ngavan mahun ket bu sayu, 9nurei pah na avo' ngavan mahun laluh dahin lim uvung na', na pasau ngavan mayau dahin ladung na', 10nurei pah na kanan imam aleng kajau dahin aleng maren aleng anun imam Harun, nunan pah kanan dalo' anak na', ja dalo' gem hadui imam, 11nurei kah na kenyu aleng pakei ngenyu, dahin na ket aleng bu-bu sayu pakei té' ngavan laeng ma'ang. Piah awi uh Ek bara ika' anan dih, nunan nah daha' seng na lim-lim ket anan na'a.”
Dau Ketusu, Dau Kelarah
12Kuma' nah Tuhan men Musa, 13“Im bara Dahuk anih men daha' Israel, ‘Sayu nah ikam puboh Dau Kelarah Kui, avin anan nah ji tada' té' hang Kui dahin kam pa'en ateng ha'ut-ha'ut tebin kam, ateng ikam jam Akui nah Tuhan aleng uh nelesen ikam. 14Sayu nah ikam puboh Dau Kelarah, avin dau anan nah dau aleng ma'ang men ikam. Hi aleng em puboh dau anan, sayu iha' en ukum matei, ha'ut la'ung aleng nyadui tegu dau anan, sayu nah lematei kelunan anan té' hang bengsa' na' tua. 15#Us 20:8-11; 23:12; 34:21; 35:2; Lewi 23:3; Kel d M 5:12-14 Nem dau dara na' ikam deng na hadui kam, bi dau aleng ketusu, anan nah Dau Kelarah, pahdau dau anan nah dau aleng ma'ang men Akui. Hi-hi aleng nyadui tegu dau ketusu anan, sayu nah lematei kelunan anan tua. 16Sayu nah daha' Israel tuboh Dau Kelarah, na na' ma'ang pa'en ateng ha'ut-ha'ut tebin kam, jadi' ji jaji aleng pa'en. 17#Us 20:11 Té' hang Kui dahin daha' Israel dau anan nah ji tada' aleng pa'en-pa'en. Avin nem dau dara na' Akui na langit dahin usun tana anih, té' dau aleng ketusu anan, iha' nah Akui ngeta' men hadui Kui ja Akui ngelarah,’ kum men daha'.”
18Hu'uh Tuhan Allah tengaran dahin Musa ha' ujung ngalang Sinai anan, en Na' uk Musa nah dua' li'ap bato' tebara aleng uh en Allah ngalung té' usu Na' dep atih.
Currently Selected:
USANG DAHA' ISRAEL 31: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
