USANG DAHA' ISRAEL 30
30
Avo' ngavan mahun ket aleng bu sayu
Us 37:25-28
1“Sayu nah im na avo' ngavan mahun ket aleng sayu bu na', sayu im ala kayo' penaga im na avo' anan, 2im na ji unang meter arun na', nurei pah ayan na' lahuh, ja ha' besagi' pat, bau na' ji meter, idoh-idoh na' im na peging té' avo' anan. 3Sayu im musut met telesen té' lagah na' dahin té' lim liding na' nurei pah té' lim idoh na'. Sayu im metei li'ap met telikin balan na' aleng hujung. 4Im na pah dua' belegin met lahuh tei té' sepipah avo' anan behida balan na', anan nah ngavan masuk kayo' tang na', ja ha' té' ngavan metang na'. 5Kayo' penaga im ala na kayo' tang na', im usut met té' kayo' tang na' atih lahuh. 6Sayu im melo' avo' ngavan mahun ket aleng bu sayu atih ha' unan liding balun aleng hang Pati Avan Jaji atih, iha' tih ha' unan ben aleng ngavan pekesayu na atih aleng ujung bato' ngavan jaji aleng Avak seng nei pala ika' atih. 7Té' ujung na' nah Harun mahun ket aleng bu sayu atih ha'ut-ha'ut jihima tegu iha' tei nemei lirui atih dih, tegu anan nah iha' mahun na' lahuh. 8Nunan pah tegu Harun nyavet lirui tegu levi dau, sayu nah iha' mahun ket aleng bu sayu anan lahuh, ja ha' té' ket aleng bu sayu atih en pahun pa'en-pa'en ha' unan Kui ateng-ateng baya. 9Meng kam ma'uk ket aleng ha' béh aleng bu sayu té' ujung avo' anan, meng ma'uk ket en kam tevek aleng en kam pahun kah, meng ma'uk awi uli tuvuh kam en kam uk bara bun usu kam, nurei pah awi ket du'i en kam uk bara bun usu atih, meng kam na na' té' ujung avo' anan. 10Sayu nah Harun ngem'ang na' ji hangun alem ji duman, geri daha lahuh ngavan mayau sala atih, musut na' té' ujung idoh avo' anan ji hangun alem ji duman, nunan nah iha' na lahuh ngavan pekesayu na laeng na dena' men ikam ateng-ateng baya. Anan nah ket aleng ma'ang men Akui.”
Sin daha' Israel uk men Lepau Avan Tuhan
11Iha' nah Tuhan bara men Musa, 12“Tegu ika' ngalung aran daha' Israel, dahin tegu ika' mujap kahum daha' lahuh, sayu nah daha' ha'ut la'ung ma'uk ligit ngavan pekseayu na men Akui itung kalui hengan daha', ja meng nah daha' parit tegu ika' tei ngalung aran daha' nutih. 13#Us 38:25-26; Mat 17:24 Sayu nah daha' aleng ga' ujap atih ma'ih ji unang syikal, iha' tih sin aleng en daha' pakei alem Lepau Kui atih, sin syikal aleng telo' amat bahat na' atih. Ji unang syikal atih nah aleng en daha' uk men Akui. 14Ha'ut la'ung aleng ga' kalung aran, iha' tih daha' aleng uh ateng dua'-pulu duman umun daha', sayu daha' anan ma'uk sin anan men Akui. 15Tegu ikam ma'uk sin anan men akui meng daha' aleng kaya' ma'uk huwi, nurei pah daha' aleng humé' lahuh meng daha' ma'uk kanya men'uh ji unang syikal atih, avin sin anan nah aleng ngavan pekesayu na kalui hengan kam atih. 16Sayu nah im mepeng sin kalui hengan daha' Israel anan ja ngavan masi hadui Kui alem Lepau Kui, sin anan nah aleng bayen hengan daha' lim-lim, dahin Ngavak hituk pa'en-pa'en té' daha' Israel nan.”
Pasau temaga'
17Kuma' nah Tuhan men Musa, 18#Us 38:8 “Sayu im na ji pasau temaga' ngavan mayau, temaga' kah im na ladung na' lahuh, im lo' nah té' hang Lepau Kui dahin avo' ngavan mahun laluh atih, en tei ata' halem na' lahuh, 19tinan nah ngavan Harun dahin dalo' anak na' mayau usu dahin kudek dalo'. 20Tegu dalo' na hadui imam, sayu dalo' mayau usu dahin kudek dalo' en payan dalo' tei halem Lepau Kui, ja dalo' em matei. Nunan loh kah tegu dalo' tei pala avo' anan lahuh, tegu dalo' mahun nun-nun aleng en dalo' pahun men Akui atih. 21Sayu dalo' mayau usu dahin kudek dalo' ja dalo' em matei. Anan nah ji tebara men dalo' pa'en ateng tebin-tebin dalo' baya.”
