USANG DAHA' ISRAEL 23
23
Tuk-tuk aleng teneng dahin tutau
1 #
Us 20:16; Lewi 19:11-12; Kel d M 5:20 “Meng im mutat dengah amoh, meng im peji uyun alem tuk-tuk daho' kelunan aleng sala, tei jadi' teksi' aleng em teneng. 2Meng im ngioh daha' aleng na ji'ek, lan pah daha' kahum, pegep lahuh, bi meng ngioh. Tegu ika' na teksi' alem daha' petneng tuk nun-nun, meng im ngioh tei nguyun dahun daha' aleng ngenep ngawi tebara, lan pah daha' kahum, bi meng ngioh na'. 3#Lewi 19:15 Meng nyelepi-nyelepi kelunan aleng hemo' urip alem tuk-tuk tusah na'.
4 #
Kel d M 22:1-4
“Tana' ka' jam sapi', keledei kah, anun daha' aleng bunu ka', awi iha' lingo', sayu nah im salet tei maten iha' uli. 5Tana ka' jam keledei daha' aleng bunu ka' tei puva tua kenan bin na', meng im seng duyah tei masi meju iha', sayu im nyi'an kenep masi iha' tei nasa' bin keledei na' atih.
6 #
Lewi 19:15; Kel d M 16:19 “Meng im na daho' aleng em tuman té' daha' aleng humé' té' alem tuk-tuk tusah na'. 7Meng im peletu tei musat té' daho' aleng pamoh. Meng lematei kelunan aleng em té' sala, meng lematei kelunan aleng teneng, avin nusi' Kui masi kelunan aleng na ji'ek nutih. 8Meng im ala suap daha', avin suap anan nah aleng madet neng kelunan té' ket aleng teneng kitan daha' dahin masan tuk-tuk dahun kelunan aleng teneng.
9 #
Us 22:21; Lewi 19:33-34; Kel d M 24:17-18; 27:19 “Meng peluvat kelunan aleng nei murip nyakei, ikam pah aleng uh jam tuk-tuk urip daha' aleng nei murip nyakei atih, avin ikam pah lahuh kelunan aleng nyakei ha' tana Mesir dih.
Duman aleng ketusu dahin dau aleng ketusu
10 #
Lewi 25:1-7
“Nem duman dara na' ikam nuvuh ket en kam tuvuh té' tana kam atih, dahin mepeng lim uli hadui kam. 11Té' duman aleng ketusu anan ké' sayu nah im melek na' em na nun-nun té' iha' la'an, ja daha' aleng humé' té' hang kam deng ala ket en daha' kani lahuh té' iha'. Iha' té' aleng melek kenan daha' sayu kelung tulan alem uro' nei kani na'. Nunan pah im na té' lida agun ka' dahin lida bua zaitun ka' lahuh.
12 #
Us 20:9-11; 31:15; 34:21; 35:2; Lewi 23:3; Kel d M 5:13-14 “Nem dau dara na' ikam na hadui kam, bi té' dau aleng ketusu ngeta' nah ikam, ja sapi' dahin keledei kam dahin dipen kam dahin kelunan aleng nei murip nyakei té' uma kam pah ngelarah lahuh.
13“Lim-lim Dahuk aleng Ek bara men ikam anih en kam puboh nah sayu-sayu. Meng kam duan ket ketalau aleng ha' béh, meng té' aran daha' musang men ba kam.
Telo' Dau Aya' aleng dekaya' alem ji duman
Us 34:18-26; Kel d M 16:1-17
14“Sayu nah ikam na Dau Aya' men Akui telo' hangun alem ji duman. 15#Us 12:14-20; Lewi 23:6-8; Kah d Is 28:17-25 Kam puboh nah Dau Aya' Luti Aleng Em Té' Tavah atih pa'en. Tusu dau dara na' ikam kani luti aleng em té' tavah, awi aleng uh Ek bara men ikam. Na na' té' jaka' aleng uh en petneng, alem bulan Abib dih, avin alem bulan anan nah ikam musang men Mesir. Meng ji la'ung nei pala Akui iha' en té' ket nun-nun en na' geri.
