USANG DAHA' ISRAEL 29
29
Nelesen Harun dahin dalo' anak na'
Lewi 8:1-36
1Nunih im na té' dalo', ja nelesen dalo' gem hadui imam men Akui. Ala ji sapi' laké' tenak dahin dua' duba laké' aleng em té' nun-nun ji'ek na'. 2Men tepung aleng sayu pah lahuh im na luti aleng em té' tavah na', dahin luti mih aleng em té' tavah té' iha' en peklet dahin anyih lahuh, dahin luti nyipih aleng em té' tavah té' iha' en usut anyih lahuh. 3Lim ket anih im lo' alem ji belatek, im uk nah lim na' dahin sapi' laké' atih dahin dua' duba atih.
4“Uh anan im nyihu nah Harun dahin dalo' anak na' nei ha' ba Lepau Kui anan, ja ika' meduh dalo' té' ata'. 5Im tei nah kanan atih dih té' Harun, iha' tih basung labéh aleng halem, basung uhing, dahin basung efod, dahin belasang na', jet iung-u'ing basung efod im kelilit té' iha' lahuh. 6Im tei seleben té' kahung na' lahuh, dahin ji li'ap met aleng ma'ang atih dih té' seleben na' atih. 7Uh anan im ala nah kenyu, im soh té' ujung kahung na', nunan nah im ngenyu iha'.
8“Im duan nah dalo' anak na' nei jeleng, ja ka' metei basung labéh atih té' dalo' lim. 9Im tei nah jet iung-u'ing atih té' dalo', dahin ngelilit seleben té' kahung dalo' anak Harun nan lahuh. Anan nah ji tebara aleng uh teneng ngavan pahu dalo' seng gem hadui imam ateng-ateng baya. Nunan nah tuk na' ika' petneng Harun dahin dalo' anak na' atih.
10“Uh anan im geri nah sapi' laké' anan dih ha' unan Lepau Kui, im nyihu Harun dahin dalo' anak na' metei usu dalo' té' ujung kahung sapi' laké' anan. 11Sayu nah lim nevek sapi' laké' anan ha' unan Kui té' béh a Lepau Kui anan. 12Sayu im ala uk-iduk daha sapi' laké' anan im tei té' idoh avo' anan pakei jahangau ka', daha aleng la'an atih im uak té' pa'un avo' atih. 13Uh anan im ala latap-latap na', adung aleng té' té' peléh na' dahin lim bela'ung na' dahin adung aleng nelepet té' bela'ung anan, im pahun nah té' ujung avo' anan. 14Bi sin dahin anit na' dahin ta'in sapi' anan im pahun lim-lim su té' lepau kam, avin anan nah lahuh avan mayau sala.
15“Uh anan sayu nah im ala ji duba laké' arei dih, nyihu Harun dahin dalo' anak na' metei usu dalo' té' ujung kahung duba laké' anan. 16Sayu nah im nevek duba laké' anan, im ala nah daha na', im ketiwet nah teliling té' liding avo' anan. 17Sayu im ngelawei-ngelawei duba laké' anan, en mayau sayu buréh dahin kudek na', im lo' ujung kelawei atih dahin ujung kahung na'. 18#Ef 5:2; Fil 4:18 Men'uh anan im pahun lim nah duba laké' anan dih té' ujung avo', anan nah bun usu kam en kam tevek en kam mahun men Akui, ji ket aleng bu sayu, iha' tih ji bun usu en kam ih té' apui men Akui.
19“Sayu im ala ji duba laké' aleng la'an arei dih ngelua', nyihu Harun dahin dalo' anak na' metei usu dalo' té' ujung kahung duba laké' anan. 20Sayu nah im nevek duba laké' anan, im ala uk-iduk daha na', im tei té' apeng iling Harunn aleng bah ta'o, nurei pah té' apeng iling dalo' anak na' lahuh, im tei nah té' jahangau pa'a usu dalo' pedah ta'o dahin jahangau aya' kudek dalo' aleng pedah ta'o lahuh. Daha aleng la'an atih en ketiwet nah teliling té' liding avo' atih. 21Sayu im ala uk-iduk daha aleng té' ujung avo' anan, uh anan im ala nah kenyu aleng ngavan ngenyu atih lahuh, im ketiwet té' Harun nurei pah té' kanan na' lahuh nunan pah té' dalo' anak na nurei pah té' kanan dalo' lahuh. Harun dahin dalo' anak na' pah seng ma'ang, nurei pah kanan dalo' seng ma'ang lahuh.
22“Sayu nah im ala adung duba laké' anan, iha' tih adung ikoh na' latap na', dahin adung aleng té' té' peléh na', lim bela'ung na' dahin adung aleng té' té' bela'ung anan, dahin api na' aleng bah ta'o lahuh. (Anan nah duba laké' aleng en ih ja petneng kelunan na hadui Kui.) 23Im ala ji kela'ung luti men alem belatek aleng en uk men Akui anan dih, ji kela'ung luti mih aleng té' anyih té' iha', dahin ji luti nyipih aleng em té' tavah na'. 24Lim ket anan en tei alem kamah Harun dahin dalo' anak na'. Sayu nah im ma'uk lim na' atih jadi' ket en jei ha' unan Kui. 25Uh anan im ala nah la'an men alem kamah dalo', im mahun ujung avo', iha' tih té' ujung bun usu en kam tevek en kam pahun men Akui atih, jadi' ji ket aleng bu sayu ha' unan Kui, iha' tih ji ket en uk men Akui té' apui.