Kenyu aleng telesen
22 #
Us 37:29
Kuma' nah Tuhan men Musa, 23“Im ala nah ket aleng kelalau bu sayu, iha' tih mur aleng ngata' nem kilogram#30:23 6 KILOGRAM iha' tih 10 kati',, dahin kun kayo' sakih telo' kilogram dahin tevo' aleng sayu telo' kilogram, 24kayo' aleng bu sayu nem kilogram, lim anih en nebangan té' tebangan aleng ha' Lepau Kui atih. Kenyu zaitun pat liter#30:24 4 LITER iha' tih jeleng 1 gilin. en ala lahuh. 25Sayu nah im na ket atih jadi' kenyu aleng menangen en telesen, kenyu atih ji na'an kenyu aleng bu sayu aleng kahum ket en kelet na', kenyu anan lahuh sayu ha' daha' aleng haman na na'. Anan nah kenyu ngavan kam ngenyu, aleng telesen men Akui. 26Té' kenyu anan nah im ngenyu Lepau Ngavak Melo' dahin Pati Avan Jaji atih, 27miha' dahin lim uvung na', lirui met dahin lim uvung na', dahin avo' ngavan mahun ket aleng bu sayu atih lahuh, 28nurei kah avo' ngavan mahun ket men Akui dahin lim uvung na', pasau ngavan mayau dahin ladung na' lahuh. 29Sayu nah im nelesen lim ket anan ja ha' kelalau ma'ang men Akui, ketu daha' aleng gem ket anan daha' pah seng ma'ang lahuh. 30Sayu im ngenyu Harun dahin dalo' anak na' dahin petneng dalo' ja dalo' deng gem hadui imam men Akui.
31“Sayu im kuma' nunih men daha' Israel, ‘Kenyu aleng ma'ang anih anun Tuhan, sayu nah kenyu anih té' pa'en-pa'en té' hang kam ateng-ateng baya. 32Hi-hi kelunan pah, meng kam pakei kenyu anih, meng pah ikam na kenyu katap anih lahuh, avin kenyu anih kenyu aleng ma'ang, ja si' kenyu anih jadi' ji ket aleng ma'ang men ikam pa'en. 33Hi-hi kelunan aleng na kenyu awi kenyu anih, awi kelunan pakei na' té' kelunan aleng em kelunan imam kah, sayu nah iha' en bet tua men hang bengsa' na',#30:33 Té' dua' ukum aleng bahat lelan kenan Tuhan, aleng bara ayan sala atih. Ji ukum, iha' tih harin kelunan aleng sala anan lematei iha' pelalau. Aleng ji atih, en daha' bet nah iha' men hang daha', ja iha' murip liong-liong tua ha' tana ngahit, ujung-ujung matei nah iha', levah pah pahu na', avin iha' uh kep'ung na sala.’ kum bara daha'.”
Ket aleng bu sayu
34Kuma' nah Tuhan men Musa, “Im ala ket aleng bu-bu sayu, iha' tih pulut mur, kahé si kahé', dahin kapun tepurau, tuk uro' mih dahin kemanyan telesen, piah tua kahum daha' ha'ut na'an ket anan lahuh. 35Lim ket anan sayu im na na' jadi' ket aleng bu sayu, sayu nah kelunan aleng haman na ket aleng bu sayu na na', en tei nah hia' na' lahuh. Lim ket anan en telesen dahin ma'ang. 36Balei men ket bu sayu anan im netuk lanih, sayu im tei melo' balei aleng uh im netuk anan ha' unan Pati Avan Jaji ha' alem Lepau Kui ha' Ngavak seng pesuk ika' atih. Sayu nah ket anan kelalau ma'ang men ikam. 37Meng kam katap na ket aleng bu sayu nunan men ikam, avin ket anan nah aleng Anuk telesen. 38Iha' té' ji la'ung na nunan ngenep na pakei na' dep, sayu nah ikam mebet iha' tua men hang bengsa' na'.”
Currently Selected:
USANG DAHA' ISRAEL 30: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
