USANG DAHA' ISRAEL 22
22
Petneng ukum marung ngalui daven
1“Awi té' ji la'ung nakau ji sapi', awi ji duba kah, pelalau nevek na', mina iha' belé' na' kah, sayu iha' ngalui na', iha' tih lima' sapi' kalui ji sapi' en na' nakau atih, pat duba kalui ji duba na' nakau atih.
2“Awi té' daha' jam ji kelunan nakau alem-alem iha' nasa' ketanun daha', iha' pah pelalau en daha' nukun ateng iha' matei, kelunan aleng nukun iha' anan, nusi' iha' sala. 3Awi iha' nukun iha' dau uh malah, sala kah iha'. Kelunan aleng nakau anan tekep ngalui na' lim, awi ha' em té' nun-nun ngavan na' ngalui na', sayu nah kelunan anan en belé ngavan ngalui ket aleng en na' nakau atih. 4Awi ket aleng en na' nakau atih tula dahin na', awi ha' murip loh, awi jam tuk sapi', keledei, duba kah sayu nah iha' bayen lugi kelunan atih dua' hangun kahum na'.
5“Awi té' ji kelunan pian hulung na' ha' luman na', awi ha' lida bua agun na' kah, awi iha' makau hulung na' anan, hulung na' anan pah tei kani tuvuh daha' aleng ha' béh, sayu nah iha' metei ket aleng lalau sayu aleng men luman na', men lida agun na' kah, bayen kalui lugi kelunan atih dih.
6“Awi té' ji la'ung nyavet ket nun-nun kah, apui anan pah tei nganap ga' kelukung uleng, peseloh tei nganap ateng ha' nutung peng parei daha' ha' béh, awi parei aleng em payan daha' ngelunau kah lahuh, mina tei tutung lim nah ji-ji luma' anan, sayu nah kelunan aleng nyavet ket anan dih bayen lim-lim ket anan kalui ketanun kelunan anan.
7“Awi té' ji la'ung melo' ligit awi daven na' kah ha' amin bakéh na' ja bakéh na' atih puboh na' men iha', iha' té' daha' nakau na' men alem amin bakéh na' anan, iha' kelunan aleng nakau na' anan kelan daha', sayu nah iha' bayen ngalui lugi na' anan dua' hangun kahum na'. 8Awi kelunan aleng nakau anan em kelan daha', sayu nah laké' aleng hipun amin anan tei pala Allah, ja tei bara Iha' iha' em peletu gem daven bakéh na' anan.
9“Té' ha'ut-ha'ut tuk avan ta' tei pehakat marung daven, awi jam tuk té' sapi', té' keledei kah, té' duba kah, nurei pah té' ket en kam té' dahin nun-nun aleng padé' pah lahuh, iha' té' ji la'ung aleng kuma', ‘Ketanuk anih,’ ken na', sayu nah geri tusah dawa' dua' la'ung anan ha' unan Allah. Hi aleng sala kurin Allah, sayu nah iha' bayen kalui lugi bakéh na' atih dua' hangun kahum na'.
10“Awi ji la'ung melo' ji keledei, awi sapi' kah, awi duba kah, awi nun-nun hulung kah dahin bakéh na', iha' hulung anan matei, awi iha' ga' kah, awi iha' en daha' ha' béh uga alem ha' em té' kelunan jam tuk anan, 11sayu nah dawa' tei ha' unan Allah ja petneng dawa', bakéh atih pah tevah kuma' iha' em té' gem hulung bakéh na' anan. Sayu nah bakéh na' aleng hipun bareng anan ala dahun na' anan, meng nah pekwat bayen ngalui lugi na' atih. 12Bi awi hulung na' atih en daha' nakau lan té' iha', sayu nah iha' bayen ngalui lugi laké' aleng hipun bareng atih. 13Iha' hulung anan en tulan aleng hatan lematei, sayu nah iha' geri patei na' anan ja jadi' teksi'. Nusi' nah iha' pekwat bayen kalui hulung aleng en tulan lematei anan dih.
