USANG DAHA' ISRAEL 24
24
Nageng jaji
1Kuma' nah Tuhan men Musa, “Nei nah im ma'un pala Akui kelo' Harun, Nadab dahin Abihu lahuh, dahin tusu-pulu la'ung kelunan aya' kam Israel lahuh. Nyepukun nah ikam meju Akui men su. 2U Musa, deng ika' dep nah aleng nei jeleng Akui, daha' aleng ha' béh nusi' deng jeleng. Daha' aleng kahum atih, nusi' lan daha' deng ma'un tugung dahim,” ken Tuhan.
3Lun nei nah Musa bara aleng dahun Tuhan dahin lim tebara Na' atih men daha', pelalau lim daha' bengsa' atih piah tua nyu'ei, “Lim dahun Tuhan en Na' bara anan, adang en amé' ngioh kah.” 4Pelalau nah Musa ngalung lim dahun Tuhan atih dih. Sepangen jihima ji la'an pelalau nah iha' na ji avo' té' pa'un ngalang anan, té' pah pulu-dua' jihé' bato ngioh kahum pahu Israel anan lahuh en na' tegreng tinan. 5Uh anan en na' nyihu nah daha' nyemaké' men hang daha' Israel anan ma'uk bun usu aleng en daha' tevek en daha' pahun, dahin nevek sapi'-sapi' laké' en tei bun usu en daha' uk men Tuhan. 6En Musa ala nah balei daha atih, en na' lo' alem pasau, balei daha anan en na' urah ujung avo' atih. 7En na' ala nah surat jaji atih, en na' basa' nah men daha', daha' atih pah kelenghi na', daha' pah kuma', “Lim dahun Tuhan anan en amé' kelenghi kah dahin en amé' ngioh kah lahuh.”
8 #
Mat 26:28; Mk 14:24; Lk 22:20; 1 Kor 11:25; Ib 9:19-20; 10:29 Men'uh anan la'an, en Musa ala nah daha atih pelalau murah na' té' daha' bengsa' atih, ken na', “Anih nah daha aleng nageng jaji aleng Tuhan na men ikam, iha' tih lim-lim dahun Na' anih.”
9Men'uh anan tei nah Musa, Harun, Nadab, Abihu dahin tusu-pulu la'ung daha' kelunan aya' Israel anan ma'un. 10Kitan daha' nah Allah daha' Israel atih, kudek Na' ngaja ji ket en Na' na, ket atih awi latan en daha' na men bato' nilam dih, jam alah na' pah awi alah dau tegu langit tening dih. 11Bi nusi' nah Tuhan muloh usu Na' té' daha' aleng mayak daha' Israel anan. En daha' nyineng nah Allah, uh anan daha' pah kuman dahin du'i tinan.
Musa ma'un ngalang Sinai
12Tuhan kuma' men Musa la'an, “Nei nah im ma'un ngalang anih pala Akui, nei melo' hinih, Akui pah seng ma'uk li'ap bato' aleng uh Ek ngalung men ika', iha' tih Dahuk dahin tebara aleng uh Ek ngalung, anan nah im katuk men daha'.” 13Lun tei nah Musa dawa' Yosua laké' bakén na' atih, tei nah Musa ma'un ngalang Allah atih. 14Ken na' men daha' aleng dekaya'-dekaya' atih, “Melo' nah ikam hinih pidah kawa', ateng kawa' nei ngiléh la'an. Té' kah Harun dawa' Hur dahin kam tinih, hi aleng té' tusah na' tei pala dawa' nah ikam tua.”
15Iha' nah Musa tei ma'un ngalang anan, té' nah avun meluk tua té' ngalang anan. 16Aren Tuhan pah melo' hujung ngalang Sinai anan. Nem dau dara avun anan meluk té' ngalang anan, té' dau aleng ketusu en Tuhan uvui nah Musa men alem avun anan. 17Tula nah aren Tuhan, awi apui nutung ujet ngalang anan dih jam na kurin daha' Israel aleng nyineng atih. 18#Kel d M 9:9 Tei nah Musa alem avun alem iha' ma'un ngalang anan. Dara Musa hujung ngalang anan pat-pulu dau pat pulu malem.
Currently Selected:
USANG DAHA' ISRAEL 24: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