16 #
Lewi 23:15-21,39-43; Kah d Is 28:26-31 “Dau Aya' Lunau kam en kam puboh lahuh, iha' tih dau aya' aring kam ngelunau uli hadui kam aleng en kam tuvuh alem luman kam. Nunan pah lahuh Dau Aya' Tegu Duman Uh Lebau, tegu ikam uh ala lim uli hadui kam men alem luman kam atih lahuh. 17Sayu nah lim daha' laké' nei ha' unan Kui telo' hangun alem ji duman, Akui nah aleng Tuhan kam.
18“Meng kam ma'uk nun-nun aleng té' tavah té' iha' tegu ikam ma'uk daha ket en kam tevek men Akui atih. Meng melek adung ket en kam uk men Akui tegu dau aya' Kui atih ateng jihima.
19 #
Us 34:26; Kel d M 14:21; 26:2 “Sayu nah ikam geri bua aleng aring-aring bua tuvuh kam aleng kelalau sayu aleng kam ala men lida kam atih, geri nah alem Uma Kui, aleng Tuhan, Allah kam.
“Meng kam maru anak kading peji dahin mo' hinan na'.
Jaji-jaji dahin tebara
20“Akui nyihu Meliket Kui nei panau ha' unan kam, ja puboh ikam té' alan dahin ja geri ikam ha' ngavan aleng uh Ek nemei men ikam atih. 21Sayu kam temei pa'en ha' unan na' dahin ngioh lim dahun na'. Meng kam muau iha', tana' kam muau iha' nusi' sala kam deng pebet, avin aran Kui té' alem na'. 22Bi awi ikam ngioh aleng dahun na', ngioh lim ket aleng Ek bara, Akui seng lawan bunu kam, Akui pah seng lawan ayau kam. 23Avin Meliket Kui seng panau ha' unan kam ja geri ikam ha' tana daha' kelunan Amori, kelunan Het, kelunan Feris, kelunan Kanaan, kelunan Hewi dahin kelunan Yebus, Akui pah seng lemnya daha' anan. 24Meng kam nukem sebayang té' ket aleng en daha' anan ketalau, meng kam ngioh hadui daha' anan lahuh. Bi sayu kam nasa' lim-lim hudo' aleng en daha' na, nurei pah tengulun-tengulun daha', sayu kam muret na'. 25Bi sayu kam sebayang té' Akui aleng Allah kam, Akui pah seng mi'at luti aleng kam kani dahin ata' aleng kam du'i, perah-perah kam pah seng Ek uéh té' hang kam. 26Daha' doh pah em té' aleng seng leruh anak daha' té' alem daléh kam, nusi' pah té' aleng nyalun lahuh, Akui pah seng pelebau urip kam.
27“Akui té' Akui seng Ek tei una' té' ikam, Akui seng nasa' lim kelunan aleng ngavan kam tei anan, nurei pah lahuh Akui na bunu kam lap té' ikam tua. 28Akui seng menei hinget una' té' ikam, ja hinget-hinget anan muga kelunan Hewi, kelunan Kanaan dahin kelunan Het atih lap tua men unan kam. 29Nusi' kui seng muga daha' lim pelalau alem ji duman tua ha' unan kam, ja daléh anan em henung lalé', dahin ja lim tulan men alem uro' em sa'-sa' kahum men'uh ikam. 30Pehiget uk pehiget uk kah Akui seng muga daha' men unan kam, ateng-ateng ikam nei katan, ja ikam hipun daléh anan lan. 31Akui seng petneng hang tana kam men Banget Teberau ateng ha' Banget daha' Filistin, men tana ngahit ateng hungei Efrat. Akui seng ma'uk kelunan alem daléh anan alem usu kam, ja ikam muga daha' anan men unan kam. 32Meng seng na jaji dahin daha' nurei kah té' ket ketalau daha lahuh. 33Nusi' daha' seng dena' melo' alem daléh kam, ja meng daha' na ikam sala té' Akui, iha' tih ja ikam em ngetalau té' hudo' daha', avin adang ket nunan nah aleng seng jadi' hatoh té' ikam na'a.”
Currently Selected:
USANG DAHA' ISRAEL 23: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