14“Awi ja la'ung pijam ji hulung té' bakéh na', iha' hulung anan ga', awi iha' matei kah, iha' ha' em té' laké' aleng hipun hulung anan tinan, sayu nah iha' aleng pijam na' atih bayen kalui ketu lugi na'. 15Bi awi laké' aleng hipun na' atih té' tinan, meng pekwat iha' bayen kalui lugi na' atih. Awi hulung atih en na' siwa' tua, sayu nah iha' bayen siwa' na' tua.
Barik dahin adet aleng sayu
16 #
Kel d M 22:28-29
“Awi té' ji laké' ngeduk ji doh aleng em payan té' teng na', pelalau laké' anan tei tudu dahin na', sayu nah iha' ala doh anan jadi' hawan na', sayu ha' ma'uk jei na' lahuh. 17Tana' taman doh anan em kaséh lelan ma'uk anak na' anan men laké' anan, sayu nah laké' anan ma'uk tua jei na', kahum na' ngioh jei daha' nyemdoh dih.
18 #
Kel d M 18:10-11
“Meng kam pekurip doh aleng haman pusau.
19 #
Lewi 18:23; 20:15-16; Kel d M 27:21 “Hi aleng peji tudu dahin hulung sayu nah iha' en ukum matei tua.
20 #
Kel d M 17:2-7
“Hi aleng ma'uk laluh men ket en na' ketalau dep men'uh Akui, sayu nah iha' en lematei.
21 #
Us 23:9; Lewi 19:33-34; Kel d M 24:17-18; 27:19 “Meng im peluvat dahin pekaté' na kelunan aleng nyakei, avin ikam pah kelunan aleng nyakei tua men'a ha' tana Mesir atih lahuh. 22Meng kam pekaté' daha' debalo', nurei kah daha' anak ula' lim lahuh. 23Awi ikam pekaté' daha', adang Akui té' kelenghi dahun daha' medéng duan Akui. 24Akui pah seng bunget ikam pelalau lematei ikam té' malat Kui, doh kam pah seng jadi' debalo', anak kam pah jadi' anak ula' lahuh.
25 #
Lewi 25:35-38; Kel d M 15:7-11; 23:19-20 “Iha' ika' ma'uk sin pijam men ji-ji la'ung anak Kui aleng humé' té' hang kam, meng nah im awi daha' aleng ilau utung té' sin daha', meng kam seng ilau anak sin anan té' daha'. 26#Kel d M 24:10-13 Iha' ika' ala basung aru bakéh ka' jadi' duduk ketanum en na' pijam, sayu nah im ma'uk na' uli men iha' em payan matan dau ngesem, 27avin ji anan kah ket en na' té' aleng en na' kelava' la'an, anan nah aleng en na' selayung té' lah na', seng nun aleng seng en na' té' tudu la'an? Awi ha' medéng duan Akui, akui pah kelenghi dahun na', avin Akui nah aleng huwi-huwi nyalam.
28 #
HST 23:5
“Meng nah im nunu Akui dahin meng im nunu kelunan aleng dekaya' té' hang kam.
29“Meng im mahen ma'uk uli parei ka' dahin uli agun ka' itung bun usu ka'.
“Anak aké' ka' aleng una', sayu nah im ma'uk iha' men Akui. 30Nunan pah tuk ka' na marung sapi' dahin duba ka'. Tusu dau dara anak daha' té' dahin hinan daha', té' dau aleng kesaya' ké', sayu nah im ma'uk daha' men Akui.
31 #
Lewi 17:15
Sayu nah ikam jadi' kelunan aleng ma'ang men Akui. Hulung aleng en tulan hatan lematei ha' padang meng kam kani na', en kam sau nah men aso' tua.
Currently Selected:
USANG DAHA' ISRAEL 22: TDK1990
Highlight
Copy
Compare
Share
Want to have your highlights saved across all your devices? Sign up or sign in
Bible in Today's Dahun Kayan Version © Bible Society of Malaysia, 1990.
