USANG DAHA' ISRAEL 28
28
Kanan dalo' imam
Us 37:1-29
1“Sayu im duan Harun harim aleng dekaya' atih dahin anak-anak na', iha' tih Nadab, Abihu, Eliazar dahin Itamar, nei ha' ika' men hang daha' Israel, ja dalo' gem hadui imam men Akui. 2Sayu im na basung aren men Harun harim tih, anan nah itung kanan na' aleng kajau dahin tula maren. 3Sayu nah im nyihu lim daha' aleng tugé' aleng uh Ek uk ugé' na balun anan ja daha' na na' kanan Harun, ja ngem'ang iha', ja iha' jadi' imam men Akui. 4Nyihu nah daha' na kanan na' anan nunih, na belasang, na basung efod#28:4 BASUNG EFOD iha' aleng deng kebunang hapi., na basung uhing#28:4 BASUNG UHING iha' aleng deng belekating., na basung labeh aleng halem#28:4 BASUNG LABÉH ALENG HALEM iha' aleng deng aking kudek., en na kalung-kalung anyam na', na seleben dahin na jet iung-u'ing na' lahuh. Sayu im nyihu daha' na kanan aren anan men Harun harim nan, nurei pah men lim dalo' anak na' lahuh, ja dalo' jadi' gem hadui imam men Akui. 5Sayu daha' ala met, uvan nyemit awi langit dahin uvan nyemit mavoh, uvan bela ngelehirang, dahin uvan puti aleng lanih, na lim uvung anih.
6“Basung efod atih sayu daha' manyam na' té' uvan met, uvan nyemit awi langit, dahin uvan nyemit mavoh, uvan bela ngelehirang dahin uvan puti lanih anyam na', ket anan nah en daha' aleng haman na balun atih anyam. 7Té' la'ip basung efod anan en na dua' ukau na', ja té' iha' nah ngavan petuk na' pelalau. 8Jet basung efod anan lahuh sayu ha' piah tua ket aleng en daha' na basung atih, iha' tih uvan met, uvan nyemit awi langit, uvan nyemit mavoh, uvan bela ngelehirang, dahin uvan puti lanih aleng en daha' anyam. 9Sayu im ala dua' bato' unam, uh anan im mahet ngalung-ngalung aran pulu-dua' anak Israel té' iha', 10mahet na nem aran daha' té' ji, nurei pah té' ji lahuh, ngioh usang kanak daha'. 11Awi jam tuk hadui daha' aleng na itan aleng mahet ngalung itan, nunan nah im mahet ngalung lim aran daha' anak Israel té' bato' unam anan. Met en na telikin balan na'. 12Dua' bato' unam anan sayu im metei na' té' la'ip basung efod anan dih, anan nah aleng Ngavak hituk té' daha' Israel ja Harun geri aran aleng té' la'ip na' anan ha' unan Kui, jadi' ji tada' Ngavak hituk té' daha'. 13Met lim kah im na telikin balan na'. 14En na dua' latei met telesen, na awi irah jalei dih, im petalé, sayu im pakei dua' latei aleng en petalé' atih kaput na'.
Belasang
15“Sayu im na belasang, ket anan nah bara marung aleng teneng, daha' aleng haman nyadui im nyihu na na'. Awi ket aleng im na basung efod dih anan loh kah im na lahuh, iha' tih uvan met, uvan nyemit awi langit, uvan nyemit mavoh, uvan bela ngelehirang, dahin uvan puti aleng lanih en anyam-anyam na na'. 16En na besagi' pat, dahin en pelepet dua', ji puhek arun na', en na ji puhek pah ayan na' lahuh 17Sayu im na na' ngehilan, im telepet-telepet nah bato' té' iha', im na pat julun bato' té' iha'. Té' ji julun aleng una', sayu metei bato' akik bela, topas dahin bato' beril aleng nyemit pitem. 18Té' ji julun aleng kedua' sayu metei bato' zamrud, nilam dahin bato' itan. 19Té' ji julun aleng ketlo', sayu metei bato' aleng lavang, akik bela dahin bato' kecubung. 20Té' ji julun aleng kepat, sayu metei bato' beril, unam dahin bato' jasper. Lim bato' anih en telepet té' kehilan met, nunan nah tuk-tuk lun bato' anan té' ha'ut-ha'ut ngavan na'. 21Ngioh kahum aran anak Israel nunan pah kahum bato' anan pulu-dua' lahuh, té' ji bato' anan en mahet ngalung aran ji pahu men hang daha' Israel. 22Sayu im na latei jalei telun belasang anan, latei aleng seng en petalé' anan, met telesen im na. 23Im na dua' pakau met en tei té' dua' tukuk belasang anan. 24Sayu im metei dua' latei met aleng en petalé' atih dih tei té' dua' pakau aleng té' té' tukuk belasang atih dih. 25Uveng ji dawa' dua' latei met aleng en petalé' atih im nyatoh té' kehilan met aleng telikin bato' aleng té' la'ip basung efod atih, ha' unan na'. 26Sayu im na dua' pakau met la'an, im tei té' dua' tukuk aleng pedah halem té' belasang atih aleng pedah basung efod atih. 27Sayu im na dua' pakau met lahuh im nyatoh té' butit basung efod atih, ha' lekpéh na' behujung balun kepah basung efod atih. 28Uh anan en ngaput nah belasang dahin pakau na' té' pakau basung efod atih, en ngaput pakei talé' nyemit awi langit, ja ha' pa'en té' té' behujung jet basung efod anan, ja ha' em seluwah.
