USANG DAHA' ISRAEL 27
27
Avo' ngavan mahun laluh men Tuhan
Us 38:1-7
1“Sayu im na avo' ngavan mahun lahuh dahin bun usu kam men Akui, kayo' penaga im na, arun na' dua' meter, nurei pah ayan na' lahuh, ja ha' besagi' piah. Bau na' ji meter ji unang. 2Sayu im na idoh na' té' ha'ut-ha'ut tukuk na' bah ujung sayu im musut temaga' té' avo' aleng im na atih. 3Sayu im na taring ngavan melo' uning na', na sekup, na uit bisin na kagap na' dahin tuhei na', lim-lim uvung anan sayu ha' temaga' lim im na. 4Sayu im na lagah na' ngavan apui, im na kawang-kawang awi matan jala' dih, temaga' kah im na lahuh. Sayu im na belegin té' ha'ut-ha'ut tukuk lagah ngavan apui anan, temaga' kah im na lahuh. 5Sayu im metei lagah anan hida balan avo' anan, ja ha' nei ateng belua avo' anan. 6Sayu im ala kayo' penaga na kayo' tang avo' anan, im usut temaga' kah té' iha lahuh. 7Kayo' tang anan en asuk alem luvang belegin na' ja ha' té' sepipah avo' anan tegu daha' metang na'. 8Sayu im na avo' anan pegawah, tegan im na. Nunan nah im na na' awi aleng Ek bara men ika' ujung ngalang anih.
Latan Lepau Avan Tuhan anan
Us 38:9-20
9“Sayu nah im na latan teliling Lepau Ngavak Melo' anan. Sayu nah im na balun aleng puti lanih anyam na' im na kelahen latan na' anan lahuh. Arun kelahen atih men bah ta'o matan dau pa'un pat-pulu-nem meter#27:9 46 METER iha' tih 25 depa'.. 10Kahum jihé' kelahen na' dua'-pulu, kahum sut jihé' na' pah dua'-pulu, temaga' kah im na sut jihé' atih lahuh. Lim-lim kawit jihé' na' anan dahin kameng-kameng na' pirek lim kah im na. 11Nunan loh kah im na balun kelahen aleng bah ulei matan dau pa'un. 12Arun balun kelahen uveng na' bah matan dau uli, im na dua'-pulu-telo' meter#27:12 23 METER iha tih 12 depa' ji unang. arun na', im na pulu pah jihé' na' lahuh. 13Arun balun kelahen aleng bah matan dau pa'un, iha' tih ha' unan na', dua'-pulu-telo' meter loh kah. 14Balun bah ji ba na' tusu meter arun na', im na telo' pah jihé' na', en na telo' pah sut jihé' na' lahuh. 15Nunah pah bah ji ba na' lahuh, tusu meter loh kah arun balun atih, im na telo' pah jihé' na', na telo' pah sut jihé' na' lahuh. 16Balun ba na' anan, sayu ha' daha' aleng haman na kalung-kalung na na', iha' tih men balun nyemit awi langit dahin balun nyemit mavoh dahin balun bela ngelehirang dahin balun puti lanih anyam na'. Arun daha' ha'ut-ha'ut balun anan iha' nah pitan meter. Jihé' na' pah pat, nurei pah sut jihé' na' lahuh. 17Lim-lim jihé' kelahen aleng teliling na' anan sayu nah na pirek kameng na', kawit-kawit na' pah lahuh pirek, sut jihé' na' pah temaga' lahuh. 18Arun kelahen anan pat-pulu-nem meter, ayan na' dua' pulu-telo' meter, bau na' dua' meter. Balun puti lanih uvan iha' aleng en anyam na na', sut-sut jihé' na' pah temaga' lim im na. 19Lim-lim uvung alem Lepau Ngavak Melo' anan, dahin lim jek na' dahin jek kelahen na', sayu im na na' men temaga' lim-lim.
Puboh lirui
Lewi 24:1-4
20“Sayu im bara daha' Israel nyihu daha' geri nyak zaitun aleng en daha' netuk dahin aleng tening lan, en na nyak lirui anan, ja nyavet lirui anan ja ha' malah pa'en. 21Alem Lepau Kui anan, iha' tih ha' unan balun liding aleng ha' unan Pati Ngavan Jaji atih, sayu nah Harun dahin anak-anak na' pa'en nyineng lirui anan malah ha' unan Kui men jihima ateng levi. Anih nah ji sihu men daha' Israel pa'en-pa'en ha'ut tebin daha' ateng-ateng baya.
Currently Selected:
USANG DAHA' ISRAEL 27: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