26“Sayu im ala tian duba laké aleng ngavam petneng Harun anan dih im uk jadi' ji ket en jei ha' unan Kui, tian anan nah aleng itung anum té' iha'.
27“Nunan pa'en nah im petneng na' sayu-sayu mukéh tian aleng uh en jei, dahin hapi duba laké aleng uh en uk anan, avin tulan anan nah aleng anun Harun dahin dalo' anak na'. 28Anan nah aleng tulan Harun dahin dalo' anak na' pa'en-pa'en men daha' Israel. Anan nah tulan en daha' Israel uk men Akui tegu daha' geri bun usu daha' ngavan daha' pahlung Dahik.
29“Kanan Harun aleng maren atih deng kah anak na' pakei na' lahuh, sayu dalo' anak-anak Harun pakei na' tegu daha' ngenyu dalo' dahin petneng dalo'. 30Sayu anak na' aleng seng kalui iha' jadi' imam anan pakei kanan anan alem tusu dau dara na', tegu iha' tei halem Lepau Avak Melo' anan ja nyadui ha' Ngavan Aleng Ma'ang atih.
31“Sayu im ala sin duba laké' aleng en uk ngavan petneng Harun atih dih, dahin maru sin na' ha' ji ngavan aleng ma'ang. 32Im nyihu nah Harun dahin dalo' anak na' kani duba laké' anan dahin luti aleng alem belatek anan dih té' béh ba lepau Kui anan. 33Sayu dalo' kani ha'ut na'an ket atih, anan nah aleng ngavan pekesayu na tegu anan daha' petneng dalo' dahin mukéh dalo'. Ji la'ung kelunan aleng ha' béh nusi' deng daha' kani na', avin lim anan ma'ang. 34Bi tana' té' sin duba dahin luti aleng en uk ngavan petneng dalo' anan melek ateng jihima, sayu nah im mahun na' té' apui, meng kani na', avin lim anan ma'ang.
35“Sayu nah im na nunan té' Harun dahin dalo' anak na', ngioh awi aleng uh Ek bara ika' anih, tusu dau dara na' ika' petneng dalo'. 36Sayu im nevek ji sapi' laké' ha'ut-ha'ut dau jadi laluh avin sala dahin ngavan pekesayu na. Sayu im ma'uk lahuh la'an men avo' anan lahuh, ja ngem'ang na', dahin ngenyu na' ja nelesen na' men Akui. 37Tusu dau dara na' ika' na lawih té' avo' anan dahin nelesen na'. Iha' nah avo' anan jadi' kelalau ma'ang, ha'ut kelunan aleng masat dahin ket nun-nun aleng masat té' avo' anan daha' pah seng ma'ang lahuh.
Bun usu en uk ha'ut dau
Kah d Is 28:1-8
38“Anih nah aleng im uk pa'en-pa'en ha'ut-ha'ut dau ujung avo' anan lahuh, iha' tih dua' anak duba aleng umun ji duman. 39Ji duba en uk tegu jihima dahin ji duba en uk tegu levi. 40Sayu im ala dua' kilogram#29:40 2 KILOGRAM iha' tih awi 3 kati'. tepung aleng sayu, ji liter#29:40 1 LITER iha' tih ji gutun ji unang. anyih bua zaitun aleng en daha' tepa'-tepa', dahin ji liter ata' agun, jadi' anan nah ket du'i en uk bara bun usu kam. Lim anih en uk dahin anak duba aleng una' atih. 41Ji duba aleng kedua' atih dih im uk tegu levi. Sayu im metei piah kahum tepung dahin anyih dahin ata' agun awi jihima dih té' iha' lahuh. Ket nunan nah aleng bu sayu men Akui, ji bun usu kam en kam uk té' apui men Akui. 42Bun usu kam anan en kam tevek, uh anan en kam pahun, nunan nah ikam na pa'en-pa'en ateng baya tih, té' béh ba Lepau Avak Melo' atih ha' unan Kui. Avin tinan nah Akui seng nei ha' ika', ja bara Dahuk men ika'. 43Tinan nah Akui seng nei jam daha' Israel, ngavan atih pah seng ma'ang kenan aren Kui. 44Akui seng ngem'ang Lepau Kui, iha' tih Lepau Ngavak pepsuk Dahin Kam, dahin avo' atih lahuh. Harun dahin dalo' anak na' pah seng Ek ngem'ang ja dalo' deng gem hadui imam men Akui. 45Akui seng té' té' hang daha' Israel, Akui nah aleng jadi' Allah daha'. 46Daha' pah seng jam Akui nah Tuhan Allah daha' aleng uh geri daha' musang men daléh Mesir, ja Akui melo' té' hang daha'. Akui nah Tuhan Allah daha'.
Currently Selected:
USANG DAHA' ISRAEL 29: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