29“Nunan nah tuk Harun geri aran-aran anak Israel té' usuk na', té' belasang aleng bara marung aleng teneng atih, tegu iha' tei halem Amin Aleng Ma'ang atih, ja ket atih jadi' ji tada' Ngavak hituk té' ikam pa'en. 30#Kah d Is 27:21; Ez 2:63; Neh 7:65 Alem belasang aleng bara marung aleng teneng atih, sayu im metei Urim dahin Tumim#28:30 URIM DAHIN TUMIM aran daho' anih “alah” dahin “atek teneng”. Anih nah ngavan daha' jam kenep Tuhan., sayu ha' té' té' usuk Harun tegu iha' nei ha' unan Kui. Nunan nah Harun pa'en geri ngavan na' ngetneng kenep Kui men daha' Israel.
Kanan aleng pakei imam dep-dep
31“Sayu im na basung uhing#28:31 BASUNG UHING iha' atih aleng deng belekating., uvan nyemit awi langit im na, 32keran na' im na marung belua. En ngepet balun na asek teliling keran na', balun en daha' tukeng balun na, awi jam tuk keran basung kebiteng dih, ja ha' em melei birak. 33Ha' bulan kudek basung uhing anan, sayu im na' awi bua levang#28:33 BUA LEVANG “buah delima” alem Bahasa Kebangsaan., pakei uvan nyemit awi langit, uvan nyemit mavoh, dahin uvan bela ngelehirang. Sayu im metei uhing-uhing met té' hang na'. 34Ji uhing met dahin ji bua levang pahang-panang nunan nah metei na' teliling bulan basung uhing. 35Sayu nah Harun pakei basung uhing anan aveng iha' na hadui imam alem Lepau Kui. Dahun daha' uhing-uhing anan nah aleng tula tegu iha' tei halem Amin Aleng Ma'ang ha' unan Kui, nurei pah tegu iha' nei musang, ja meng iha' matei.
36“Sayu im na ji li'ap met telesen, im mahet ngalung na' nunih aran daho' té' li'ap met anan, ‘Ma'ang men Tuhan.’ 37Uvan nyemit awi langit im na telun li'ap met anan, sayu im ngaput na té' likau seleben na'. 38Li'ap met anan en tei té' likau seleben Harun, iha' aleng tagung lim tibah sala aleng en daha' Israel na alem daha' ma'uk men Akui, iha' tih té' lim-lim ket aleng en daha' uk men Akui. Sayu nah li'ap met anan pa'en té' té' likau Harun, ja Akui aleng Tuhan anih sayu kenep té' daha'.
39“Sayu nah im manyam-manyam uvan puti lanih na kalung té' ji basung Harun aleng labéh aleng halem atih, im na pah balun puti lanih na seleben na' lahuh. En na pulau-pulau pah kalung jet iung-u'ing na' lahuh.
40“Men dalo' anak Harun sayu im na basung labéh aleng halem dahin na jet iung-u'ing dahin seleben men dalo' lahuh, anan nah jadi' kanan aren dahin aleng kajau en dalo' té'. 41Sayu im nganan Harun harim aleng dekaya' anan dahin dalo' anak-anak na' té' lim-lim kanan anan. Men'uh anan sayu im ngenyu dalo' dahin mukéh dalo' dahin ngem'ang dalo', ja dalo' deng gem hadui imam men Akui. 42Sayu im na seluwen ba'ik deng kebuneng hapi men dalo', im na men balun puti lanih kah lahuh, ja dalo' em utoh. 43Sayu Harun dahin dalo' anak na' pakei na' tegu dalo' tei halem Lepau Ngavak Pepsuk Dahin Dalo', nurei pah tegu dalo' tei ha' avo' aleng ngavan ma'uk ket en uk atih, iha' tih tei na hadui daha' imam ha' Ngavak Aleng Ma'ang, ja dalo' em ga' sala, ja dalo' em matei. Anan nah ji tebara aleng pa'en dahin aleng teneng men Harun dalo' ateng-ateng pahu daha' aleng bayan tih lahuh.
Currently Selected:
USANG DAHA' ISRAEL 28: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
