USANG DAHA' ISRAEL 25
25
Daven en daha' uk ja na Uma Tuhan
Us 35:4-9
1Kuma' nah Tuhan men Musa, 2“Bara nah men daha' Israel, nyihu nah daha' mepeng ket en daha' uk men Akui, iha' tih sayu ha'ut-ha'ut la'ung daha' aleng nyi'an kenep daha' ma'uk ket men Akui, 3Anih nah ket aleng en kam peng, iha' tih, met, pirek, temaga', 4balun nyemit awi langit, balun nyemit mavoh, balun bela ngelehirang, balun alut lanih, bulun kading, 5anit duba laké' aleng en ngareng bela, anit masik aya' dahin kayo' penaga#25:5 KAYO' PENAGA Anih nah ji kayo aleng murip ha' tana aleng ngahit dahin té' béh Banget Teberau. Kayo' na' mahing, bahat, em deng en ket kani, kajau pah tegan en daha' na men kayo' atih lahuh., 6nyak lirui, tuk uro' aleng ngavan kam seng na kenyu aleng bu sayu en kam usut té' ikam atih, dahin ngavan na ket bu sayu en kam pahun, 7bato' unam dahin bato' uk-uk en tei té' basung efod dahin en tei té' belasang basung. 8Sayu nah daha' na ji Ngavan Aleng Ma'ang men Akui, ja Akui té' melo' té' hang daha'. 9Ngioh lim ket aleng Ek bara men ika' anan, nunan nah lim katah Lepau Ngavak Melo' dahin katah lim uvung-uvung na', nunan nah ikam na na'.
Pati Avan Jaji Tuhan
Us 37:1-9
10“Sayu daha' na ji pati kayo' penaga, arun na' ji meter#25:10 JI METER iha' tih awi 5 puhek., ayan na' tusu-pulu sentimeter#25:10 70 SENTIMETER iha' tih 3 puhek., bau na' pah tusu-pulu sentimeter lahuh. 11Sayu im musut met telesen halem dahin hawang na', sayu im metei met tevei-tevei balan na' lahuh, na balan na' bau. 12Sayu im metei pat belegin aya' té' pati anan, belegin atih lahuh im nyelung men met, im tei nah belegin anan té' ha'ut balan tukuk na' béh tana, iha' tih dua' bah ji dahin dua' bah ji. 13Kayo' penaga im ala im na ngavan metang na', im usut met lim té' iha' lahuh. 14Sayu im masuk kayo' anan alem luvang pat belegin anan dih, ja té' ngavan metang na'. 15Kayo' tang na' anan sayu ha' pa'en té' alem belegin anan, meng mebet-mebet na'. 16Alem pati anan nah im melo' li'ap bato' avan tebara aleng seng Ek uk ika' atih.
17 #
Rom 3:25
“Ben na' im na men met telesen, ben anan nah avan pekesayu na, ben avan asi Allah, arun na' ji meter, ayan na' ji unang meter. 18Im nyelung met na dua' meliket kerub puveng té' ujung ben avan pekesayu na anan dih, en nukun-nukun na na'. 19En na ji kerub uveng anih dahin ji kerub uveng ji atih, en na puveng nah dawa' kerub anan, en na peging té' ben avan pekesayu na anan lahuh. 20Kapit dawa' kerub anan peting bau, kapit dawa' nah aleng nyingau ben avan pekesayu na anan, sayu dawa' petelunga' neng dawa' nyineng pala ben avan pekesayu na anan dih. 21Sayu im metei ben avan pekesayu na anan té' ujung Pati Avan Jaji anan, alem Pati Avan Jaji anan nah im melo' li'ap bato' jaji aleng avan tebara atih aleng seng Ek uk ika' atih. 22Hinan nah Akui seng pepsuk dahim. Té' ujung ben avan pekesayu na anan dih, té' hang dua' gaben meliket kerub aleng hujung ben Pati Avan jaji anan nah Akui seng bara ika' lim-lim ket aleng seng Ek nyihu im bara men daha' Israel.
Mija' ngavan ma'uk luti men Tuhan
Us 37:10-16
23“Nurei lahuh, sayu im na mija' kayo' penaga, arun na' ji meter, ayan na' ji unang meter, bau na' ji unang meter lahuh. 24Sayu im musut met telesen té' iha' lahuh, sayu im patah-patah li'ap met té' balan na'. 25Sayu im na tevei-tevei balan na' bau berang kamah nih, sayu im patah-patah li'ap met tevei-tevei balan na' tih lahuh. 26Im na pat belegin na' lahuh, im tei belegin anan té' ha'ut balan tukuk na', iha' tih té' ha'ut kudek na'. 27Sayu metei belegin anan jeleng balan na', ja ngavan masuk kayo' tang na', ja ngavan metang mija' anan. 28Sayu im ala kayo' penaga, im na ngavan metang na', té' kayo' anan nah ikam metang mija' anan, lim kayo' tang na' anan lahuh sayu im musut met té' iha'. 29Lahuh sayu im na uit seletah, uit makuk, tebuk bau, dahin tebuk liva awi tebuk malei, ja ngavan daha' ma'uk ket en du'i, sayu im na lim ket anan men met telesen. 30#Lewi 24:5-8 Sayu im pa'en melo' luti aleng en uk men Akui hujung mija' anan ha' unan Kui.
Lirui met
Us 37:17-24
31“Sayu nah im na ji lirui men met telesen, en nukun-nukun na na', na ladung na', na iung na', na kelekuset na', na kelalem na', nurei pah na bunga'-bunga' awi pidang bunga' té' iha' lahuh, sayu na na' pejulun piah. 32Im na nem hangat na' té' béh na', telo' bah ji, telo' pah bah ji. 33Té' ha'ut hangat na' anan na telo kelekuset aleng awi jam bua badam dih, dahin na kelalem na' dahin na bunga'-bunga' na' awi pidang bunga' dih lahuh, nunan nah im na nem hangat lirui anan. 34Té' iung lirui anan, na pat kelekuset awi jam bua badam dih, nurei pah té' kelalem na', dahin na awi pidang bunga' té' iha' lahuh. 35Sayu im na ji kelalem hida ha'ut-ha'ut pa'un hangat na'. 36Kelalem na' dahin hangat-hangat na' sayu im na na' peging té' iung lirui anan, sayu im na met telesen, im nukun-nukun na na'. 37Na tusu lirui tei té' ujung ha'ut iung lirui anan, ja ha' malah ha' unan na'. 38Ketip uvung na' dahin gasa' uvung na' lahuh en na men met telesen. 39Im na lirui anan dahin lim uvung-uvung na' men met telesen, telo'-pulu-pat kilogram#25:39 34 KILOGRAM iha' tih 56 hati' huwi. bahat na'. 40#HST 7:44; Ib 8:5 Hituk im, sayu im na na' ngioh katah aleng Ek bara ika' anih ha' ujung ngalang anih.
Currently Selected:
USANG DAHA' ISRAEL 25: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
